ސްޕެއިންގެ ޤައުމީ ޓީމުގައި ރޯދަ ހިފާ ފުރަތަމަ ކުޅުންތެރިއަކަށް ޔަމާލް

ޔޫއެފާ ނޭޝަންސް ލީގުގެ މެޗަކަށް ސްޕެއިންގެ ޤައުމީ ޓީމު ތައްޔާރުވަމުން އަންނައިރު، ރޯދަ ހިފުން މެދުކަނޑާނުލައި އެ ޓީމުގެ ތާރީހުގައި ވެސް މުޅިން އަލަށް ރޯދަ ހިފާ ކުޅުންތެރިއަކަށް ލެމިން ޔަމާލް ވެއްޖެއެވެ.

އަރިމަތިން ކުރިޔަށް ކުޅެމުން އަންނަ އުމުރުން 16 އަހަރުގެ ޔަމާލް މި ގޮތުގައި ދެމި ހުންނަން ނިންމިއިރު، މިއީ މުސްލިމުންނަސް ވާޖިބު އަޅުކަމެއް ވެސް މެއެވެ.

ރޯދައާ ގުޅިގެން ޔަމާލް ބުނީ، އޭނާ ފަތިހު 4 ޖަހާއިރު ހޭލާކަމަށާއި، އަދި ރޯދައަށް ހުރި ނަމަވެސް، ކަނޑައެޅިފައިވާ ރޫޓިންއާ އެއްގޮތަށް ޓީމުގެ ކުޅުންތެރިންނާއެކު މުޅި ދުވަސް ހޭދަކުރާ ކަމަށެވެ.

"ކެއުމަށްޓަކައި ކޮންމެ ރެއެއްގެ ފަތިހު 4 ޖަހާއިރު އަހަރެން ހޭލަން. އަދި އެއަށްފަހު ޓީމު އެހެން ކުޅުންތެރިންނެކޭ އެއްގޮތަށް، ކަނޑައެޅިފައިވާ ރޫޓިންގައި މުޅި ދުވަސް ހޭދަކުރަނީ ޓީމާއެކު. އަހަރެން ޓީމާއެކު ދުވާލު ގަނޑީގައި ނުކުރާ ހަމައެކަނި ކަމަކީ ކެއުން." ޔަމާލް ބުންޏެވެ.

ރިޕޯޓުތައް ބުނާ ގޮތުން، ބާސެލޯނާގައި ވެސް ޔަމާލްއަށް ވަނީ އެހެން ކުޅުންތެރިންނާ ތަފާތު ޑައިޓެއް ކަނޑައަޅާފައެވެ. ނަމަވެސް މިއީ ބާސެލޯނާއަށް އައުކަމެއް ނޫނެވެ. މީގެ ކުރިން އެ ޓީމުގައި ހިމެނުނު ރޯދަ ހިފާ ކުޅުންތެރިންގެ ތެރޭގައި އޮސްމަން ޑެމްބެލޭ އާއި ފްރެންކް ކެސީ ހިމެނެއެވެ. 

ބައެއް ރިޕޯޓުތައް ބުނާ ގޮތުން ޔަމާލް ރޯދަ ދޫކޮށްލަނީ ހަމައެކަނި މެޗު ކުޅޭ ދުވަހެވެ.

ނޭޝަންސް ލީގުގައި ބުރާސްފަތި ދުވަހުގެރޭ ސްޕެއިން ނިކުންނާނީ ނެދަލޭންޑްސްއާ ދެކޮޅަށެވެ. 

ޔޫރަޕްގެ ގިނަ ލީގުތަކާއި، ޤައުމީ ޓީމުތަކުގައި ވެސް މިހާރު މުސްލިމް ކުޅުންތެރިންގެ ދީނީ މުހިންމު ވާޖިބުތައް އަދާކުރުމަށް އެއްބާރުލުންދެއެވެ. އެގޮތުން އިރުއޮއްސޭ ވަގުތު ކުޅޭ މެޗުތަކުގައި ރޯދައަށް ތިބޭ ކުޅުންތެރިން ރޯދަ ވީއްލުމަށް މެޗު މެދުކަނޑާލައެވެ.