ޢީދު އަލިން ރަށްތައް ދިއްލާލުމަށް ބޭނުންވާ ސާމާނު މާދަމާއިން ފެށިގެން ފޮނުވަން ފަށަނީ

ފިތުރު ޢީދަށް ރާއްޖޭގެ ރަށްތައް ދިއްލުމަށްޓަކައި ބޭނުންވާ ލައިޓުތައް މާދަމާއިން ފެށިގެން ރަށްތަކަށް ފޮނުވުމުގެ މަސައްކަތް ފަށާނެ ކަމަށް ސިޓީތަކާއި އިދާރީދާއިރާތަކާއި އާންމު މަސައްކަތްތަކާބެހޭ ވުޒާރާއިން ވިދާޅުވެއްޖެއެވެ.

"ޢީދު އަލި" ގެ ނަމުގައި ރާއްޖޭގެ ރަށްތައް ދިއްލުމުގެ ހަރަކާތް ފެށުނީ މިދިޔަ އަހަރުއެވެ. މިދިޔަ އަހަރު މި ހަރަކާތް ކުރިއަށްގެންދިޔައީ މާލެ ސަރަހައްދުގެ އިތުރުން އަތޮޅުތަކުގެ ވެރިކަން ކުރާ ރަށްރަށުގައެވެ. ނަމަވެސް މިއަހަރު އިތުރު 36 ރަށެއްގައިވެސް މި ހަރަކާތް ކުރިއަށްގެންދިއުމަށް ސަރުކާރުން ވަނީ ނިންމަވާފައެވެ.

މާލެ ދިއްލުމުގެ މަސައްކަތްތައް މިހާރުވެސް ދަނީ ކުރިއަށެވެ. މާބަގީޗާތަކާއި ޢީދުގެ އެކި ޝިއާރުތައް ފެންނަގޮތަށް ފަރުމާކޮށްފައިވާ ލައިޓުތަކާއި، ގިޑިގެތައް ބޮޑެތި މަގުތަކާއި ގިނައިން އާންމުން އެއްވާ ސަރަހައްދުތަކުގައި ދަނީ ހަރުކުރަމުންނެވެ.

މިއަހަރު އަލަށް ދިއްލާ ރަށްތަކުގެ ތެރޭގައި ހއ. ހޯރަފުށި، ހދ. ނޮޅިވަރަމް، ށ. މިލަންދޫ، ނ. ވެލިދޫ، ރ. އަލިފުށި، ބ. ތުޅާދޫ، ޅ. ހިންނަވަރު، ކ. ކާށިދޫ، އއ. ތޮއްޑޫ، އދ. މާމިގިލި، ވ. ކެޔޮދޫ، މ. މުލައް، ފ. ބިލެއްދޫ، ދ. މީދޫ، ތ. ތިމަރަފުށި، ލ. ގަން، ގއ. ދާންދޫ އަދި ގދ. ގައްދޫ ހިމެނެއެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއިން ވިދާޅުވީ މި ރަށްތައް ދިއްލަން ބޭނުންވާ ސާމާނު މާދަމާއިން ފެށިގެން ފޮނުވަން ފަށާނެކަމަށެވެ. ރަށްރަށަށް ސާމާނު ގެންދިއުމުގެ މަސައްކަތް ކުރަމުންދާނީ ސްޓެލްކޯއިން ކަމަށްވެސް އެ ވުޒާރާއިން ވިދާޅުވިއެވެ.

ޢީދަށް ރަށްތައް ދިއްލުމުގެ ރަސްމިއްޔާތު ބޭއްވުމަށް ސަރުކާރުން ނިންމަވާފައިވަނީ މި މަހުގެ 29ވަނަ ދުވަހުގެ ރޭގައެވެ. އެ ދުވަހަށް ހުރިހާ ރަށަކަށް ސާމާނު ގެންގޮސް ހުރިހާ ރަށެއްވެސް ދިއްލާލެވޭނެކަމަށް ސިޓީތަކާބެހޭ ވުޒާރާއިން ވިދާޅުވިއެވެ.