Ads by Exprox

ޚަބަރު

ސަރުކާރުން ފައިސާ ޗާޕުކުރަން އުޅޭކަމަށް ބުނާ ވާހަކަތަކަކީ ދޮގު ވާހަކަތަކެއް: ފަލާޙު

ސަރުކާރުން ފައިސާ ޗާޕުކުރަން އުޅޭކަމަށް ބުނާ ވާހަކަތަކަކީ ދޮގު ވާހަކަތަކެއް: ފަލާޙު

ޕީއެންސީގެ ޕީޖީ ގްރޫޕްގެ ލީޑަރު އިބްރާހިމް ފަލާޙު ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

11 މާރިޗު 2025، 09:21

11 މާރިޗު 2025، 09:21

ސަރުކާރުން ޤާނޫނާ ޚިލާފަށް ފައިސާ ޗާޕުކުރަން އުޅޭކަމަށް ބުނެ އިދިކޮޅު ފަރާތްތަކުން ފަތުރަމުންދަނީ ޙަޤީޤަތާ ޚިލާފު ވާހަކަތަކެއްކަމަށާއި، ފައިސާ ޗާޕުކުރުމުގެ އެއްވެސް ވިސްނުމެއް ސަރުކާރުން ނުގެންގުޅުއްވާކަމަށް ސަރުކާރު ހިންގާ ޕީއެންސީގެ ޕީޖީ ގްރޫޕްގެ ލީޑަރު އިބްރާހިމް ފަލާޙު ވިދާޅުވެއްޖެއެވެ.

ފަލާޙު މިހެން ވިދާޅުވީ، ސަރުކާރުން ފައިސާ ޗާޕްކުރަން އުޅޭކަމަށް ބުނެ އިދިކޮޅު ފަރާތްތަކުން ރާއްޖޭގެ އިޤްތިޞާދަށް ގެއްލުންވާފަދަ ވާހަކަތަކެއް ފަތުރަމުންދާ ދަނޑިވަޅެއްގައެވެ. މަޖިލީހުގައި މިއަދު ބޭއްވި ޖަލްސާގައި ބަހުސްކުރައްވަމުން ފަލާޙު ވިދާޅުވީ، އެމްޑީޕީގެ ސަރުކާރުން ފައިސާ ޗާޕުކުރި ނަމަވެސް، މި ސަރުކާރުން ޗާޕު ނުކުރާނެކަމަށެވެ.

އިޤުތިޞާދީ ގޮތުން ދިވެހިރާއްޖެ އޮތީ އެމްޑީޕީގެ ސަރުކާރުގައި އަދަވަޅަކަށް ވައްޓާލާފައި. އެމްޑީޕީގެ ވެރިކަމެއް ކުރުމަށްފަހު ދެން އަންނަ ބަޔަކު ކޮންމެ ފަހަރަކު މި ޖެހެނީ މި އަދަވަޅުން ނަގައި އިޤުތިޞާދު ކޮޅަށް ޖަހަން

 ފަލާޙު 

17 ނޮވެމްބަރ 2023ގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތީ  ރާއްޖޭގެ އިޤުތިޞާދީ ޙާލަތު ވަރަށް ނާޒުކު ފައްތަރެއްގައި އޮއްވައެވެ. ވެރިކަމާ ހަވާލުވެވަޑައިގަތުމަށްފަހު އެމަނިކުފާނު އެންމެ ފުރަތަމަވެސް ފެއްޓެވީ ރާއްޖޭގެ އިޤުތިޞާދު އަލުން ކޮޅަށް ޖެއްސެވުމުގެ މަސައްކަތެވެ. ރައީސުލްޖުމްހޫރިއްޔާގެ އެންމެ ބޮޑު އަހައްމިއްޔަތުކަމެއް ދެއްވީ ފައިސާ ޗާޕުނުކޮށް، ލިބޭ އާމްދަނީ އިތުރުކޮށް، ދަރަނި ދައްކަމުން އިޤުތިޞާދު ހަމަ މަގަށް އެޅުއްވުމަށެވެ.

އެމްއެމްއޭއިން ފައިސާ ޗާޕްކުރަން އުޅޭކަމަށް އިދިކޮޅު ފަރާތްތަކުން ބުނިނަމަވެސް، އެމްއެމްއޭއިން އެފަދަ އެއްވެސް މަސައްކަތެއް ކުރަން އުޅޭ ވާހަކަ ދައްކާފައެއް ނުވެއެވެ. ފައިސާ ޗާޕްކުރަން އުސޫލުތަކެއް ހަދާފައި އޮންނައިރު، އިދިކޮޅު ފަރާތްތަކުން ތުަކުން ތުހުމަތުކުރާ އަދަދަކީ ޗާޕު ކުރެވޭނެ އަދަދެއް ނޫންކަން އެކަމާ ގުޅޭ މާހިރުން ފާހަގަކުރައްވައެވެ.

ސަރުކާރުން ގާނޫނާ ޚިލާފަށް ފައިސާ ޗާޕު ނުކުރާނެކަމުގެ ޔަގީންކަން ފަލާޙު ދެއްވާފައިވާއިރު، އެމްޑީޕީން މި ވާހަކަތައް ދައްކަމުންދަނީ ސިޔާސީ މަޤުޞަދުތަކެއް ހާސިލުކުރުމަށްކަމަށްވެސް ފަލާޙު ވިދާޅުވިއެވެ.

