ޚަބަރު
މިދިޔަ ހަފްތާގައި މަސްވެރިންނަށް 23.9 މިލިޔަން ރުފިޔާ ދޫކޮށްފި

މި ފްކޯގެ ބޯޓަކަށް މަސްވެރިން މަސްކިރުވަނީ ފޮޓޯ:ޕީއެސްއެމް
މިދިޔަ ހަފްތާގައި މަސްވެރިން ކިރުވި މަހަށް 23.9 މިލިޔަން ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހާމަކޮށްފިއެވެ. މިފްކޯގެ ތަފާސްހިސާބުތަކުން ދައްކާގޮތުގައި މިދިޔަ ހަފްތާގައި 232 ދޯންޏަކުން މަސްކިރުވާފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާ އެއްގޮތަށް، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރަމުންދާކަމަށް މިފްކޯއިން ބުނެފައިވެއެވެ. އެންމެ ގިނަ އަދަދަކަށް ފައިސާ ދޫކޮށްފައިވަނީ މިމަހުގެ 8 ވަނަ ދުވަހު ކަމަށާއި، އެދުވަހު 40 މަސްދޯންޏަކަށް 7.5 މިލިޔަން ރުފިޔާ ދޫކޮށްފައިވާކަމަށް މިފްކޯއިން ހާމަކޮށްފައިވެއެވެ.
މިއަހަރުގެ ފެބްރުއަރީ މަހު މަސްވެރިންނަށް މިފްކޯއިން ދޫކޮށްފައިވަނީ 120 މިލިޔަން ރުފިޔާއެވެ. މިއީ ޖަނަވަރީ މަހާ އަޅާބަލާއިރު 2.6 އިންސައްތަ އިތުރު އަދަދެކެވެ. ޖަނަވަރީ މަހު މިފްކޯއިން މަސްވެރިންނަށް ދޫކޮށްފައިވަނީ 177 މިލިޔަން ރުފިޔާއެވެ.
ފަހުގެ ތާރީޚެއްގައި އެންމެ ގިނަ އަދަދަކަށް މިފްކޯއަށް މަސް ކިރުވާފައިވަނީ މިދިޔަ ފެބްރުއަރީ މަހުގެ 12 ވަނަ ދުވަހުއެވެ. އެދުވަހު 546 ޓަނުގެ މަސް ކިރުވާފައިވާއިރު، 48 މަސްދޯންޏަކަށް 7.6 މިލިޔަން ރުފިޔާ ދޫކޮށްފައިވާކަމަށް މިފްކޯއިން ބުނެފައިވެއެވެ.
މަސްވެރިކަމުގެ ސިނާއަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާއަތަށް މަސްވެރިކަން ހެދުމަކީ ސަރުކާރުގެ އަމާޒެއްކަމަށް ބުނެފައިވެއެވެ. އެގޮތުން މަސްވެރިކަމުގެ ސިނާއަތައް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ގެނެސްދިނުމަށް މަސްވެރިކަމުގެ ފެސިލިޓީތައް ތަރައްޤީކުރުމުގެ މަސައްކަތް ކުރަމުންދާކަމަށްވެސް ސަރުކާރުން ބުނެފައިވެއެވެ.