ދިވެހި ފުޓްބޯޅައިގެ އަގުހުރި ޚިދުމަތްތެރިޔާ ސާންތީގެ ޖަނާޒާ ބާއްވައިފި

ދިވެހި ފުޓްބޯޅައަށް ގިނަގުނަ ޚިދުމަތްތަކެއް ކޮށްދެއްވި ކޯޗު އިޙްސާން އަބްދުލްޣަނީ (ސާންތީ) ގެ ޖަނާޒާ  މެންދުރު ނަމާދަށްފަހު އިސްލާމީ މަރުކަޒުގައި ބާއްވައިފިއެވެ. ޖަނާޒާ އަދި ކަށުނަމާދަށްފަހު ސާންތީ ވަޅުލެވުނީ އާ ސަހަރާގައެވެ.

އުމުރުން 51 އަހަރުގައި ސާންތީ ނިޔާވީ ޓްރީ ޓޮޕް ހޮސްޕިޓަލުގައި ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް ހާލުދެރަވެ އައިސީޔޫގައި ފަރުވާ ދެނިކޮށް ހޮނިހިރު ދުވަހުގެރެއެވެ.

ސާންތީގެ ޖަނާޒާގައި ދައުލަތުގެ އިސްވެރިންނާއި، ދިވެހި ކުޅިވަރު އާއިލާގެ އިސްވެރިން ބައިވެރިވެ ވަޑައިގެންނެވިއެވެ. މީގެ އިތުރުން ކުޅިވަރު ދާއިރާގެ ގިނަ ބަޔަކާއި، ފުޓްބޯޅަ ކުޅުންތެރިންނާއި ކޯޗުންނާއި، ޓީމުތަކުގެ އިސްވެރިންނާއި ގިނަ އަދަދެއްގެ ރަހުމަތްތެރިންވެސް ޖަނާޒާގައި ބައިވެރިވިއެވެ.

ކުރީގެ ފުޓްބޯޅަ ކުޅުންތެރިޔާ ސާންތީއަކީ ކޯޗިންގެ ދާއިރާގެ ދުވަސްވީ ތަޖުރިބާކާރެކެވެ. އޭނާ އެންމެ ފުރަތަމަ ޤައުމީ ޓީމާ ގުޅުނީ 2001 ވަނަ އަހަރެވެ. އެއަށްފަހު ފަހު 2008 ވަނަ އަހަރާ ހަމައަށް އެސިސްޓެންޓް ކޯޗެއްގެ ގޮތުގައި މަސައްކަތް ކުރެއްވިއެވެ. ޚާއްސަކޮށް އެފްއޭއެމުގެ ޔޫތު ޑިވެލޮޕްމަންޓް ޕްރޮގްރާމް ފަށްޓައި އެ ޕްރޮގްރާމް ކުރިއަށް ގެންދިއުމުގައި އިސް ދައުރެއް އަދާކުރެއްވިއެވެއެވެ.

ސާންތީއަކީ 2008 ވަނަ އަހަރު ރާއްޖެއާއި ލަންކާގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތް ދިވެހިންނަށް ކާމިޔާބުކޮށްދިން އޭރުގެ ގައުމީ ޓީމުގެ އެސިސްޓެންޓް ކޯޗެވެ. މިއއީ ފުޓްބޯޅައިން ރާއްޖެއަށް ލިބުނު ފުރަތަމަ ބައިނަލްއަގްވާމީ ތައްޓެވެ.

ސާންތީ ވަނީ ކުލަބު އީގަލްސް އާއި ޔުނައިޓެޑް ވިކްޓަރީގެ އިސް ކޯޗިން ސްޓާފުންގެ ތެރޭގައިވެސް މަސައްކަތްކުރައްވާފައެވެ. އޭނާގެ ކޯޗުކަމުގައި އީގަލްސްއަށް ޤައުމީ ފުޓްބޯޅަ މުބާރާތް ކާމިޔާބުކޮށްދީފައިވެއެވެ.

ފުޓްބޯޅަ އެސޯސިއޭޝަން އޮފް މޯލްޑިވްސްގެ ޓެކްނިކަލް ޑައިރެކްޓަރުކަންވެސް އަދާކުރެއްވި ސާންތީ ވަނީ ކުޅިވަރަށް ޚިދުމަތް ކުރެއްވުމުގެ ދާއިރާއިން ޒުވާނުންގެ ޤައުމީ އިނާމް ހާޞިލުކުރައްވާފައެވެ. ދިވެހި ފުޓްބޯޅައަށް އޭނާ ކޮށްދެއްވި އަގުހުރި ޚިދުމަތްތައް ފާހަގަކޮށް، ގިނަ ބަޔަކު ވަނީ އޭނާގެ ނިޔާވުމާ ގުޅިގެން ހިތާމަ ފާޅުކޮށްފައެވެ.

ރައީސުލްޖުމްހޫރިއްޔާ ޑޮކްޓަރ މުޢިއްޒު  ވަނީ ސާންތީގެ ނިޔާވުމާ ގުޅިގެން އާއިލާއަށް ތަޢުޒިޔާ ފޮނުއްވައި، އޭނާގެ ޚިދުމަތްތައް ފާހަގަކުރައްވާފައެވެ. ރައީސް މުޢިއްޒު ވިދާޅުވީ ސާންތީއަކީ ދިވެހި ފުޓްބޯޅައިގެ ތާރީޚުގައި ފާހަގަކޮށްލެވޭ ޝަޚްޞިއްޔަތެއް ކަމަށެވެ.

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ވެސް ވަނީ ސާންތީގެ ޚިދުމަތްތައް ފާހަގަކޮށް، އޭނާގެ ނިޔާވުމަކީ ދިވެހި ފުޓްބޯޅައަށް ލިބުނު ބޮޑު ގެއްލުމެއް ކަމަށް ބުނެފައެވެ. އެފްއޭއެމްގެ ބަޔާނުގައި ބުނެފައިވަނީ ސާންތީގެ ހުނަރާއި ތަޖުރިބާ ދިވެހި ފުޓްބޯޅައަށް އަބަދުވެސް ބޭނުންވާނެ ކަމަށެވެ.

ސާންތީގެ ކުރީގެ ދަރިވަރުންނާއި އެކުގައި މަސައްކަތްކުރި ކޯޗުން ވެސް ވަނީ އޭނާގެ ނިޔާވުމާ ގުޅިގެން ހިތާމަ ފާޅުކޮށްފައެވެ. ގައުމީ ޓީމުގެ ކުރީގެ ކެޕްޓަން އަލީ އަޝްފާގު ބުނީ ސާންތީއަކީ ދިވެހި ފުޓްބޯޅައިގެ ބިންގާ އެޅުމުގައި އެންމެ މުހިންމު ދައުރެއް އަދާކުރި އެއް ފަރާތް ކަމަށެވެ.