ޚަބަރު
މެލޭޝިއާގައި ދިރިއުޅެމުންދާ ދިވެހި ދަރިވަރުންނަށް ޚާއްޞަކޮށް ޤުރުއާން މުބާރާތެއް ބާއްވައިފި

"އިޤްރައުލް ޤުރްއާން 1446" މުބާރާތުގެ ތެރެއިން/ފޮޓޯ: ހައިކޮމިޝަން
މެލޭޝިއާގައި ދިރިއުޅެމުންދާ ދިވެހި ދަރިވަރުންނަށް ޚާއްޞަކޮށް ޤުރުއާން މުބާރާތެއް ބާއްވައިފިއެވެ.
އިޤްރައުލް ޤުރްއާން ގެ ނަމުގައި ބާއްވާ މި މުބާރާތަކީ، މެލޭޝިއާގައި ހުންނަ ދިވެހިރާއްޖޭގެ ހައިކޮމިޝަނުން އިންތިޒާމްކޮށްގެން އެ ޤައުމުގައި ތިބި ދިވެހިންނަށް ބާއްވާ މުބާރާތެކެވެ. މި މުބާރާތް ބާއްވާފައިވަނީ މި މަހުގެ 8 ވަނަ ދުވަހު މެލޭޝިޔާގައި ހުންނަ ދިވެހި ހައިކޮމިޝަނުގައެވެ.
މެލޭޝިއާގައި ހުންނަ ދިވެހި ހައިކޮމިޝަނުން ވިދާޅުވީ، މި މުބާރާތަކީ ކޮންމެ އަހަރެއްގެ ވެސް ރަމަޟާން މަހާއި ދިމާކޮށް މެލޭޝިޔާގައި ދިރިއުޅޭ ދިވެހި ކުދީންނަށް އަމާޒުކޮށްގެން ބާއްވަމުން އަންނަ މުބާރާތެއް ކަމަށެވެ. އަދި މި މުބާރާތުގެ ހުރިހާ ކަމެއް އިންތިޒާމުކޮށް ރާވާ ހިންގަނީ ވެސް ދިވެހި ހައިކޮމިޝަނުންނެވެ. މިއަހަރުގެ އިޤްރައުލް ޤުރްއާން މުބާރާތުގައި އެކި ޢުމުރުފުރާތަކުން ޖުމްލަ 32 ދަރިވަރުން ބައިވެރިވެ، ކިޔަވާފައިވާކަމަށް ހައިކޮމިޝަނުން މަޢުލޫމާތުދެއެވެ.
މި މުބާރާތުގައި ބައިވެރިވި ދަރިވަރުންނާއި، އެ ދަރިވަރުންގެ ބެލެނިވެރިންނާއި މުޚާތަބުކުރައްވާ ވާހަކަފުޅުދައްކަވަމުން ދިވެހިރާއްޖެއިން މެލޭޝިޔާއަށް ކަނޑައަޅުއްވާފައި ހުންނަވާ ސަފީރު ޑރ. މަރިޔަމް ޝަބީނާ އަހުމަދު ވިދާޅުވީ، ކީރިތި ޤުރުއާން ކިޔެވުމުގެ ރޫޙު ދަރިވަރުންގެ ކިބައިގައި އިތުރުކުރުމަށް މަސައްކަތް ކުރައްވަން ޖެހޭ ކަމަށެވެ. ހަމަ އެހެންމެ، ސަފީރު ވަނީ ކީރިތި ޤުރުއާން ކިޔެވުމުގެ މުހިންމުކަން ފާހަގަކުރައްވާ، ޤުރުއާނާއި އަހުލުވެރިވުމަށް ނަސޭހަތްތެރިވެފަ އެވެ. މީގެ އިތުރުން، މި މުބާރަތުގައި ފަލާޙް ޕްރީސްކޫލްގެ ޕްރިންސިޕަލް އަލްޤާރީ އަލްހާފިޒު އަބްދުއްސައްތާރު އަބޫބަކުރު ވަނީ ކުދިންނާއި މުޚާތަބުކުރައްވާފަ އެވެ. އަދި ތަޖުވީދުގެ ހަމަތަކާއިއެކު ރަނގަޅު ގޮތަށް ޤުރުއާން ކިޔެވުމުގެ މުހިންމުކަން ދަރިވަރުންނަށް ވަނީ ކިޔާދެއްވާފަ އެވެ.
މެލޭޝިއާގައި ހުންނަ ދިވެހި ހައިކޮމިޝަނުން ވިދާޅުވީ، މި މުބާރަތުގެ އެންމެ ބޮޑު އެއް މަޤްޞަދަކީ އެ ޤައުމުގައި ދިރިއުޅެމުންދާ ކުދީންގެ ހިތްތަކުގައި ކީރިތި ޤުރުއާނާއި މެދު ލޯބި އުފެއްދުން ކަމަށެވެ. ހަމަ އެހެންމެ، މިކުދީންނަށް ތަޖުވީދުގެ ހަމަތަކާއިއެކު ޤުރުއާން ކިޔެވުމަށް ބާރުއަޅައި، ޤުރުއާނުގެ މުހިންމުކަން ދަރިވަރުންނަށް ފަހުމުވެގަންދާނެ ކަމަށް ހައިކޮމިޝަނުން ވަނީ ވިދާޅުވެފައެވެ.