ކުޅިވަރު
ވީއޭއާރުގެ ޑްރާމާއާއެކު ޕެނަލްޓީޝޫޓް ކާމިޔާބުކޮށް ރެއާލް ކުއާޓާއަށް

ޕެނަލްޓީ ޝޫޓްއައުޓްގައި އަލްވަރޭޒް ބޯޅަ ފޮނުވާލަނީ، ފޮޓޯ: ގެޓީއިމޭޖަސް
ޗެމްޕިއަންސް ލީގުގެ ގަދަ-16ގެ ދެވަނަ ލެގުގައި ރޭ އެތުލެޓިކޯ މެޑްރިޑާއި ރެއާލް މެޑްރިޑް ބައްދަލުކުރި މެޗުގެ ނަތީޖާ ނެރުމަށް ޕެނަލްޓީއަށް ދާން ޖެހުނުއިރު، އެތުލެޓިކޯގެ ހޫލިއަން އަލްވަރޭޒްގެ ޕެނަލްޓީ ނުގުނުމަށް ވީޑިއޯ އެސިސްޓެންޓް ރެފްރީ (ވީއޭއާރު) ނިންމުމުން، އެތުލެޓީކޯއަށް އަނެއްކާ ވެސް ރެއާލްގެ އަތްދަށުވެ، މުބާރާތުން އަލްވަދާއު ކިޔަން ޖެހިއްޖެއެވެ.
މި ނަތީޖާއާއެކު ރެއާލްއިން 16ވަނަ ޗެމްޕިއަންސް ލީގު ޓްރޮފީ ހޯދުމަށް ކުރާ ދަތުރުގެ ކުއާޓާފައިނަލްގައި ބައްދަލުކުރަން ޖެހޭނީ އާސެނަލްއާއެވެ.
ފުރަތަމަ ލެގުގައި މި ދެ ޓީމު ރެއާލްގެ ދަނޑުގައި ބައްދަލުކުރި މެޗު 2-1 އިން ކާމިޔާބުކޮށްފައިވަނީ ރެއާލްއެވެ. ނަމަވެސް ރޭގެ މެޗުގެ ފުރަތަމަ 27 ސިކުންތުގެ ތެރޭގައި އެތުލެޓިކޯއިން ވަނީ ގޯލެއް ކާމިޔާބުކޮށް، އެގްރިގޭޓް ސްކޯ ހަމަހަމަކޮށްފައެވެ. އެތުލެޓިކޯގެ މި ގޯލު ކާމިޔާބުކޮށްދިނީ ކޮނޯރ ގެލެގާއެވެ.
އަދި އެއަށްފަހު މެޗުގައި އެއްވެސް ޓީމަކަށް އިތުރު ގޯލެއް ކާމިޔާބު ނުކުރެވުމާއި، އިތުރު ވަގުތުގެ ދެ ހާފު ކުޅުނުއިރު ވެސް ނަތީޖާއަށް އިތުރު ބަދަލެއް ނުގެނެވުނެވެ. އެހެންކަމުން، ކުއާޓާ ފައިނަލުގެ ޖާގަ ކަނޑައެޅުމަށް ޖެހުނީ ޕެނަލްޓީ ޖަހާށެވެ.
އެގޮތުން ޕެނަލްޓީޝޫޓްގައި ރެއާލް 2-1 އިން ކުރީގައި އޮށްވައި އެތުލެޓިކޯގެ އަލްވަރޭޒް އެ ޓީމުގެ ދެވަނަ ޕެނަލްޓީ ޖެހުމަށް ދިޔައެވެ. އޭނާ ޕެނަލްޓީ ޖަހަން އުޅުމުގެ ތެރޭގައި ކައްސާލައިގެން ވެއްޓުނު ނަމަވެސް، ބޯޅަ ގޮސް ގޯލުގެ ތެރެއަށް ވަނުމުން، އެއީ ކާމިޔާބު ޕެނަލްޓީއެއްކަމަށް ރެފްރީ ނިންމިއެވެ. ނަމަވެސް އޭނާ ބޯޅައިގައި ޖަހަން އުޅުމުގެ ތެރޭގައި ދެ ފަހަރަށް ބޯޅަ ފައިގަ ޖެހުނުކަމަށް ބަލާފައި ވީއޭއާރުން ފަހުން ނިންމީ އެ ޕެނަލްޓީ ނުގުނުމަށެވެ.
އެއަށްފަހު ފެޑެރިކޯ ވަލްވާރޑޭ ރެއާލްއަށް 3-1 ގެ ލީޑެއް ނަގައިދިނެވެ. އަދި އޭގެ ފަހުން އެތުލެޓިކޯގެ ގޯލްކީޕަރ، ޔާން އޮބްލަކް ރެއާލްގެ ޕެނަލްޓީއެއް މަތަކުރި ނަމަވެސް، މާކޮސް ލޮރެންޓޭގެ ޕެނަލްޓީ ހުރަސް ދަނޑިއަށް އަމާޒުވުމުން، އެތުލެޓިކޯއަށް ލިބުނު އުއްމީދު ގެއްލުނެވެ.
ރެއާލްއިން 4-2 އިން ޕެނަލްޓީޝޫޓް ކާމިޔާބުކުރީ، އެ ޓީމުގެ ޑިފެންޑަރ އެންޓޮނީ ރުޑީގާ ކާމިޔާބުކުރި ޕެނަލްޓީއިންނެވެ.
މި ދެ ޓީމު 2014 ވަނަ އަހަރާއި 2016 ވަނަ އަހަރުގެ ޗެމްޕިއަންސް ލީގު ފައިނަލްގައި ބައްދަލުކޮށްފައިވާއިރު، އެ ދެ ފަހަރު ވެސް ކުރި ހޯދީ ރެއާލްއެވެ.