މެޑްރިޑުގައި ރޮނާލްޑޯގެ ލެގަސީ ފަހަތަށް ޖައްސާލެވޭނެ ފެންވަރު އެމްބައްޕޭގެ އެބަހުރި: އެންޗެލޮޓީ

ކްރިސްޓިއާނޯ ރޮނާލްޑޯ ރެއާލް މެޑްރިޑަށް ބަދަލުވުމަށްފަހު ފުރަތަމަ ސީޒަނުގައި ކާމިޔާބުކުރި އަދަދަށް، އެ ޓީމަށް މި ސީޒަނުގައި ބަދަލުވި ފްރާންސްގެ ތަރި ކީލިއަން އެމްބައްޕޭ ގޯލު ކާމިޔާބުކުރުމާ ގުޅިގެން ވާހަކަ ދައްކަމުން، މެޑްރިޑްގައި ރޮނާލްޑޯގެ ލެގަސީ ފަހަތަށް ޖައްސާލެވޭނެ ފެންވަރު އެމްބައްޕޭގެ އެބަހުރިކަމަށް އެ ޓީމުގެ ކޯޗު، ކާލޯ އެންޗެލޮޓީ ބުނެފިއެވެ.

އެމްބައްޕޭ ކުޑައިރުން ފެށިގެން އެންމެ ކުޅޭ ހިތްވާ ކްލަބަށް މި ސީޒަނުގައި އޭނާއަސް ބަދަލުވެވުނުއިރު، އޭނާ ވަނީ މިހާތަނަށް ލީގުގައި ކުޅުނު 27 މެޗުން 22 ގޯލު ކާމިޔާބުކޮށްފައެވެ. މީގެ އިތުރުން ޗެމްޕިއަންސް ލީގުގައި މިހާތަނަށް 7 ގޯލު ކާމިޔާބުކޮށްފައިވާއިރު، އެ ޓީމު ކުއާޓާ ފައިނަލަށް ދަތުރުކުރުމުގައި ވެސް އޭނާގެ ހިއްސާ ބޮޑެވެ.

މިދިޔަ ހޮނިހިރުގައި ފަހަތުން އަރާ ލެގަނޭސް ބަލިކުރި މެޗުގައި އެމްބައްޕޭ ކާމިޔާބުކުރި 2 ގޯލާއެކު އޭނާ މި ވަނީ މިހާރު މި ސީޒަންގައި 33 ގޯލު ހަމަކޮށްފައެވެ. ރޮނާލްޑޯގެ ފުރަތަމަ ސީޒަނުގައި އޭނާއަށް ގޯލު ކާމިޔާބުކުރެވުނީ އެ އަދަދަށެވެ. އެހެންކަމުން ފުރަތަމަ ދެމަހެއްހާ ދުވަހު އުނދަގޫކަމަށް ފެނުނަސް، މިހާރު އެމްބައްޕޭ ސްޕެނިޝް ލީގަށް ހޭނިއްޖެއެވެ.

ރިޕޯޓަރުންނާ ވާހަކަ ދައްކަމުން އެންޗެލޮޓީ ބުނީ، ރޮނާލްޑޯ މެޑްރިޑުގައި ޖެހީ ހަމައެކަނި ގޯލު ނޫން ކަމަށާއި އޭނާ ހޯދި ކާމިޔާބީތަކަކީ އެހެން މީހަކަށް ހާސިލްކުރުމަށް ވަރަށް އުނދަގޫ ކަންކަން ކަމަށެވެ. ނަމަވެސް އެމްބައްޕޭއަށް އެކަން ކުރެވިދާނެ ކަމަށާއި، އެއީ އެންޗެލޮޓީގެ ވެސް އުއްމީދުކަމަށް އޭނާ ބުންޏެވެ.