ރޯދަމަހު ހޮސްޕިޓަލްތަކުގައި ބަލިމީހުންނަށް ޒިޔާރަތްކުރެވޭ ވަގުތު އިތުރުކޮށްފި

މާލެ ސިޓީ ގްރޫޕް އޮފް ހޮސްޕިޓަލްތަކުން މިއަދު އިޢުލާނުކުރި ގޮތުގައި، ރަމަޟާން މަހުގައި އެނދުމަތި ކޮށްގެން ފަރުވާދޭ ބަލިމީހުންނަށް ޒިޔާރަތްކުރެވޭ ވަގުތު އިތުރުކޮށްފިއެވެ.މިކަންހާމަކުރެއްވީ މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުލް ރައްޒާޤް ހަލީމް ސޯޝަލްމީޑީއާގައި ކުރެއްވި ޕޯސްޓެއްގައެވެ.

މިގޮތުން، ކުރިން ހަވީރު 6:00 އިން ރޭގަނޑު 8:00 އަށް ހަމަޖެހިފައިވާ ޒިޔާރަތްކުރުމުގެ ވަގުތު، މިހާރު ހަވީރު 5:00 އިން ފެށިގެން ރޭގަނޑު 10:30 އަށް  އިތުރުކޮށްފައިވެއެވެ. 

މި ނިންމުން ނިންމާފައިވަނީ ރޯދަމަހުގެ ޚާއްޞަ ޙާލަތަށް ރިޢާޔަތްކޮށް، ބަލިމީހުންނާއި އެމީހުންގެ ޢާއިލާތަކަށް ފަސޭހަވާނެ ގޮތަށެވެ. 

މާލެ ސިޓީ ގްރޫޕް އޮފް ހޮސްޕިޓަލްތަކުގައި އެނދުމަތި ކޮށްގެން ފަރުވާދޭ ބަލިމީހުންނަށް ރޯދަމަހު ޒިޔާރަތްކުރާ ވަގުތު ހަވީރު 5:00 ން ފެށިގެން ރޭގަނޑު 10:30 އަށް އިތުރު ކުރުމަށް ނިންމައިފިން.#Roadhaigeroohu

— Haleem (@22halex) March 9, 2025

މި ބަދަލާއެކު، ރަމަޟާން މަހުގެ މުއްދަތުގައި ބަލިމީހުންނަށް ޒިޔާރަތްކުރުމަށް ޖުމްލަ 5 ގަޑިއިރާއި 30 މިނެޓްގެ ވަގުތު ލިބިގެންދާނެއެވެ. 

މި ނިންމުމަކީ މާލެ ސިޓީ ގްރޫޕް އޮފް ހޮސްޕިޓަލްތަކުގެ ދަށުން ހިންގާ އިންދިރާ ގާންދީ މެމޯރިއަލް ހޮސްޕިޓަލް، ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލް ހިމެނޭ ގޮތަށް ތަންފީޒުކުރެވޭނެ ނިންމުމެކެވެ.