ކޮންމެ މުސްލިމަކަށް ވެސް އެނގުން މުހިންމު ވާހަކައެއް!

ރޯދަމަހު އެންމެ އިސްކަމެއް ދޭންވީ އާޚިރަތް އާރާސްތު ކުރުމަށެވެ. ކުރިއަށް އޮތް އަހަރު ތިމާގެ ޢަމަލުތައް އިސްލާޙުކޮށް ހަޔާތުގެ ވޭތުވެ ދިޔަ ތަނުގައި ކުރެވުނު ފާފަތަކަށް ރުޖޫޢަ ނުވެ، ބޭކާރު ވަގުތުތައް މަދު ކުރުމަށް ނިޔަތް ގަނެ އެއާ އެއް ގޮތަށް އުޅެވޭތޯއެވެ. 

ދުނިޔެއަކީ ވަގުތީ ތަނެއް ކަން ހުރިހާ އިންސާނުންވެސް ދަނެއެވެ. އެންމެންވެސް މަރުގެ ރަހަ ދެކޭނެއެވެ. މަރަކީ އެއަށް ފިލަން ދުވެވޭނެ އެއްޗެއް ނޫނެވެ. އެއީ ދުނިޔެވީ ހަޤީޤަތެވެ. އަދި މި ދުނިޔޭގައި އެކަމަށް އިންކާރު ނުކުރެވޭނެ އެންމެ ބޮޑު ހަޤީޤަތެވެ. މި ދުނިޔެއަކީ ވަގުތީ ގޮވައްޗަކަށް ވުމުން، މުސްލިމުންނަށް މި ދުނިޔޭގެ ދިރިއުޅުމަކީ ދަތުރުވެރިއަކު ވަރުބަލި ފިލުވާލަން މަޑުކޮށްލާ މަޑުކޮށްލުމެއްގެ ގޮތުގައި ދެކުމަށް މި އުންމަތުގެ މާތް ނަބިއްޔާ ވަނީ އިރުޝާދުވެސް ދެއްވާފައެވެ. ނަމަވެސް، ދުނިޔެ ތަޢުމީރުކޮށް ބިނާ ކުރުމަކީ ދުނިޔޭގައި ތިބޭ ދުވަސްތަކުގައި ކުރަން ޖެހޭ ކަންކަމެވެ. އެއްވެސް ގޮތަކަށް ތިމާ ދުނިޔޭގައި ލެއްވި ސަބަބާއި، ދުނިޔޭގައި ތިމާ ދިރި ހުރިހާ ހިނދަކު އަދާ ކުރަންޖެހޭ ހައްޤުތަކެއް ހުރި ކަމާއި އަދި އެ ޙައްޤުތައް ލިބެން ޖެހޭ ފަރާތްތަކެއްވެސް ވާކަން ޤަބޫލު ކުރަން ޖެހެއެވެ. މުސްލިމުންނާއި ޢައިރު މުސްލިމުންގެ ތަފާތަކީ ކުރުގޮތަކަށް ބުނާ ނަމަ، މުސްލިމުން ދުނިޔޭގައި ދިރި ތިބެނީ މަރުވާނެކަން ދަނެ، އާޚިރަތުގެ ގޮވަތިވެސް ހޯދުމަށް ގިނަ މަސައްކަތްތަކެއް ކުރަން ޖެހޭކަން ދަނެގެންނެވެ. ޢައިރު މުސްލިމުން ދުނިޔޭގައި ދިރި ތިބެނީ މީ އެމީހުންގެ އާޚިރު ގޮވަތި ކަމަށް ބަލައިގެންނެވެ. 

މި ދެ ވިސްނުމުގައި މުސްލިމުން ޢައިރު މުސްލިމުންގެ ވިސްނުމާއި އެއްގޮތަށް އުޅެ އާޚިރަތް ހަނދާން ނައްތާލައިގެން ނުވާނެއެވެ. އަދި މި ދުނިޔޭގެ އުފަލާއި އަރާމާއި ، މި ދުނިޔޭގެ ނިޢްމަތަކީ ވަރަށްވެސް ކުޑަ ނިޢްމަތެއް ކަން މާތް ﷲ ވަނީ އެތައް އެތައް އާޔަތެއްގައި އަޅުގަނޑުމެންނަށް އަންގަވާފައެވެ.  

ހިތާމައަކީ، މި ކަންތައްތައް ހޯދާ ބެލުމުގައި މުސްލިމުން ކަންނެތް ވެފައި ތިބުމެވެ. ޖަންނަތު ނުވަތަ ސުވަރުގޭގެ ނިޢްމަތުގެ ވާހަކަ ދަންނަނީ ކިތައް މީހުން ހެއްޔެވެ؟ އެ ނިޢްމަތްތަކާއި ބެހޭ ގޮތުން މާތް ނަބިއްޔާ ޞައްލަﷲ ޢަލައިހި ވަސައްލަމް މި އުއްމަތަށް ޚަބަރު ދެއްވާފައިވާ ކަންތައްތައް ދަނެ އެ ސުވަރުގެ ހޯދަން މަސައްކަތް ކުރަނީ ކިތައް މީހުން ހެއްޔެވެ؟

