ލުބްނާންއަށް އިޒްރާއިލުން ދެމުންދާ ހަމަލާތަކުގައި ޝަހީދުވިމީހުންގެ ޢަދަދު 700އަށް އަރައިފި!

އިޒްރާއިލުން ލުބްނާނަށް މިދިޔަ ހޯމަދުވަހުން ފެށިގެން ދެމުންދާ ހަމަލާތަކުގައި ޝަހީދުވިމީހުންގެ ޢަދަދު 700އަށް އަރައިފިކަމަށް އަލްޖަޒީރާއިން ބުނެފިއެވެ. 

އިޒްރާއިލުން ލުބްނާނަށް ދިން ހަމަލާތަކުގެ ތެރެއިން ހަމަލާއެއްގައި އެއްއާއިލާއެއްގެ ނުވަ މެމްބަރަކު ވަނީ ޝަހީދުވެފައެވެ. އޭގެ ތެރޭގައި ހަތަރު ކުޑަކުދިން ހިމެނޭކަމަށް އަލްޖަޒީރާގައި ބުނެފައިވެއެވެ. 

ބައިނަލްއަޤްވާމީ ދުނިޔެއިން ލުބްނާނަށް ދެމުންދާ ހަމަލާތައް ހުއްޓާލުމަށް އިޒްރާއިލަށް ގޮވާލަމުންދާއިރު އިޒްރާއިލުން ވަނީ ފާޅުގައި އެކަމަށް ދެކޮޅު ހަދައިފައެވެ. 

އިޒްރާއިލުން ލުބްނާނަށް ދެމުންދާ ނުރައްކާތެރި ހަމަލާތަކުގެ ސަބަބުން ލުބްނާންގައި ތިބި ބޭރުގެ ޤައުމުތަކުގެ މީހުން ލުބްނާނުން ބޭރުކުރުމަށް އެޤައުމުތަކުން ވަނީ މަސައްކަތް ފަށައިފައެވެ.

އެގޮތުން ފިލިޕީންސް އިން ވަނީ ލުބްނާންގައި ދިރިއުޅޭ ހާހަކަށްވުރެ ގިނަ ފިލިޕީންސްގެ ރައްޔިތުން ނެރުމަށް ތައްޔާރުވެފައެވެ. މީގެއިތުިރުން ޖަޕާނުގެ ސަރުކާރުން ވެސްވަނީ ލުބްނާންގައި ތިބި ޖަޕާނުގެ ރައްޔިތުން އެޤައުމުން ބޭރުވުމަށް އަންގައިފައެވެ. 

އިޒްރާއިލުން ލުބްނާނަށް ދެމުންދާ ހަމަލާތަކުގެ ރައްދެއްގެ ގޮތުން ލުބްނާންގެ ހިޒްބުއްﷲ އިންވެސް ދަނީ ޖަވާބުގައި އިޒްރާއިލަށް ހަމަލާތައް ދެމުންނެވެ. 

ހިޒްބުއްﷲ އިން ބުނެފައިވަނީ އިޒްރާއީލުގެ އިރުއުތުރުގެ ސިޓީއަށް ދެ ވަޒަން މިސައިލް އަމާޒުކޮށް ޖަހާފައިވާ ކަމަށެވެ. 

ޓެލެގްރާމްގައި ހިޒްބުއްﷲ އިން ކުރި ޕޯސްޓެއްގައި ބުނެފައިވަނީ މި ހަމަލާތަކަކީ އިޒްރާއީލުން ލުބުނާނުގެ ރަށްތަކަށާއި އާންމުންނަށް ދިން ބާރުގަދަ ހަމަލާތަކުގެ ބަދަލު ހިފުން ކަމަށެވެ.

 ޓިބެރިއަސްއަށް ދިން ހަމަލާތަކުގައި މަދުވެގެން އެކަކު ޒަޚަމްވެފައިވާއިރު، ވެއްޓިފައިވާ މިސައިލްތަކުން މީހުންގެ ގައިގައި ޖެހި އަނިޔާވެފައިވާ ކަމަށް އިޒްރާއިލްގެ ލޯކަލް ނޫހެއް ކަމަށްވާ ދަ ޓައިމްސް އޮފް އިޒްރާއިލުން ބުނެފައިވާކަމަށް އަލްޖަޒީރާގައި ވަނީ ބުނެފައެވެ.