ޚަބަރު
މާލެއާއި ހުޅުމާލެ ގުޅާލާ ފެނުގެ ވިއުގަ ޓެސްޓްކުރަން ފަށައިފި

މާލެއާއި ހުޅުމާލެ ގުޅާލާ ފެނުގެ ވިއުގަ ފޮޓޯ:އެޑިޝަން
މާލެއާއި ހުޅުމާލެއާ ދެމެދު މީރު ފެން ދައުރުކުރެވޭ ގޮތަށް ޤާއިމުކުރާ ފެނުގެ ވިއުގަ ޓެސްޓްކުރުމުގެ މަސައްކަތް މާލޭ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިޔުއެސްސީ) އިން ފަށައިފިއެވެ.
2018 ވަނަ އަހަރު ހުޅުވުނު ސިނަމާލެ ބްރިޖުގެ އަރިމަތީގައި މާލެއާއި ހުޅުމާލެއާ ދެމެދު މީރު ފެން ދައުރުކުރެވޭ ގޮތަށް އަޅާފައިވާ ހޮޅި ބޭނުންކޮށްގެން، މި ދެ ރަށް ފެނުގެ ވިއުގައަކުން ގުޅާލުމުގެ މަސައްކަތް 2018 ވަނަ އަހަރު ފެށުނެވެ. ނަމަވެސް މިދިޔަ ފަސް އަހަރު ތެރޭގައި މި މަސައްކަތް އެދެވޭ ގޮތެއްގައި ކުރިއަށް ގޮސްފައެއް ނުވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު، މި ސަރުކާރުން އިސްނަގައިގެން ފެނުގެ ވިއުގައިގެ މަސައްކަތް އަލުން ފަށާފައިވެއެވެ. މިހާރު މި މަސައްކަތް ނިމުމަކާ ވަރަށް ކައިރިވެފައިވާކަން އެމްޑަބްލިޔުއެސްސީން ހާމަކޮށްފައިވެއެވެ.
އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލް މަތީން މުޙައްމަދު ވިދާޅުވި ގޮތުގައި، ފެނުގެ ވިއުގަ ޤާއިމުކުރުމަށް ބޭނުންކުރާ ހޮޅި ސާފުކޮށް، ދެ ކޮޅުން މިހާރު ވަނީ ގުޅާލާފައެވެ. އަދި ވަގުތީ ގޮތުން ޓެސްޓްކުރުމުގެ މަސައްކަތް ފަށާފައިވާ ކަމަށާއި މިހާރު 3000 ޓަނުގެ ފެން ދައުރުކުރެވޭ ކަމަށް އޭނާ ވިދާޅުވިއެވެ. މި މަސައްކަތް ފުރިހަމަވުމުން، 20،000 ޓަނުގެ ފެން އެއް ރަށުން އަނެއް ރަށަށް ދައުރުކުރެވޭނެ ކަމަށްވެސް މަތީން ހާމަކުރެއްވިއެވެ.
މި މަޝްރޫޢުގެ ދަށުން ޕަމްޕް ސްޓޭޝަނެއް ޤާއިމުކުރަން ޖެހޭ ކަމަށާއި، އޭގެ އިމާރާތުގެ މަސައްކަތް އަންނަ މަހު ނިމޭނެ ކަމަށް މަތީން ވިދާޅުވިއެވެ. އަދި ޕަމްޕް ސްޓޭޝަން ނިމުމުން ޕަމްޕްތައް ބަހައްޓައި، އެ ތަނުގެ ކަރަންޓު ވިއުގަ އަޕްގްރޭޑް ކުރަންޖެހޭނެ ކަމަށްވެސް އޭނާ ފާހަގަކުރެއްވިއެވެ.
އެމްޑަބްލިޔުއެސްސީން އަމާޒު ހިފާފައިވަނީ މި އަހަރުގެ މެދުތެރޭ، ޖުލައި ނުވަތަ އޮގަސްޓް މަހު، ފެނުގެ ވިއުގައިގެ ޚިދުމަތް ފެށުމަށެވެ. މި ވިއުގައިގެ މައިގަނޑު ބޭނުމަކީ ފެނުގެ ރައްކާތެރިކަން މާލެ ސަރަޙައްދުގައި ކަށަވަރުކުރުމެވެ. މިގޮތުން، މާލެ ނުވަތަ ހުޅުމާލޭގައި ފެން ފޯރުކޮށްދިނުމަށް މައްސަލައެއް ދިމާވެއްޖެނަމަ، އެއް ރަށުން އަނެއް ރަށަށް ފަސޭހަކަމާއެކު ފެން ފޯރުކޮށްދެވޭނެއެވެ.