Ads by Exprox

ޚަބަރު

ސިޔާސީ މައިދާނުގައި އަންހެނުން ބާރުވެރިކުރުމަށް ހަތް ޕާޓީއަކުން އެއްބަސްވެއްޖެ

ސިޔާސީ މައިދާނުގައި އަންހެނުން ބާރުވެރިކުރުމަށް ހަތް ޕާޓީއަކުން އެއްބަސްވެއްޖެ

އަންހެނުންނާ ދެކޮޅަށް ހިންގޭ އަނިޔާވެރި ޢަމަލުތައް ހުއްޓުވުމަށް ގުޅިގެން މަސައްކަތްކުރުމަށް ރާއްޖޭގެ ހަތް ސިޔާސީ ޕާޓީއަކުން އެއްބަސްވުމެއްގައި ސޮއިކުރުން ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

09 މާރިޗު 2025، 09:28

09 މާރިޗު 2025، 09:28

އަންހެނުން ބާރުވެރިކުރުމާއި އަންހެނުންނާ ދެކޮޅަށް ހިންގޭ އަނިޔާވެރި ޢަމަލުތައް ހުއްޓުވުމަށް ގުޅިގެން މަސައްކަތްކުރުމަށް ރާއްޖޭގެ ހަތް ސިޔާސީ ޕާޓީއަކުން އެއްބަސްވުމެއްގައި ސޮއިކޮށްފިއެވެ. "އެންޝުއާ ސޭފްޓީ އެންޑް އީކުއަލް އޮޕޮޗުނިޓީސް ފޯ ވިމެން އިން ޕޮލިޓިކްސް" ގެ ނަމުގައި އެކުލަވާލެވުނު މި އެއްބަސްވުމަކީ އިނގިރޭސިވިލާތުގެ ވެސްޓްމިނިސްޓާ ފައުންޑޭޝަން ފޯ ޑިމޮކްރަސީގެ އިސްނެގުމުގެ ދަށުން ތައްޔާރުކުރެވުނު ކްރޮސް ޕާޓީ އެއްބަސްވުމެކެވެ.

މި އެއްބަސްވުމުގައި ސޮއިކުރި ޕާޓީތަކުގެ ތެރޭގައި މޯލްޑިވްސް ޑިމޮކްރެޓިކް ޕާޓީ (އެމްޑީޕީ)، އަދާލަތު ޕާޓީ، މޯލްޑިވްސް ޑިވެލޮޕްމަންޓް އެލައަންސް (އެމްޑީއޭ)، މޯލްޑިވްސް ނޭޝަނަލް ޕާޓީ (އެމްއެންޕީ)، ޕީޕަލްސް ނޭޝަނަލް ކޮންގްރެސް (ޕީއެންސީ)، ޕީޕަލްސް ނޭޝަނަލް ފްރަންޓް (ޕީއެންއެފް) އަދި ދަ ޑެމޮކްރެޓްސް ހިމެނެއެވެ.

ވެސްޓްމިނިސްޓާ ފައުންޑޭޝަނުން ހާމަކުރި ގޮތުގައި މި އެއްބަސްވުމަކީ ދިވެހިރާއްޖޭގެ ސިޔާސީ މަޝްރަޙުގެ މައްޗަށް ފުޅާ ދާއިރާއެއްގައި ކުރެވުނު ދިރާސާތަކަށް ބިނާކޮށް އެކުލަވާލެވުނު މުހިންމު ލިޔުމެކެވެ. މި އެއްބަސްވުމުގައި ސިޔާސީ ދާއިރާގައި އަންހެނުން ބާރުވެރިކުރުމަށާއި އަންހެނުންނަށް ކުރިމަތިވާ އަނިޔާވެރި ޢަމަލުތައް ހުއްޓުވުމަށް ސިޔާސީ ޕާޓީތަކުން އަޅަންޖެހޭ ފިޔަވަޅުތައް ތަފްސީލުކޮށް ބަޔާންކޮށްފައިވެއެވެ.

ވެސްޓްމިނިސްޓާ ފައުންޑޭޝަނުން ނެރުނު ބަޔާނެއްގައި ބުނެފައިވަނީ މި އެއްބަސްވުމުގެ މަޤްޞަދަކީ ސިޔާސީ މައިދާނުގައި އަންހެނުންނަށް ކުރިމަތިވަމުން އައިސްފައިވާ ހުރަސްތައް ނައްތާލައި، ފާހަގަކޮށްލެވޭފަދަ އިޞްލާޙީ ބަދަލުތަކެއް ގެނައުން ކަމަށެވެ. އަދި ޤައުމީ ފެންވަރުގެ ނިންމުންތައް ނިންމުމުގައި އަންހެނުންނަށް ބަސްބުނުމުގެ ފުރުޞަތު ފަހިކޮށްދީ، ރާއްޖޭގައި ހަރުދަނާ އަދި ޝާމިލު ޑިމޮކްރެޓިކް މާޙައުލެއް ޤާއިމުކުރުމަށް މަގުފަހިކޮށްދިނުން ކަމަށްވެސް އެ ބަޔާނުގައި ފާހަގަކޮށްފައިވެއެވެ.

މިއީ އަންހެނުން ބާރުވެރިކުރުމަށާއި އަންހެނުންނާ ދެކޮޅަށް ހިންގޭ އަނިޔާވެރި ޢަމަލުތަކާ ދެކޮޅަށް ގުޅިގެން މަސައްކަތްކުރުމަށް ރާއްޖޭގެ ސިޔާސީ ޕާޓީތަކުން އެއްބަސްވި ފުރަތަމަ ފަހަރެވެ. 
                    

މި ލިޔުން ކިޔާލުމުން

Ads by MSS