ލުބްނާނަށް ދެމުންދާ ހަމަލާތައް ހުއްޓާނުލާނެ ކަމަށް ނަތަންޔާހޫ ބުނެފި!

ލުބްނާނަށް އިޒްރާއިލުން ދެމުންދާ އިންސާނިއްޔާތާ ޚިލާފު ހަމަލާތައް ހުއްޓާނުލާނެ ކަމަށް އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ. 

ނަތަންޔާހޫ އެކްސްގައި ކޮށްފައިވާ ޕޯސްޓެއްގައި ބުނެފައިވަނީ ލުބްނާނަށް ދެމުންދާ ހަމަލާތައް މެދުކަނޑާލާނެ ކަމަށް ބުނެފައިވާ ބުނުމަކީ ދޮގެއް ކަމަށެވެ. އަދި ލުބްނާނަށް ދެމުންދާ ހަމަލާތައް ހުއްޓާނުލާނެ ކަމަށް އޭނާ ވަނީ ވަޢުދުވެފައެވެ. 

އިޒްރާއިލުން ލުބްނާނަށް އިއްޔެ ދިން ހަމަލާތަކުގެ ސަބަބުން ލުބްނާންގެ 72 މީހަކު ވަނީ ޝަހީދުވެފައެވެ. އިޒްރާއިލުން ލުބްނާނަށް ދެމުންދާ ހަމަލާތަކުގެ ސަބަބުން މިހާތަނަށް ލުބްނާންގެ 620 މީހަކު ވަނީ ޝަހީދުވެފައެވެ. 

ލުބްނާންއަށް އިޒްރާއިލުން ދެމުންދާ ހަމަލާތަކުގެ ސަބަބުން މިހާތަނަށް 500،000 އެއްހާ މީހުން ގެދޮރު ގެއްލި ޙާލުގައި ޖެހިފައިވެއެވެ. 

ގެދޮރު ގެއްލިފައިވާ މީހުންގެ ބޯހިޔާވަހިކަން ވަގުތީ ގޮތުން ހަމަޖެއްސުމަށް ޓަކައި 500 އެއްހާ ވަގުތީ ހިޔާ މިހާތަނަށް ހަމަޖައްސައިފައިވާ ކަމަށް ލުބްނާންގެ އިންޓީރިއާ މިނިސްޓަރ ބައްސާމް މަވްލާވީ ވަނީ ވިދާޅުވެފައެވެ. އަދި މިކަމުގައި އެޤައުމުގެ އާންމުން ދައްކަމުންދާ އެއްބައިވަންތަ ކަމަށް ޝުކުރު އަދާކުރައްވައިފައިވެއެވެ.