ބަދުރު ހަނގުރާމައަކީ މި އުއްމަތަށް އޮތް ފިލާވަޅެއް: ޚުޠުބާ

ބަރަކާތްތެރި ރަމަޟާން މަހަކީ ﷲ އެ މަހެއްގައި ގިނަގުނަ ދަރުމަ އާއި ނަޞްރު ދެއްވުން ލައްވާފައިވާ މައްސަރެކެވެ. 

އެގޮތުން މުސްލިމުންގެ ފުރަތަމަ ހަނގުރާމަ ކަމުގައިވާ، ބަދުރު ހަނގުރާމައިން ލިބުނު ނަޞްރަކީ ވެސް ރަމަޟާން މަހެއްގައި މުސްލުމުންނަށް ﷲ ދެއްވި ނަޞްރެކެވެ. 

ބަދުރު ހަނގުރާމަ ކުރެވުނީ ހިޖުރައިން ދެވަނަ އަހަރުގެ ރަމަޟާމް މަހުގެ ސަތާރަވަނަ ދުވަހެވެ. 

ބަދުރު ހަނގުރާމައަކީ އިސްލާމީ އުއްމަތަށް ގިނަގުނަ ފިލާވަޅުތަކެއް ލިބުނު ހާދިސާއެކެވެ. އޭގެ ތެރެއިން ފުރަތަމަ ފިލާވަޅަކީ ކަންކަމުގައި މަޝްވަރާގެ ރިވެތި އުސޫލު ބޭނުންކުރުމެވެ. މި ހަނގުރާމައަށް ތައްޔާރުވުމާ ހަމައިން ކަންކަން ކުރިޔަށް ގެންގޮސްފައިވަނީ ރަސޫލާ صـلّى الله علـيـه وسـلّم އާއި މުހާޖިރުންނާއި އަންޞާރުންނާ ދެމެދު މަޝްވަރާކުރެވިގެންނެވެ.

ބަދުރު ހަނގުރާމައިގެ ދެވަނަ ފިލާވަޅަކީ ވެރީންނަށް ކިޔަމަން ގަތުމުގެ މާތް ސިފައެވެ. މުހާޖިރުންނާއި އަންޞާރުންގެ ފަރާތްޕުޅުން ފެނުނު ކިޔަމަންތެރިކަމަކީ މި ކަމުގެ ރިވެތި މިސާލެކެވެ. ޖިހާދުކުރުމުގެ އިޒުނަ އައުމުން އެ ބޭކަލުން އެކަމަށް އިޖާބަ ދެއްވި ގޮތުން އެނގި ހާމަވީ، އެ ބޭކަލުންގެ ކިޔަމަންތެރިކަމެވެ. ބަދުރު ހަނގުރާމައިގެ ދުވަހު މުހާޖިރުންނާއި އަންޞާރުން ކީރިތި صـلّى الله علـيـه وسـلّمއަށް އެރުވި މަޝްވަރާއިން މިކަން ހާމަވެއެވެ. އެބޭފުޅުން ވިދާޅުވީ، ބަނީއިސްރާއީލުގެ މީހުން މޫސާގެފާނާ މުޙާޠަބުކުރި ފަދައިން ތިމަންމެން ނުދަންނަވާ ހުށީމެވެ. އޭގެ ބަދަލުގައި ތިމަންމެން ދަންނަވާނީ ތިމަންމެން ކަލޭގެފާނާއެކު ބައިވެރިވާނެކަމުގެ ވާހަކަ ކަމެވެ.

ބަދުރު ހަނގުރާމައިން ލިބުނު ތިންވަނަ ފިލާވަޅަކީ އަޞްޙާބު ބޭކަލުންގެ ޤުރުބާނީއެވެ. އެ ދުވަހުގެ ބަދުރުގެ މައިދާނުގައި ކީރިތި ރަސޫލާ صـلّى الله علـيـه وسـلّم ހުއްޓިވަޑައިގެން ހުންނެވުމަށް ޙާއްޞަ ކުރެވިފައިވާ ޢަރީޝްކޮޅުގައި އެކަލޭގެފާނު ހުއްޓިވަޑައިގެން ހުންނެވިއިރު، އެކަލޭގެފާނުގެ ހަށިފާރައަށް އަބޫބަކުރުގެ ފާނާއި ސަޢުދުބުން މުޢާޛުގެފާނު މަޑުކުރެއްވިއެވެ. އަދި ހަނގުރާމަގައި ޝަޙީދުވި ޞަޙާބީންގެ ތެރެއިން ޒުވާން ޞަޙާބީން ހިމެނިވަޑައިގަތްކަމީ އަހަރެމެންގެ ޒުވާނުން ޢިބުރަތް ލިބިގަންނަން ޖެހޭ ކަމެކެވެ. އިސްލާމްދީނުގެ ދަންމަރު ނެގެހެއްޓުމުގައި ޒުވާނުންގެ ދައުރު އިންތިހާއަށް މުހިންމުކަމުގެ އިޝާރާތެކެވެ. 

ބަދުރު ހަނގުރާމައިން ލިބުނު ހަތަރުވަނަ ފިލާވަޅަކީ މާތް ﷲއަށް ވަކީލުކުރުމާއި ދުޢާކުރުމުގެ މުހިންމުކަމެވެ. ކަންކަމުގައި ﷲއަށް ވަކީލު ކުރުމަކީ ނަޞްރާއި ކާމިޔާބަށް ވާޞިލްކޮށްދޭ ކަމެކެވެ. އެގޮތުން ބަދުރު ހަނގުރާމައިގައި ކީރިތި ރަސޫލާ صـلّى الله علـيـه وسـلّم ﷲއަށް ދުޢާ ދެންނެވުމުން، މުސްލިމުންގެ މަދުކަމާއެކު، މާތްﷲ ވަނީ ހަނގުރާމައިގެ މައިދާނަށް ތިންހާސް މަލާއިކަތުން ފޮނުއްވާފައެވެ. 

ދުޢާއަކީ މުއުމިނުންގެ ހަތިޔާރެވެ. ކަންކަމުގައި ﷲ ޙަޟުރަތުގައި ދުޢާ ދެންނެވުމަށް ލަދުގަނެގެން ނުވާނެއެވެ. އެކަލާނގެއީ އަޅުތަކުންގެ ދުޢާ އިޖާބަކުރައްވާ ރަސްކަލާންގެއެވެ. އެކަލާނގެއަށް ބިރުވެތި އިޚްލާޞްތެރި ހިތަކުން ދުޢާކުރުމަކީ އެ ދުޢާއެއް އިޖާބަވުމަށް އޮތް ބާރެކެވެ.