ވިޔަފާރި / ޚަބަރު

ރަށު ފަތުރުވެރިކަން އިސްތިހާރުކުރަން ޚާލިދުގެ މިސްރާބު ރާއްޖެއަށް

ރަށު ފަތުރުވެރިކަން އިސްތިހާރުކުރަން ޚާލިދުގެ މިސްރާބު ރާއްޖެއަށް

މެދުއިރުމަތީގެ މަޝްހޫރު އިންފްލުއެންސަރ ޚާލިދު އަލް އަމެރީ ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

22 މާރިޗު 2025، 07:31

22 މާރިޗު 2025، 07:31

ރާއްޖޭގެ ރަށު ޓޫރިޒަމާއި ރަށްރަށުގެ ދިރިއުޅުމުގެ ވީޑިއޯތަކެއް ހަދަން، މެދުއިރުމަތީގެ މަޝްހޫރު އިންފްލުއެންސަރ ޚާލިދު އަލް އަމެރީ މިއަދު ރާއްޖެ ގެނެސްފިއެވެ. މި ދަތުރުގައި އޭނާ ޚާއްޞަކޮށް އަމާޒުކުރަނީ ރާއްޖޭގެ ގެސްޓްހައުސް ވިޔަފާރި އިސްތިހާރުކުރުމަށެވެ.

ޔޫއޭއީއަށް އުފަން ޚާލިދު ރާއްޖެ އަންނަކަން އޭނާ ވަނީ ސޯޝަލް މީޑިއާގައި އާންމުކޮށް އިޢުލާނުކޮށްފައެވެ. ރާއްޖޭގެ ޓޫރިޒަމް އިސްތިހާރުކުރާ ސަރުކާރު ކުންފުނި އެމްއެމްޕީއާރުސީގެ އިސް ވެރިއަކު މަޢުލޫމާތު ދެއްވާފައިވާ ގޮތުގައި، ދުނިޔޭގެ ގިނަ ބަޔަކު، ޚާއްޞަކޮށް މެދުއިރުމަތީގައި ބޮޑު މަޤުބޫލުކަމެއް ހޯދާފައިވާ ޚާލިދު، މިމަހުގެ 26 ވަނަ ދުވަހުގެ ނިޔަލަށް ރާއްޖޭގައި ހަރަކާތްތެރިވާނެއެވެ.

މި މުއްދަތުގައި އޭނާ ރާއްޖޭގެ އާބާދީ ބޮޑު އެއް ރަށް ކަމަށްވާ ލ. އަތޮޅާއި ބައެއް އެހެން ހިސާބުތަކުގައި ހަރަކާތްތެރިވާނެއެވެ. ޚާލިދު ލާމުގައި ހޭދަކުރާ މުއްދަތުގައި ޚާއްޞަ ގިނަ ސިފަތަކެއް ލިބިފައިވާ ލ. އަތޮޅުގެ ރަށްތަކުގެ އާންމު ދިރިއުޅުމާއި އިސްލާމީ ސަގާފަތް އަދި ރޯދަމަހުގެ ވައްޓަފާޅި ހުންނަގޮތް ޑޮކިއުމެންޓްކުރާނެއެވެ.

ޚާލިދު މީގެ ކުރިން ވެސް ރާއްޖެ އައިސްފައިވެއެވެ. އޭނާ ވަނީ 2020 ވަނަ އަހަރު ކުރީގެ އަނބިކަނބަލުން ސަލްމާއާއެކު ތާޖު އެގްޒޯޓިކާގައި ޗުއްޓީ ހޭދަކޮށްފައެވެ. އެފަހަރު އޭނާ ރާއްޖެ އައި ސަބަބެއްގެ ގޮތުގައި ބުނެފައިވަނީ މަސައްކަތުން ހުސްވަގުތުކޮޅެއް ނެގުމަށް ކަމަށެވެ.

ޚާލިދު އަލް އަމެރީއަކީ ސޯޝަލް މީޑިއާގައި ނުފޫޒު ގަދަ ޝަޚްޞިއްޔަތެކެވެ. އޭނާ ދަނީ ދުނިޔޭގެ އެކި ޤައުމުތަކަށް ގޮސް އެ ޤައުމުތަކާ ބެހޭ ގޮތުން ވީޑިއޯތައް ހަދަމުންނެވެ.  ޚާލިދު އަލް އަމެރީގެ އިންސްޓަގްރާމްގައި 3.2 މިލިއަނަށްވުރެ ގިނަ ފޮލޯވަރުން ތިބިއިރު، އޭނާގެ ޔޫޓިއުބް ޗެނަލްއަށް ސަބްސްކްރައިބްކޮށްފައި ވާ މީހުންގެ އަދަދު ފަސް މިލިއަނަށްވުރެ ގިނައެވެ. މީގެ އިތުރުން ފޭސްބުކްގައި އަށް މިލިއަނަށްވުރެ ގިނަ ފޮލޯވަރުން އެބަތިއްބެވެ.

ރާއްޖޭގެ ރަށު ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުން މި ނިންމުމަށް މަރުޙަބާ ކިޔާފައިވެއެވެ. އެފަރާތްތަކުން ދެކޭގޮތުގައި ޚާލިދު ފަދަ ބޮޑު އޯޑިއަންސްއެއް އޮތް އިންފްލުއެންސަރެއް ރާއްޖެ ގެނައުމަކީ ރާއްޖޭގެ ޓޫރިޒަމަށް ވަރަށް ބޮޑު ކުރިއެރުމެއް ލިބިގެންދާނެ ކަމެކެވެ.

ޚާއްޞަކޮށް މެދުއިރުމަތީގެ މާކެޓަށް އަމާޒުކޮށްގެން މިއީ ވަރަށް މުހިންމު ކަމެއް ކަމަށް ރަށު ފަތުރުވެރިކަމުގެ ދާއިރާގައި އުޅޭ ބައެއް ފަރާތްތަކުން ވަނީ ފަރުދުން މީޑިއާއަށް މައުލޫމާތު ދީފައެވެ.  މެދުއިރުމަތީގެ ފަތުރުވެރިންނަކީ ރާއްޖޭގެ ޓޫރިޒަމަށް ވަރަށް މުހިންމު މާކެޓެކެވެ. އަދި ޚާލިދު މެދުވެރިކޮށް ރާއްޖޭގެ ރީތިކަމާއި،  ރާއްޖެއަކީ މެދުއިރުމަތީގެ ފަތުރުވެރިންނަށް އެކަށީގެންވާ މަންޒިލެއްކަން ދެއްކުމަކީ މުހިންމު ކަމެއްކަންވަނީ ފާހަގަކޮށްފައެވެ.


                    


                    

މި ލިޔުން ކިޔާލުމުން

Ads by MSS