އުނދަގޫ ގޮތަކަށް ކޮޕަ ޑެލް ރޭ ފައިނަލުން ރެއާލް ޖާގަ ހޯދައިފި

ސްޕެނިޝް ކޮޕަ ޑެލް ރޭގެ ފައިނަލުން އުނދަގޫ ގޮތަކަށް ރެއާލް މެޑްރިޑް ޖާގަ ހޯދައިފިއެވެ. 

މި މެޗަށް ރެއާލް މެޑުރިޑު ކުރިމަތިލީ، ފުރަތަމަ ލެގުގައި އެ ޓީމަށް ރެއާލް ސޮސިއެދާދުގެ މައްޗަށް ލިބުނު 1 ގޯލުގެ އެޑްވާންޓޭޖާއެކުއެވެ. ނަމަވެސް މެޗުގެ 16 ވަނަ މިނެޓުގައި ސޮސިއެދާދުން ވަނީ ގޯލެއް ކާމިޔާބުކޮށް، އެގްރިގޭޓު ސްކޯރ ހަމަހަމަކޮށްފައެވެ. މި ގޯލު އެ ޓީމަށް ކާމިޔާބުކޮށްދިނީ އެންޑަރ ބެރެންޓްޒީއެވެ. 

އެހެންނަމަވެސް ފުރަތަމަ ހާފުގައި ބާކީ 15 މިނެޓު ކުޅެން އޮއްވައި ރެއާލުން މެޗުގެ ނަތީޖާ ހަމަހަމަކުރިއެވެ. ރެއާލްގެ ޒުވާން ފޯވާޑް، އެންޑްރިޗް، ސޮސިއެދާދުގެ ގޯލް ކީޕަރާ ދެކޮޅަށް އެކަނި ލިބުނު ފުރުސަތުގައި، އޭނާގެ ބޯމަތިން ބޯޅަ ޗިޕްކޮށްލުމަށްފަހު ވަނީ ރީތި ގޯލެއް ކާމިޔާބުކޮށް ރެއާލަށް މެޗުގެ ފުރަތަމަ ގޯލު ކާމިޔާބުކޮށްދީފައެވެ.

ސޮސިއެދާދުން ދެވަނަ ފަހަރަށް ލީޑު ނެގީ މެޗުގެ 72 ވަނަ މިނެޓުގައި ޑޭވިޑް އަލާބާގެ ފައިގާ ޖެހުމަށްފަހު ބައިކޮޅަށް ވަތް ގޯލަކުންނެވެ. އަދި އެ ގޯލަށްފަހު މެޗުގެ އޮއެވަރު ވަރަށް ބޮޑަށް ބަދަލުވެގެންދިޔަތަން ފެނިގެން ދިޔައެވެ.

އެގޮތުން މެޗު ނިމެން 10 މިނެޓަށް ވެފައި ވަނިކޮށް، ސޮސިއެދާދުން އިތުރު ގޯލެއް ކާމިޔާބުކޮށް އެ ޓީމުގެ ލީޑު ފުޅާކުރިއެވެ. ނަމަވެސް އޭގެ ދެ މިނެޓު ފަހުން ޖޫޑް ބެލިންގްހަމް ސޮސިއެދާދުގެ ލީޑު ހަނިކުރިއިރު، އޭގެ ހަތަރު މިނެޓުފަހުން އޮރީލިއަން ޗޯމޭނީގެ ގޯލަކުން އަނެއްކާވެސް ރެއާލްއިން މެޗުގެ ނަތީޖާ ހަމަހަމަކޮށް، އެގްރިގޭޓުން ކުރި ހޯދިއެވެ.

ނަމަވެސް ސޮސިއެދާދުން ކޮޕަ ޑެލް ރޭ ފައިނަލުން ޖާގަ ހޯދުމަށް ކެނޑިނޭޅި ކުރަމުން ދިޔަ މަސައްކަތުން، އެ ޓީމަށް ތިންވަނަ ގޯލު ކާމިޔާބުކޮށްދިން މައިކަލް އޮޔަޒަބަލް، މެޗުގެ އިތުރު ވަގުތުގައި އެ ޓީމަށް ހަތަރުވަނަ ގޯލެއް ކާމިޔާބުކޮށް، އެކްސްޓްރާ ޓައިމްއަށް މެޗު ގެންދިޔައެވެ. 

އެކްސްޓްރާ ޓައިމްގައި ތަފާތު ގެނައީ އެންޓޮނީ ރުޑީގާއެވެ. އާރދާ ގޫލާ ނެގި ކޯނަރަކުން ރުޑީގާ މި ގޯޅު ކާމިޔާބުކުރީ ބޮލުން ޖަހައެވެ.

މި މުބާރާތުގެ ފައިނަލަށް ދަތުރުކޮށް، 21 ވަނަ ފަހަރަށް މި މުބާރާތް ކާމިޔާބުކުރުމުގެ މަގުމަތީގައި ރެއާލް އުޅޭއިރު، މި ސީޒަނުގައި އެ ޓީމަށް ތިން ތަށި ހޯދުމުގެ ފުރުސަތު އެބައޮތެވެ.