އަންގާރައިން ފެށިގެން މަސްދަޅު ކޭސް ބަހާނީ މިފްކޯގެ ފިހާރަތަކުން

އަންނަ އަންގާރަ ދުވަހުން ފެށިގެން މަސްދަޅު ކޭސް ބަހާނީ މިފްކޯގެ ފިހާރަތަކުންކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

މިރަމަޟާން މަހަށް ގޭބިސީތަކަށް ރޯދަ ހަދިޔާގެ  ގޮތުގައި ސަރުކާރުން ދެއްވާ މަސްދަޅު ކޭސް ބެހުމުގެ މަސައްކަތުގެ އަދާހަމަ މަޢުލޫމާތު ހިއްސާކުރައްވަމުން ވަޒީރު ވިދާޅުވީ މިހާތަނަށް އައިއިރު މާލެ ސަރަހައްދުގެ 48،000 ގޭބިސީއަކަށް ރޯދަ ހަދިޔާ ފޯރުކޮށްދީފައިވާ ކަމަށެވެ. އަދި ކުރިއަށް އޮތް ދެ ދުވަހުވެސް މިހާރެކޭ އެއްގޮތަށް 13 މަރުކަޒުގައި ރޯދަ ހަދިޔާ ދޫކުރުން ކުރިއަށްދާނެކަމަށް ވަޒީރު ވިދާޅުވިއެވެ.

މިހާތަނަށް އައިރު ގިނަ ގޭބިސީތަކަށް ރޯދަ ހަދިޔާ ދޫކޮށްފައިވުމާއެކު އަންނަ އަންގާރަ ދުވަހުން ފެށިގެން ރޯދަ ހަދިޔާ ދޫކުރާނީ މިފްކޯގެ ފިހާރަތަކުން

ވަޒީރު 

އެ ގޮތުން މާލެ އާއި ހުޅުމާލޭގައި ހުރި މިފްކޯގެ 4 ފިހާރަ ހުޅުވާފައި ހުންނަ ގަޑިތަކުގައި އެތަންތަނުން މަސްދަޅު ކޭސް ދޫކުރުން ކުރިއަށްދާނެކަމަށް ވަޒީރު އިތުރަށް ވިދާޅުވިއެވެ.

ވަޒީރު އާދަމް ޝަރީފް ޢުމަރު އިތުރަށް ވިދާޅުވީ މިފްކޯގެ ފިހާރަތަކުން މަސްދަޅު ކޭސް ދޫކުރި ނަމަވެސް ކޭސް ދޫކުރާނީ އޮންލައިން ޓޯކަން ނިޒާމުގެ ތެރެއިން ކަމަށެވެ. މިހާރު މާލޭ ސަރަޙައްދުގައި މަސްދަޅުކޭސް ބެހުމުގެ ކަންކަން ކުރިއަށްދަނީ ރޭގަނޑު 08:00 އިން 12:00 އަށެވެ.

ސަރުކާރުން ވަނީ ހުރިހާ ގޭބިސީއަކަށް މަސްދަޅު ކޭސް ލިބެންދެން މި މަސައްކަތް ކުރިއަށް ގެންދާނެކަމަށް ވިދާޅުވެފައެވެ. މަސްދަޅު ކޭސް ބަލާ ދާއިރު އެފަރާތެއްގެ އައިޑީކާޑާއި އެއްމަހުގެ ކަރަންޓު ބިލު ގެންދިއުމަށް ވަނީ އެދިފައެވެ. އަދި އެއް ފަރާތަށް އެންމެ ގިނަވެގެން ދޫކުރާނީ، ( ކަރަންޓު 3 މީޓަރަށް) 3 ކޭސް މަސްދަޅެވެ.