ކުޅިވަރު

ބައިގަރުނަށްވުރެ ގިނަ ދުވަހަށްފަހު ނިއުކާސްލްއިން ތައްޓެއް ހޯދައިފި

ބައިގަރުނަށްވުރެ ގިނަ ދުވަހަށްފަހު ނިއުކާސްލްއިން ތައްޓެއް ހޯދައިފި

ނިއުކާސްލް ޔުނައިޓެޑުން ކަރަބޯ ކަޕްގެ ތަށި އުފުލާލަނީ، ފޮޓޯ: ޕީއޭ

މިފްތާޙް މުޙައްމަދު

މިފްތާޙް މުޙައްމަދު

17 މާރިޗު 2025، 01:07

17 މާރިޗު 2025، 01:07

އިނގިރޭސި ލީގު ކަޕް ނުވަތަ ކަރަބޯ ކަޕްގެ ފައިނަލްގައި ނިއުކާސްލް ޔުނައިޓެޑުން ލިވަޕޫލް 2-1 ބަލިކޮށް، ބައިގަރުނަށް ވުރެ ގިނަ ދުވަހަށްފަހު އެ ކްލަބުން ތައްޓެއް ހޯދައިފިއެވެ. އަދި މިއީ 1955 ވަނަ އަހަރަށްފަހު އިނގިރޭސީ ފުޓުބޯޅަ އެސޯސިއޭޝަންގެ ޓްރޮފީއެއް އެ ކްލަބުން ހާސިލްކުރި ފުރަތަމަ ފަހަރު ވެސް މެއެވެ. އެ އަހަރު އެ ޓީމުން ކާމިޔާބުކުރީ އެފްއޭ ކަޕެވެ.

ވެމްބްލީ ސްޓޭޑިއަމްގައި ކުޅުނު ފައިނަލް މެޗުގައި ފުރަތަމަ ލީޑު ނެގީ ވެސް ނިއުކާސްލްއިންނެވެ. ފުރަތަމަ ހާފުގެ އިތުރު ވަގުތުގައި އެ ޓީމަށް ލިބުނު ކޯނަރެއް ކިއެރަން ޓްރިޕިއަރ ގޯލުގެ ކުރިމައްޗަށް ހުރަސްކޮށްލުމުން، ބޮލުން އެ ބޯޅަ ގޯލުގެ ތެރެއަށް ފޮނުވާލީ އިންގިރޭސީ ޤައުމީ ޓީމުން އަލަށް ފުރުސަތު ހޯދި ޑެން ބާންއެވެ. 

އެ ޓީމުން ލީޑު ފުޅާކުރީ ފުރަތަމަ ހާފުގެ ހަތްވަނަ މިނެޓުގައެވެ. އިތުރު ކޯނަރަކުން އެލެކްސެންޑަރ އިސާކް ކާމިޔާބުކުރި ގޯލެއް އޮފްސައިޑްކަމަށް ނިންމިތަނާ އެއް މިނެޓު ފަހުން، އެ ޓީމުގެ ލީޑު ފުޅާކޮށްދިނީ ވެސް އިސާކްއެވެ. ނިއުކާސްލްގެ ވާތް ފަރާތުން ހުރަސްކޮށްދިން ބޯޅައެއް، ޖެކޮބް މާރފީ ބޮލުން އިސާކްއަށް ކުޅެލުމުން، އެ ބޯޅަ ގޯލުގެ ތެރެއަށް އޭނާ ފޮނުވާލީ ފަސޭހަކަމާއެކުއެވެ.

މެޗުގެ ނަތީޖާ އަނބުރާލުމަށް ލިވަޕޫލުން ކުރަމުން ދިޔަ މަސައްކަތަށް ކާމިޔާބު ނުކުރެވުނަސް، މެޗުގެ އިތުރު ވަގުތުގައި އެ ޓީމުގެ އިޓަލީ ފޯވާޑް، ފެޑެރިކޯ ކިއޭސާ ވަނީ ގޯލެއް ކާމިޔާބުކޮށްފައެވެ.

މިއީ މި ސީޒަންގައި ގިނަ ތަށިތަކެއް ހޯދާނެކަމަށް ޤަބޫލުކުރެވުނު ލިވަޕޫލުގެ އަތުން މި ހަފްތާތެރޭގައި ބީވެގެން ދިޔަ ދެވަނަ ތައްޓޭ ވެސް ބުނެވިދާނެއެވެ. މިދިޔަ އަންގާރަ ދުވަހުގެރޭ ޗެމްޕިއަންސް ލީގުން އެ ޓީމު ކެޓިއިރު، އެ މުބާރާތުގެ ގްރޫޕް ފޭސްގައި އެއްވަނަ ހޯދާފައިވަނީ ލިވަޕޫލެވެ. ނަމަވެސް ގަދަ-16ގެ ބުރުގައި ޕެރިސް-ސެއިންޓް ޖަމެއިން، ޕީއެސްޖީއާ ބައްދަލުކުރި މެޗުގެ އެގްރިގެޓް ސްކޯރ އެއްވަރުވުމުން، ޕެނަލްޓީ ޖަހައިގެން އެ މެޗު ކާމިޔާބުކޮށްފައި ވަނީ ޕީއެސްޖީއެވެ. 

ކަރަބޯ ކަޕުން ނިއުކާސްލް މި ހޯދި ކާމިޔާބަކީ އެ ޓީމުން ތައްޓެއް ހޯދުމަށް ކުރަމުން ދިޔަ ދިގު އިންތިޒާރެއްގެ ނިމުމެވެ. މީގެ 70 އަހަރުކުރިން އެންމެ ފަހުން އެފްއޭ ކަޕް ކާމިޔާބުކުރި ފަހުން އެ ޓީމު ޖެހިޖެހިގެން 9 ފަހަރު އެ މުބާރާތުގެ ފައިނަލުން ބަލިވެފައި ވެސް ވެއެވެ.  

މި ލިޔުން ކިޔާލުމުން

Ads by MSS