ކޮލަމް

ރޯދައަށް އަންބެލަންލާ ހަނދާންވޭތަ؟

ރޯދައަށް އަންބެލަންލާ ހަނދާންވޭތަ؟

އަތިމަތި: ފޮޓޯ- އިންޓަރނެޓް

މިންނާ ޢަބްދުލްޙަކީމް

މިންނާ ޢަބްދުލްޙަކީމް

29 މާރިޗު 2025، 03:39

29 މާރިޗު 2025، 03:39

މުޅިންވެސް އިވެމުންދަނީ ރޯދަ މަހަށް ތައްޔާރުވުމުގެ ގޮތުން ގޭތެރެ ސާފު ކުރުމާއި، ތެލިތަށި އައު ކުރުމާއި މުޅިގޭގައި ކުލަލާ ވާހަކައެވެ. މިއީ ފެށުނީއްސުރެ މިއަދާ ހަމައަށްވެސް ބަދަލެއް ނުވެ ހުރި ކަންކަމެވެ. މިއާ ޚިލާފަށް ކާބަފައިން ޒަމާނުގައި ކުރަމުންއައި ބައެއް ކަންކަމުގެ ވާހަކަ ނުވެސް ދައްކައެވެ. މިކަންކަން ގިނަ މީހުން ހަނދާންވެސް ނުހުރެއެވެ. އެގޮތުން އެފަދަ ހަނދާނެއް އައުކޮށްލަން ހިނގާށެވެ.

ދައްކަން މިއުޅެނީ ރޯދައާއި ދިމާކޮށް ގޭދޮށުގައި އަންބެލަން ލާ ވާހަކައެވެ. މިއީ ރާއްޖޭގެ ބައެއް ހިސާބުތަކުގައި ކުރާ ކަމަކަށްވެސް ވެދާނެއެވެ. މިކަމަކީ މާލެއިން ދުވަހަކުވެސް ފެނުނު ކަމެއް ނޫނެވެ. ނަމަވެސް މިކަން މާލޭންވެސް ފެނުން ބަޔަކު އުޅުން އެކަށީގެންވެއެވެ. ހަނދާންވާ ގޮތުން އެންމެ ފަހުން އަންބެލަން ލައިފާ ހުއްޓާ ފެނުނީ ދެހާހުގެ ކުރީކޮޅެވެ. ގާތްގަނޑަކަށް 2010 ހިސާބުގަވެސް އަންބެލަން ލައިއުޅުނެވެ.

އަންބެލަން މީ ކޮންއެއްޗެއް؟

އަންބެލަމަކީ ދޮންވެލި ލައިގެން، އޭގެ ވަށައި ކަށިކެޔޮ އަޅޯ ޖަހައިގެން ހަދާފައި އޮންނަ ހަތަރެސްކަން  ގޮޅިއެކެވެ. މި ގޮޅީގައި ހުންނާނީ ކުޑަކޮށް ތެތްކަން ހުންނަ ސާފު ދޮންވެއްޔެވެ. އުމުރުން 65 އަހަރުގެ މީހަކު މަޢުލޫމާތުދިން ގޮތުގައި އަންބެލަން ލުމުގެ މަސައްކަތް ޝައުބާން މަހުގެ ފަހު 15 ގައި ފަށާނެއެވެ. އެގޮތުން ދޮންވެލި ގެނެސް ގޭދޮށުގައި ވެލިފުންޏެއް ޖަހާފައި އިހައް ބަހައްޓަނީއެވެ. އަންބެލަމަށް ވެލިގަނޑު ފެތުރާނީ ރޯދައަށް ހަނދު ބަލާ ރެއެވެ. 

ބައެއް ހިސާބުތަކުގައި މިކަން ކުޑަކޮށް ތަފާތުކޮށް ކުރެއެވެ. އެގޮތުން ކަށިކެޔޮ އަޅޯ ކަނޑައިގެން ގެނެސް ހަތަރެސް ކަނެއް ހެން ހެދުމަށް ފަހު ގޮނޑުދޮށުން ގެނެސް ކަށިވެލިލާ ޒީނަތްތެރި ކުރެއެވެ. އަދި އަންބެލަން މަތީގައި ބޮޑު ވެލި ފުންޏެއް ހަދާ އެކިކަހަލަ މާޖަހާ ޖަރީކުރެއެވެ. އެއީ ހަނދު ފެނުމުންއައިސް ފުންމާލުމަށެވެ.

އަންބެލަމަކީ ރޯދަމަހުގައި ރޯދަ ކުރުކަން ނުވަތަ ފޫހި ފިލުވާލުމުގެ ގޮތުން އާންމު މިންގަނޑުތަކާ ޚިލާފު ނުވާގޮތަށް ކުޅިވަރު ކުޅެވޭނެހެން ތައްޔާރުކުރާ ތަނެެކެވެ. އާންމުގޮތެއްގައި ކުޅިވަރު ކުޅުމަށް އަންބެލަން ބޭނުން ކުރާނީ ކުޑަކުދިންނެވެ. ނަމަވެސް ކޮންމެސް ވަރަކަށް ބޮޑެތި މީހުންވެސް އަންބެލަމުގައި ފަސް އޮށް އަދި އޮށްވަޅު ގޮނޑި ކުޅެ އުޅެވެ. 

އޮށްވަޅުގޮނޑި ކުޅުމަށް އަންބެލަމުގައި ދެބަރިއަށް 8 ވަޅު ކޮންނާނެއެވެ. އެއަށްފަހު ދެފަރާތުގައި ދެމީހުންތިބެ ކުޅެމުންދާނެއެވެ. އޮށްވަޅު ކުޅުމަށް އާންމު ގޮތެއްގައި ބޭނުންކޮށް އުޅެނީ ފަސްއޮށް ކުޅުމަށްވެސް ބޭނުންކުރާ ބިއްލޫރި އޮށެވެ. ބައެއް ރަށްރަށުގައި މާބުޅާ، މަދޮށި ނުވަތަ ކުދި ބޮލި ބޭނުންކުރެއެވެ. ހަވީރު ކާންހެދުން ނިންމާލާފައި އިރުއޮއްސެންދެން މި ކުޅިވަރު ކުޅެއުޅެއެވެ

އަންބެލަމަކީ ސަޤާފީ ކަމެކެވެ. މިކަން މިހާރު ވަނީ މަޑުމަޑުން އުވެމުންގޮސް އެއްކޮށް ކަހަަލަ ގޮތަކަށް އުވިފައެވެ. ނަމަވެސް މިކަމަކީ ކުރީ ޒަމާނުގައި ކުރިއާލާ ތައްޔާރުވެގެން ވަރަށް ފޯރީގައި ކުރަމުންއައި ކަމެކެވެ. 

މި ލިޔުން ކިޔާލުމުން

Ads by MSS