މާލޭގައި ފެންބޮޑުވެ 3 ސަރަޙައްދެއްގައި ސިފައިން ފެންހިންދަން ހަރަކާތްތެރިވަނީ

މިއަދު ހަވީރުން ފެށިގެން މާލެއަށް ބޯކޮށް ވާރޭވެހުމާ ގުޅިގެން މާލޭގެ 3 ސަރަޙައްދެއްގައި މިވަގުތުވެސް ފެން ހިންދުމުގެ މަސައްކަތުގައި ސިފައިން ހަރަކާތްތެރިވަމުންދާ ކަމަށް ޤައުމީ ދިފާއީ ބާރު (އެމްއެންޑީއެފް) އިން  ހާމަކޮށްފިއެވެ.

އެމްއެންޑީއެފްގެ ފަރާތުން ދެއްވި މަޢުލޫމާތުގައި، މިވަގުތު ފެން ހިންދުމަށްޓަކައި މާލޭގެ 3 ސަރަޙައްދެއްގައި 6 ޕަންޕު ބަހައްޓައިގެން މަސައްކަތް ކުރަމުންދާ ކަމަށް ވިދާޅުވިއެވެ. މި ސަރަޙައްދުތަކަކީ ވެސްޓްޕާކު ސަރަޙައްދު، އައިޖީއެމްއެޗް ސަރަޙައްދު އަދި މާފަންނު ފެރީ ޓަރމިނަލް ސަރަޙައްދެވެ. މިއީ ބޯކޮށް ވާރޭވެހިއްޖެނަމަ އެންމެ ބޮޑަށް ފެންބޮޑުވާ ސަރަޙައްދުތަކެވެ.

މީގެ އިތުރުން، އާންމުންގެ މުދަލާއި ގޯތިގެދޮރުގެ ރައްކާތެރިކަމަށްޓަކައި ވެލިބަސްތާ ޖެހުމުގެ މަސައްކަތުގައިވެސް ސިފައިން ހަރަކާތްތެރިވަމުންދާ ކަމަށް އެމްއެންޑީއެފްއިން ހާމަކުރިއެވެ.

މޫސުމާބެހޭ ޤައުމީ އިދާރާއިން ދީފައިވާ މަޢުލޫމާތުގައި، މިއަދު މެންދުރު ފަހުން ފެށިގެން އުތުރާއި މެދުތެރޭގެ އަތޮޅުތަކަށް މޫސުން ގޯސްވެ ވިއްސާރަކުރާނެ ކަމަށް ލަފާކުރެވޭ ކަމަށް ބުނެފައިވެއެވެ. މި ވިއްސާރައަކީ ރާއްޖޭގެ އިރުމަތީ ސަރަހައްދުގައި އުފެދިފައިވާ ސާކިއުލޭޝަނެއްގެ ސަބަބުން ކުރަމުންދާ ވިއްސާރައެއް ކަމަށްވެސް އެ އިދާރާއިން ފާހަގަކޮށްފައިވެއެވެ.

އަންނަ ބުރާސްފަތި ދުވަހާ ހަމައަށް މޫސުން ގޯސްވާނެ ކަމަށް ލަފާކުރެވޭ ކަމަށާއި، މިރެއާއި މާދަމާވެސް ރާއްޖޭގެ ބޮޑު ސަރަހައްދަކަށް ވިއްސާރަކުރާނެ ކަމަށް މޫސުމާބެހޭ ޤައުމީ އިދާރާއިން ވިދާޅުވިއެވެ. ވަކިން ޚާއްޞަކޮށް މެދުތެރެއާއި އުތުރުގެ އެކި ހިސާބަށް ވިއްސާރަކުރާނެ ކަމަށާއި، ބައެއް ރަށްތަކަށް ގުގުރުމާއެކު ބޯކޮށް ވާރޭ ވެހުން އެކަށީގެންވާ ކަމަށްވެސް އެ އިދާރާއިން ހާމަކުރިއެވެ. އަދި ދެކުނުގެ އެކި ހިސާބަށް ކެރީގެ އަސަރު ފޯރާނެ ކަމަށްވެސް ލަފާކުރެވޭ ކަމަށް ބުނެފައިވެއެވެ.