ޚަބަރު
ރަށެއްގެ އިޤްތިޞާދު ކުރިއަރައިދާނީ ވިޔަފާރީގެ ކަންކަމަށް ފަސޭހަވާނެހެން ބޭންކިންގެ ޚިދުމަތް ލިބިގެން: ވަޒީރު ޠާރިޤް

ފަތުރުވެރިކަމާއި ބެހޭ ވަޒީރު ޠާރިޤު އިބްރާހީމް ފޮޓޯ: ވުޒާރާ ފޭސްބުކް
ރަށްރަށުގައި އޭޓީއެމްގެ ޚިދުމަތް ފެށުމުން ފައިސާ ނެގުމަށާއި ޖަމާކުރުމަށް ބޮޑު ޚަރަދުކޮށްފައި އެހެން ރަށްރަށަށް ކުރާ ދަތުރުތަކަށް ނިމުން އަންނާނެކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެވެ.
ވަޒީރު މިހެން ވިދާޅުވީ ރަށްރަށުގައި އޭޓީއެމްތައް ބެހެއްޓުމަށް ކުރަމުންދާ މަސައްކަތްތަކުގެ ދަށުން ހއ. މާރަންދޫގައި އޭޓީއެމް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ވަޒީރު ޠާރިޤް ވިދާޅުވީ ރަށެއްގެ އިޤްތިޞާދު ކުރިއަރައިދާނީ ވިޔަފާރީގެ ކަންކަމަށް ފަސޭހަވާނެހެން ބޭންކިންގެ ޚިދުމަތްވެސް އެރަށަކުން ލިބިގެންކަމަށެވެ. އެގޮތުން މާރަންދޫގައި ހުޅުވި އޭޓީއެމާއެކު ރަށާއި އެ ސަރަޙައްދުގެ ވިޔަފާރި ކުރިއަރައިގެންދާނެކަން ވަޒީރު ފާހަގަކުރެއްވިއެވެ.
ކިތަންމެ ކުޑަ ފައިސާއެއް ނެގުމަށްވެސް ނުވަތަ ޖަމާކުރުމަށްވެސް މާރަންދޫގެ ރައްޔިތުން ދާން މިޖެހެނީ ދިއްދޫއަށް. އެއީ 100 ރުފިޔާ ނަގަން ޖެހޭ މީހާއަށްވެސް އެތައް ފައިސާއެއް ޚަރަދުކުރަންޖެހޭ ކަމެއް
ވަޒީރު
މިއަހަރު ނިމުމުގެ ކުރިން ހުރިހާ ރަށެއްގައި އޭޓީއެމްގެ ޚިދުމަތް ޤާއިމްކުރެއްވުމަށް ރައީސް މުޢިއްޒު ނިންމަވާފައިވާކަމަށްވެސް ވަޒީރު ފާހަގަކުރެއްވިއެވެ.
މީގެއިތުރުން، ހއ. އަތޮޅާއި ހދ. އަދި ށ. އަތޮޅުގައި ފަތުރުވެރިކަމުގެ އިތުރު މަންޒިލްތައް ހެދުމަށް މަސައްކަތް ކުރައްވަމުން ގެންދަވާކަމަށް ވަޒީރު ވިދާޅުވިއެވެ. މިގޮތުން އެ ސަރަޙައްދުތަކުގައި އައު ޓޫރިސްޓް ރިސޯޓްތައް ތަރައްޤީކުރެވިގެންދާނެކަމަށާއި، މިކަމުގެ ސަބަބުން ރަށްރަށުގައި ބޭންކިންގ ޚިދުމަތް ލިބުމުގެ މުހިންމުކަން އިތުރުވެގެންދާނެކަމަށްވެސް ވަޒީރު ފާހަގަކުރެއްވިއެވެ.