ޖަރުމަނު ލީގުގައި އައު ކާމިޔާބެއް ކޭން ހާސިލްކޮށްފި

މިދިޔަ ހޮނިހިރު ދުވަހު ޖަރުމަން ބުންޑަސް ލީގާގައި ބެޔާން މިއުނިކާއި ސެއިންޓް ޕައުލީ ބައްދަލުކުރި މެޗުގައި ހެރީ ކޭން ކާމިޔާބުކުރި ގޯލާއެކު، އެ ލީގުގައި ކޭންއާ ދެކޮޅަށް ކުޅުނު ހުރިހާ ޓީމެއްގެ ކޮޅަށް އޭނާ ގޯލު ހަމަކޮށްފިއެވެ. އެގޮތުން ކޭން ވަނީ އޭނާއާ އިދިކޮޅަށް މިހާތަނަށް ކުޅުނު 19 ޓީމުގެ ކޮޅަށް މަދުވެގެން ގޯލެއް ކާމިޔާބުކޮށްފައެވެ.

ޖަރުމަނު ލީގުގައި ދެކޮޅަށް ކުޅުނު ހުރިހާ ޓީމެއްގެ ކޮޅަށް ގޯލުޖެހި ޝަރަފު މީގެ ކުރިން އޮތީ، ޖަރުމަނު ޤައުމީ ޓީމަށް ވެސް އެންމެ ގިނަ ގޯލު ކާމިޔާބުކޮށްދިން މިރޯސްލާވް ކްލޯޒާގެ އަތުގައި އެކަންޏެވެ. އޭނާވަނީ ތަފާތު 28 ޓީމަކާ ދެކޮޅަށް ކުޅެ، އެ ހުރިހާ ޓީމެއްގެ ކޮޅަށް ވެސް ގޯލު ޖަހާފައެވެ. 

ކޭން ވަނީ އިނގިރޭސި ލީގުގައި ޓޮޓެންހަމް ހޮޓްސްޕާއާއެކު ވެސް މިކަން ހާސިލްކޮށްފައެވެ. އެ ލީގުގައި ތަފާތު 32 ޓީމަކާ ދެކޮޅަށް އޭނާ ކުޅެފައިވެއެވެ.

ކޭން އަކީ މިވަގުތު ޖަރުމަނު ލީގުގައި އެންމެ ގިނަ ގޯލު ކާމިޔާބުކޮށްފައިވާ ކުޅުންތެރިޔާ ވެސް މެއެވެ. އޭނާ ވަނީ މިހާތަނަށް 22 ގޯލު ކާމިޔާބުކޮށްފައެވެ. 

2023 ވަނަ އަހަރު ބެޔާންއަށް ބަދަލުވިފަހުން ކުޅުނު ޖުމްލަ 83 މެޗުގައި އޭނާ 77 ގޯލު އެ ޓީމަށް ކާމިޔާބުކޮށްދީފައިވެއެވެ. މީގެ ތެރޭގައި ބުންޑަސް ލީގާގައި ކުޅުނު 58 މެޗުގައި ކާމިޔާބުކުރި 57 ގޯލު ވެސް ހިމެނެއެވެ. 

މޮޅު ސްޓްރައިކަރެއްގެ ގޮތުގައި އިނގިރޭސިވިލާތަށްފަހު ޖަރުމަނު ލީގުގައި ވެސް ކޭން ގިނަ ގޯލުތަކެއް ކާމިޔާބުކުރަމުން އަންނައިރު، އޭނާއަށް އޮތް ހިތާމައަކީ މިހާތަނަށް ތައްޓެއް ކާމިޔާބު ނުކުރެވުމެވެ. ބެޔާންއަކީ ތައްޓާ ވަރަށް ގާތް ޓީމެއް ނަމަވެސް، ކޭންގެ ފުރަތަމަ ސީޒަނުގައި އެ ޓީމަށް އެއްވެސް ތައްޓެއް ނުލިބުނެވެ. އަދި މި ސީޒަނުގައި މިހާތަނަށް އެ ޓީމު ލީގުގެ އެއްވަނއިގައި 6 ޕޮއިންޓުގެ ލިޑެއްގައި އޮތުމުން، މިއީ އެކަމަށް ނިމުމެއް އަންނާނެ ސީޒަނެއްކަމަށް ބެލެވެއެވެ.