މުސްލިމުންނޭވެ! ސުވަރުގެއަށް އެންމެ ފަހުން ވެއްދޭ މީހާގެ ވާހަކަ އަޑު އެހިން ހެއްޔެވެ؟ އެއީ ކޮންމެ މުސްލިމަކަށްވެސް އެނގުން ލާޒިމް ވާހަކައެއް ކަމަށް އަޅުގަނޑު ދެކެމެވެ. އެއީ ކީއްވެގެން ހެއްޔެވެ؟ ޖަވާބަކީ، އެއީ ސުވަރުގެއަށް އެންމެ ފަހުން ވައްދަވާ މީހާއަށް ދެއްވާ ނިޢްމަތުގެ ފުރިހަމަކަމާއި އެ ނިޢްމަތުގެ ބޮޑު ކަމެވެ. އެއްވެސް ހާލެއްގައި މުސްލިމުން މަސައްކަތް ކުރަންވީ އެންމެ ފަހުން ވަންނަ މީހާއަށް ވުމަކަށް ނޫނެވެ.  ނަމަވެސް ބަޔާންކޮށް ނަންގަންނަން މި އުޅޭ ހަދީޘްގައި މި ބަޔާންކޮށްފައި ވާ ނިޢްމަތްތަކުގެ ވާހަކަ ހިތަށް ގެނެސް ތިމާމެންގެ ދުނިޔަވީ ހަޔާތުގައި އާޚިރަތާއި މެދު ކުޑަކޮށްވެސް ވިސްނުމެއް ނުބަހައްޓައި އުޅޭ އުޅުން ބަދަލު ކުރަން ޖެހޭކަން އަމިއްލައަށް ދެނެގަންނަން ވީ އެވެ.

 قَالَ رَسُولُ اللَّهِ صلى الله عليه وسلم ‏ "‏ إِنَّ آخِرَ أَهْلِ الْجَنَّةِ دُخُولاً الْجَنَّةَ، وَآخِرَ أَهْلِ النَّارِ خُرُوجًا مِنَ النَّارِ رَجُلٌ يَخْرُجُ حَبْوًا فَيَقُولُ لَهُ رَبُّهُ ادْخُلِ الْجَنَّةَ‏.‏ فَيَقُولُ رَبِّ الْجَنَّةُ مَلأَى‏.‏ فَيَقُولُ لَهُ ذَلِكَ ثَلاَثَ مَرَّاتٍ فَكُلُّ ذَلِكَ يُعِيدُ عَلَيْهِ الْجَنَّةُ مَلأَى‏.‏ فَيَقُولُ إِنَّ لَكَ مِثْلَ الدُّنْيَا عَشْرَ مِرَارٍ ‏"‏‏.‏ (ޞަޙީޙުލް ބުޚާރީ: 7511)

ރަސޫލުއްﷲ ޞައްލަﷲ ޢަލައިހި ވަސައްލަމް ހަދީޘް ކުރެއްވިއެވެ. " ސުވަރުގޭގެ އަހުލުވެރިންގެ ތެރެއިން އެންމެ ފަހުން ސުވަރުގެއަށް ވަންނާނެ މީހާ އަދި ނަރަކައިގެ އަހުލުވެރިންގެ ތެރެއިން އެންމެ ފަހުން ނަރަކައިން ނުކުންނަ މީހާ ނިކުންނަހުށީ ބިންމަތީ ދެމެމުންނެވެ. ފަހެ އޭނާގެ ވެރި ރަސްކަލާނގެ އޭނާއަށް ދަންނަވާނެއެވެ. ސުވަރުގެއަށް ވަންނާށެވެ! ފަހެ އޭނާ ބުނާނެއެވެ. އޭ އަޅުގެ ވެރި ރައްބެވެ! ސުވަރުގެ ވަނީ ފުރިފައެވެ. ފަހެ އޭނާއަށް އެގޮތަށް ތިންފަހަރު އެންގެވޭނެއެވެ. އަދި އެ މީހާ ކޮންމެ ފަހަރަކުވެސް ސުވަރުގެ ވަނީ ފުރިފައި ކަމަށް، ހަމަ އެގޮތަށް ޖަވާބު ދޭނެއެވެ. ފަހެ އޭނާއަށް މާތް ﷲ ދަންނަވާނެއެވެ. ތިބާއަށް ދުނިޔޭގެ ދިހަ ގުނަ ދުނިޔެ ފަދަ ޖާގަ ވެއެވެ"

ވިސްނާށެވެ! މި ދުނިޔޭގެ މުހިންމު ކަން އާޚިރަތަށް ވުރެ ބޮޑު ކުރުމުގެ ބޭނުމަކީ ކޮބާ ހެއްޔެވެ؟ އާޚިރަތުގެ ދާއިމީ ގޮވައްޗެއްގެ ބަދަލުގައި ވަގުތީ ދުނިޔެއެއްގައި ތިބާގެ މުޅި ހަޔާތް ނިންމާލާނީ ހެއްޔެވެ؟ ﷲ އެއީ އެންމެ ދީލަތިވަންތަ ފަރާތެވެ. އެކަލާނގެ އަޅުންނަށް އެކަލާނގެ ތައްޔާރުކޮށްފައި ވަނީ ބާއްޖަވެރިކަމާއި ތާ އަބަދުގެ އުފަލެވެ. ދުނިޔެ މީ މުސްލިމުންގެ ހަޤީޤީ މަންޒިލް ކަމުގައި ދެކުމީ އެފަދަ މީހަކަށް ހެދޭނެ އެންމެ ބޮޑު ގޯހެވެ.