ދިވެހިރާއްޖޭގެ ޤުދުރަތީ ރީތިކަން ދައްކުވައިދޭ ފޮޓޯގްރަފީ މުބާރާތެއްގައި ބައިވެރިވުމުގެ ފުރުސަތު ހުޅުވާލައިފި

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުން މިއަހަރުގެ ވައިލްޑް ލައިފް ދުވަހާ ގުޅުވައިގެން ފޮޓޯގްރަފީ މުބާރާތެއް ހުޅުވާލައިފިއެވެ. މި މުބާރާތުގެ މައިގަނޑު މަޤްޞަދަކީ ދިވެހިރާއްޖޭގެ މުއްސަނދި ތިމާވެއްޓާއި ޤުދުރަތީ ރީތިކަން ފޮޓޯއިން ދައްކުވައިދިނުމާއި، ދިވެހިރާއްޖޭގެ ދިރުންތަކާއި އެތަކެތީގެ ވެށްޓާމެދު ހޭލުންތެރިކަން އިތުރުކުރުމެވެ.

މި މުބާރާތުގައި ބައިވެރިވެވޭނީ ހަމައެކަނި ދިވެހި ރައްޔިތުންނަށެވެ. މުބާރާތުގައި ފޮޓޯ ހުށަހެޅުމަށް ހުޅުވާލާފައިވަނީ 'ވައިލްޑްލައިފް'، 'އޭރިއަލް (ޑްރޯން)'، އަދި 'ހެބިޓެޓްސް' މި ތިން ދާއިރާއަށެވެ. ކޮންމެ ދާއިރާއަކުންވެސް ވަކިން ވަނަ ހޮވައި، ޑްރޯން އަދި ކެމެރާ ފަދަ އަގުހުރި އިނާމުތައް ދިނުމަށް ވަނީ ހަމަޖެހިފައެވެ.

މުބާރާތުގައި ހުށަހެޅޭ ފޮޓޯތައް ވަޒަންކުރާނީ ފޮޓޯގެ ފަންނީ ފެންވަރު، ކޮމްޕޮޒިޝަން، ފޮޓޯއިން ދޭ މެސެޖު، އަޚްލާޤީ މިންގަނޑުތައް، އަދި މުބާރާތުގެ ތީމާއާ ގުޅޭ މިންވަރަށް ބަލައިގެންނެވެ. އަދި ހުށަހަޅާ ފޮޓޯއަކީ ދިރޭތަކެއްޗާއި އެތަކެތީގެ މާހައުލަށް ގެއްލުމެއް ނުވަތަ އުނދަގުލެއް ވާފަދަ ގޮތަކަށް ނަގާފައިވާ ފޮޓޯއަކަށް ވެގެން ނުވާނެކަމަށް ފަތުުވެރިކަމާއި ބެހޭ ވުޒާރާއިން ވަނީ ހާމަކޮށްފައެވެ.

މިމުބާރާތުގައި ހޮވާލެވޭ އެންމެ މޮޅު 10 ފޮޓޯ ދެއްކުމަށް ފޮޓޯ މައުރަޒެއް ބޭއްވުމާއެކު، 'އީ-ބުކްލެޓެއްގައި' ޝާއިޢުކުރުމަށް ހަޖެހިފައިވާކަމަށް ވުޒާރާއިން މައުލޫމާތުދެއެވެ.

ފޮޓޯ ހުށަހެޅުމުގެ ސުންގަޑިއަކީ 2025 އޭޕްރީލް 3 ވާ ދުވަހުގެ މެންދުރު 12:00 އެވެ. ފޮޓޯތައް ފޮނުވަން ޖެހެނީ [email protected] އަށެވެ. މުބާރާތާ ގުޅޭ އިތުރު މަޢުލޫމާތު މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ވެބްސައިޓުން ލިބިވަޑައިގަންނަވާނެ ކަމަށް އެވުޒާރާއިން ވަނީ ބުނެފައެވެ.