ނިމިދިޔަ އެމްޑީޕީގެ ސަރުކާރުގެ ސިޔާސަތުތަކުގެ ސަބަބުން ރާއްޖޭގެ މާލީ އަދި އިޤުތިޞާދީ ހާލަތު ވަރަށް ބޮޑަށް ދަށްވެގެންދިޔައެވެ. މަޝްރޫޢުތައް ހިންގުމުގެ ނަމުގައި ބޮޑެތި އަދަދުތަކުން މަތީ އިންޓަރެސްޓް ރޭޓުތަކުގައި ލޯނު ނެގުމުގެ ސަބަބުން ރާއްޖޭގެ ދަރަނި އެތައް ގުނައަކަށް ބޮޑުވެގެންދިޔައެވެ. އަދި ބޭރު ފައިސާ ލިބުން ދަތިވެ، ބާޒާރުގައި ތަކެތީގެ އަގުތައްވެސް އުފުލުނެވެ.

ސަރުކާރުގެ ޚަރަދުތަކާއި ދަރަނި ފޫބެއްދުމަށްޓަކައި ނިމިދިޔަ އެމްޑީޕީގެ ސަރުކާރުން ވަނީ ގިނަ އަދަދަކަށް ފައިސާ ޗާޕުކޮށްފައެވެ. މީގެ ސަބަބުން ދިވެހި ރުފިޔާ އިތުރުވެ، ޑޮލަރުގެ ތާށިކަން ވަރަށް ބޮޑަށް ކުރިމަތިވިއެވެ. އަދި ޑޮލަރުގެ އަގު އިންތިހާއަށް އުފުލިގެންދިޔައެވެ.

ނަމަވެސް މި ސަރުކާރު ވެރިކަމާ ހަވާލުވެ، ފައިސާ ޗާޕުކުރުން ހުއްޓާލައި ޑޮލަރުގެ ތަނަވަސްކަން އިތުރުކުރުމަށް ވަނީ ގިނަ މަސައްކަތްތަކެއް ކުރައްވާފައެވެ. އެ ގޮތުން ޑޮލަރުގެ ތާށިކަމުން އަރައިގަތުމަށް ފަތުރުވެރިކަމުގެ ސިނާޢަތުން އެމްއެމްއޭއަށް ޑޮލަރު މާރުކުރަންޖެހޭ ގޮތަށް ބޭރު ފައިސާއާބެހޭ ގާނޫނެއް އެކުލަވާލައި، އަމަލުކުރަން ވަނީ ފައްޓަވާފައެވެ. އެކަމުގެ ސަބަބުން ރާއްޖޭގައި އޮތް ޑޮލަރުގެ ތާށިކަމަށް ވަނީ ލުއިތަކެއް ލިބިފައެވެ.

މިހާތަނަށް އައިއިރު ސަރުކާރުން ވަނީ ފައިސާ ޗާޕުނުކޮށް ދިވެހި އިޤުތިޞާދު ހަރުދަނާ ކުރުމުގެ މަސައްކަތުގައި ކާމިޔާބީތަކެއް ހޯއްދަވާފައެވެ. އަދި އެއާއެކު ޤައުމުގައި ހަމަޖެހުން ޤާއިމްކުރެވި، ތަރައްޤީގެ ދުވެލި ވަނީ ހަލުވިވެފައެވެ.

އިޤުތިޞާދީގޮތުން ކުރިއެރުންތަކެއް ޤައުމަށް ލިބެމުންދާއިރު، އިދިކޮޅު ފަރާތްތަކުން މިހާރު ބުނަމުންދަނީ ސަރުކާރުން ފައިސާ ޗާޕުކޮށްގެން އިޤުތިޞާދުގެ ތެރެއަށް ވައްދަން އުޅޭ ކަމަށެވެ. އަދި ސަރުކާރުން މިކަން ކުރަން އުޅެނީ މަރުކަޒީ ބޭންކު މެދުވެރިކޮށްކަމަށްވެސް އިދިކޮޅު ފަރާތްތަކުން ދަނީ ތުހުމަތުކުރަމުންނުކުރަމުންނެވެ.

ނަމަވެސް ސަރުކާރު ހިންގާ ޕީއެންސީގެ ޕީޖީ ގްރޫޕްގެ ލީޑަރު އިބްރާހީމް ފަލާޙު ވަނީ މި ވާހަކަތައް ދޮގުކުރައްވާ، ސަރުކާރުން ފައިސާ ޗާޕުކުރުމުގެ އެއްވެސް ވިސްނުމެއް ނުގެންގުޅުއްވާކަމަށް ވިދާޅުވެފައެވެ. އަދި މިފަދަ ވާހަކަތައް ދެއްކުމަކީ ރާއްޖޭގެ އިޤުތިޞާދަށް ގެއްލުން ލިބޭނެ ކަމެއްކަމަށްވެސް ފަލާޙު ވަނީ ފާހަގަކުރައްވާފައެވެ.

މި ލިޔުން ކިޔާލުމުން

Ads by MSS