Ads by Exprox

ޚަބަރު

މާލޭގެ މަގުތަކުގެ ކާނުތައް ސާފުކުރުމުގެ މަސައްކަތް ކުރިއަށް: މަޖީދީމަގުގެ ބޮޑުބައެއް ސާފުކޮށް ނިމިއްޖެ

މާލޭގެ މަގުތަކުގެ ކާނުތައް ސާފުކުރުމުގެ މަސައްކަތް ކުރިއަށް: މަޖީދީމަގުގެ ބޮޑުބައެއް ސާފުކޮށް ނިމިއްޖެ

މާލޭގެ މަގުތަކުގެ ކާނުތައް ސާފުކުރުމުގެ މަސައްކަތް ފޮޓޯ:ވުޒާރާ

އާމިނަތު ޔުމްނާ

އާމިނަތު ޔުމްނާ

22 މާރިޗު 2025، 01:16

22 މާރިޗު 2025، 01:16

މާލޭގެ މަގުތަކުގެ ކާނުތައް ސާފުކުރުމުގެ މަސައްކަތް ކުރިއަށްދާއިރު، މަޖީދީމަގުގެ އޮލިމްޕަހުން ފެށިގެން ރަސްފަންނާ ހަމައަށް ދެފަރާތުގައިވާ ކާނުތައް ސާފުކޮށް ނިމިފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން މިއަދު ހާމަކޮށްފިއެވެ.

މި މަސައްކަތް ފެށިފައިވަނީ މިމަހުގެ 8 ވަނަ ދުވަހު ލަގްޒަރީ ކުރިމަތިންނެވެ. މިއަދު މި މަސައްކަތް ކުރިއަށްދާނީ މަޖީދީމަގުގެ އޮލިމްޕަހުން ފެށިގެން ހެންވޭރާ ދިމާއަށް ކަމަށް އެ ވުޒާރާއިން ބުނެފައިވެއެވެ. ރަމަޟާން މަހު މި މަސައްކަތް ކުރަމުންދަނީ ކޮންމެ ދުވަހެއްގެ ހެނދުނު 9:00 އިން މެންދުރުފަހު 2:00 އަށެވެ.

ވާރޭވެހި ފެންބޮޑުވުމުގެ ސަބަބުން މާލޭގައި ދިރިއުޅޭ ފަރާތްތަކަށް ދިމާވާ އުނދަގޫތައް ކުޑަކުރުމުގެ ގޮތުން މި މަސައްކަތް ކުރަމުންދާއިރު، މި މަސައްކަތް ނިމުމުން ވާރޭވެހި މާލޭގައި ފެންބޮޑުވާ މައްސަލައަށް ކޮންމެވެސް ވަރެއްގެ ހައްލެއް ލިބޭނެ ކަމަށް އެ ވުޒާރާއިން ބުނެފައިވެއެވެ. އަދި މި މަސައްކަތް 6 މަސްދުވަހުގެ ތެރޭގައި ނިންމާލެވޭނެ ކަމަށްވެސް އެ ވުޒާރާއިން މީގެ ކުރިން ވަނީ ބުނެފައެވެ.

މާލޭގެ މަގުތަކުގައި ފެންބޮޑުވާ މައްސަލައަކީ މާލެއަށް ދިމާވެފައިވާ އެންމެ ބޮޑު އެއް މައްސަލައެވެ. ފެންބޮޑުވުމަށް ދިމާވާ މައިގަނޑު އެއް ސަބަބަކީ ކާނުތައް ބެދި ފެން ނުހިނދުމެވެ. ކުނިބުނީގެ ސަބަބުން ގިނަ މަގުތަކުގެ ކާނުތައް ފުރިބާރުވެފައިވާކަން ކާނުތައް ސާފުކުރަމުން އަންނައިރު ދަނީ ފާހަގަކުރެވެމުންނެވެ.



ވާރޭވެހި ފެންބޮޑުވާ ކޮންމެ ފަހަރަކު މައްސަލަ ހައްލުކުރަނީ ސިފައިންނާއި ފުލުހުންނާއި ސިޓީތަކާ ބެހޭ ވުޒާރާގެ އާންމު މަސައްކަތްތަކާ ބެހޭ ޔުނިޓުގެ މުވައްޒަފުން ނިކުމެ ފެން ހިންދުމުގެ މަސައްކަތް ކޮށްގެންނެވެ.

މާލޭގެ މަގުތަކުގައި ފެންބޮޑުވުމުގެ މައްސަލަ ހައްލުކުރުން ހިމެނޭހެން މަގުތަކުގެ ހުރިހާ މައްސަލައެއް ހައްލުވާނެގޮތަށް ޒަމާނީ ފެންވަރަށް މަގުތައް ތަރައްޤީކުރުމުގެ މަސައްކަތް މިއަހަރު ކުރިއަށް ގެންދިއުމަށް ސަރުކާރުން ވަނީ ނިންމާފައެވެ. މި މަސައްކަތް ކުރަނީ ޗައިނާގެ ކުންފުންޏަކުންނެވެ.
                    

މި ލިޔުން ކިޔާލުމުން

Ads by MSS