ޚަބަރު
ފަތުރުވެރިކަމާއި ތިމާވެށީގެ ވުޒާރާގެ ޕަރމަނަންޓް ސެކްރެޓަރީއަކަށް އަޖުވަދު މުސްޠަފާ

ފަތުރުވެރިކަމާއި ތިމާވެށީގެ ވުޒާރާގެ ޕަރމަނަންޓް ސެކްރެޓަރީއަކަށް އަޖުވަދު މުސްޠަފާ އައްޔަންކުރެއްވުން ފޮޓޯ: ޕީއެސްއެމް
ފަތުރުވެރިކަމާއި ތިމާވެށްޓާބެހޭ ވުޒާރާގެ ޕަރމަނަންޓް ސެކްރެޓަރީގެ މަޤާމަށް އަޖުވަދު މުސްޠަފާ ހަމަޖައްސަވައިފިއެވެ. މި އައްޔަންކުރެއްވުމަކީ ކުރިން ވަކިން ހިންގަމުން އައި ތިމާވެށްޓާބެހޭ ވުޒާރާއާއި ފަތުރުވެރިކަމާބެހޭ ވުޒާރާ އެއްކޮށްލުމާ ގުޅިގެން ކުރެވުނު އައްޔަންކުރުމެކެވެ.
އަޖުވަދު މުސްޠަފާ މި މަޤާމަށް އައްޔަންކުރެއްވުމާ ގުޅިގެން ފަތުރުވެރިކަމާއި ތިމާވެށްޓާބެހޭ ވުޒާރާއިން ވަނީ މަރުޙަބާ ދަންނަވާފައެވެ. އަދި ވުޒާރާގެ ތަޞައްވުރުތައް ހާސިލުކުރުމުގައި އަޖުވަދު މަސައްކަތްކޮށްދެއްވާނެ ކަމަށް އުއްމީދުކުރައްވާ ކަމަށްވެސް ވުޒާރާއިން ވަނީ ފާހަގަކުރައްވާފައެވެ.
އަޖުވަދު މުސްޠަފާއަކީ މީގެ ކުރިން އެންވަޔަރަންމަންޓް މިނިސްޓްރީ ވަކި ވުޒާރާއެއްގެ ގޮތުގައި ހިނގަމުން އައިއިރު، އެ ވުޒާރާގެ ޕަރމަނަންޓް ސެކްރެޓަރީގެ މަޤާމު 10 އަހަރަށްވުރެ ގިނަ ދުވަހު ފުރުއްވާފައިވާ ބޭފުޅެކެވެ. އޭނާ ވަނީ އިނގިރޭސިވިލާތުގެ ސަރީ ޔުނިވަރސިޓީން އެނަރޖީ އިކޮނޮމިކްސް ދާއިރާއިން މާސްޓާސް ޑިގްރީ ހާސިލުކުރައްވާފައެވެ. މީގެ އިތުރުން، އަޖުވަދު ވަނީ ތިމާވެށީގެ ދާއިރާއިން ސަރުކާރުގެ އެކި އިސް މަޤާމުތައްވެސް ފުރުއްވާފައެވެ.