ފަލަސްޠީނުގެ ނޫސްވެރިޔާ ވަފާ އަލް އުދައިނީ ޝަހީދުކޮށްލައިފި!

ފަަލަސްޠީނުގެ ދެއިރް އަލް ބަލްޙްއަށް އިޒްރާއިލުން ދިން ހަމަލާއެއްގައި ނޫސްވެރިޔާ ވަފާ އަލް އުދައިނީ ޝަހީދުކޮށްލައިފިއެވެ. 

އަލްޖަޒީރާގައި ބުނެފައިވަނީ ޣައްޒާގެ މެދުތެރޭގައި އޮންނަ ދެއިރް އަލް ބަލްޙް ސަރަހައްދުގައި ހުންނަ ވަފާގެ އާއިލީ ގެއަށް އިޒްރާއިލްގެ ހަމަލާތައް އަރައި މިހަމަލާތަކުގައި އޭނާގެ އާއިލާގެ ބަޔަކު ޝަހީދުވެފައިވާ ކަމަށެވެ. އޭގެ ތެރޭގައި ކުޑަ ދެކުއްޖަކުވެސް ހިމެނެއެވެ. މިހަމަލާތައް ދީފައިވަނީ މިއަދު ހެނދުނުގެ ވަގުތެއްގައެވެ. މިހަމަލާގައި ޝަހީދުވެފައިވަނީ ވަފާ އާއި އެނާގެ ފިރިމީހާ އަދި އޭނާގެ ދެކުދިންނެވެ. 

އިޒްރާއިލުން ފަލަސްޠީނަށް ދޭން ފެށި ހަމަލާތަކުގައި މިހާތަނަށް 174 ނޫސްވެރިޔަކު ވަނީ ޝަހީދު ވެފައި ކަމަށް ޤުދުސް ނެޓްވޯކްގައި ބުނެފައިވެއެވެ.

ފަލަސްޠީނުގެ ޞިއްޙީ ވުޒާރާއިން ބުނެފައިވަނީ އެޤައުމުގެ ޞިއްޙީ ޚިދުމަތްދޭ ފެސިލިޓީތަކުގެ 84ޕަސެންޓް ބޭނުންނުކުރެވޭ ވަރަށް ހަލާކުވެ އިމާރާތްތައް ފުނޑުފުނޑު ވެފައިވާ ކަމަށެވެ. އަދި ސަލާމަތުން ހުރި މަދު ތަންތަނުގައި ބޭސްފަރުވާ އަށް ބޭނުންވާ ސާމާނާއި ބޭސް ނެތުމުން އެކަށީގެންވާ ފަރުވާ ދެވެމުން ނުދާ ކަމަށްވެސް ވަނީ ބުނެފައެވެ. މީގެއިތުރުން އޭގެ ގިނަ ތަންތަނުގައި ކަރަންޓާއި ސާފު ފެން ލިބޭނެ އިންތިޒާމު ނެތި އެމްބިޔުލާންސްތައް ހަލާކުވެފައި ހުރުމިުގެ ސަބަބުން އަވަސްފަރުވާ ތައް ދިނުމަށް ދަތިވެފައިވާކަމަށް ވަނީ ބުނެފައެވެ. 

ހަމަމިއާއި އެކު މިހާރުވެސް ޣައްޒާގައި 15،000 މާބަނޑު އަންހެނުން އެކަށީގެންވާ ފަރުވާ ނުދެވި އެބަތިބިކަމަށް ވަނީ ބުނެފައެވެ. 

އިޒްރާއިލުން ފަލަސްޠީނަށް ދެމުންދާ ހަމަލާތަކުގެ ސަބަބުން މިހާތަނަށް ފަލަސްޠީނުގެ 41،615 މީހަކު ވަނީ ޝަހީދުވެފައެވެ. އަދި 96،000 އަށް ވުރެ ގިނަ މީހުން ވަނީ ޒަޚަމްވެފައެވެ.