މަސްތުވާތަކެތީގެ ބޮޑު ޝިޕްމަންޓަކާއެކު 10 ބިދޭސީން ހައްޔަރުކޮށްފި

ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރިކުރި ކަމުގެ ތުހުމަތުގައި 10 ބިދޭސީއަކު ހައްޔަރުކޮށްފިއެވެ. މި މީހުން ހައްޔަރުކޮށްފައިވަނީ 2025 މާރިޗް 21 ވަނަ ދުވަހުގެ ދަންވަރު ހިންގުނު ޖޮއިންޓް އޮޕަރޭޝަނެއްގައި މާލެ ސަރަހައްދުން ބޯޓެއް ބަލައި ފާސްކުރުމަށްފަހުއެވެ.

ދިވެހި ފުލުހުންގެ ޚިދުމަތަށް ލިބުނު މަޢުލޫމާތަކާ ގުޅިގެން ކުރިއަށް ގެންދެވުނު މި އޮޕަރޭޝަނުގައި މޯލްޑިވްސް ނެޝަނަލް ޑިފެންސް ފޯސް އަދި މޯލްޑިވްސް ކަސްޓަމްސް ސަރވިސްވެސް ބައިވެރިވިއެވެ. އޮޕަރޭޝަނުގައި މަސްތުވާތަކެތި ކަމަށް ތުހުމަތުކުރެވޭ 7 ކިލޯއަށްވުރެ ގިނަ ތަކެތި ހޯދާފައިވެއެވެ.

ހައްޔަރުކުރެވުނު މީހުންގެ ތެރޭގައި އިންޑޮނޭޝިއާގެ 3 ރައްޔިތުންނާއި އިންޑިއާގެ 7  ރައްޔިތުން ހިމެނެއެވެ. މީގެ ތެރެއިން 5 މީހަކު 5 ދުވަހަށް އަދި 5 މީހަކު އެއް ދުވަހަށް ބަންދުކުރުމަށް ކޯޓުން އަމުރުކުރިއެވެ. އެއް ދުވަހަށް ބަންދުކުރެވުނު 5 މީހުންގެ ތެރެއިން އެކަކު އިތުރު 3 ދުވަހަށް އަދި 4 މީހުން 15 ދުވަހަށް ބަންދުކުރުމަށް  ފަހުން އަމުރުކޮށްފައިވެއެވެ.

މި މައްސަލައިގެ ތަޙްޤީޤު ދިވެހި ފުލުހުންގެ ޚިދުމަތުން ދަނީ ކުރިއަށް ގެންދަމުންނެވެ.