ކުޅިވަރު / ރިޕޯޓް

ދުނިޔޭގެ އެންމެ ނުފޫޒުގަދަ އެއް ކްލަބާއެކު ރާއްޖެއިން ފެށި މި ކެމްޕެއިން ވާސިލްކޮށްދޭނީ ކޮން މަންޒިލަކަށް؟

ދުނިޔޭގެ އެންމެ ނުފޫޒުގަދަ އެއް ކްލަބާއެކު ރާއްޖެއިން ފެށި މި ކެމްޕެއިން ވާސިލްކޮށްދޭނީ ކޮން މަންޒިލަކަށް؟

ވިޒިޓް މޯލްޑިވްސް އާއި އެލް.އެފް.ސީގެ ކެމްޕެއިން ތިން އަހަރާއި ހަ މަސްދުވަހަށް ކުރިޔަށް ގެންދާނެ ---

މިފްތާޙް މުޙައްމަދު

މިފްތާޙް މުޙައްމަދު

03 އޭޕްރީލު 2025، 01:33

03 އޭޕްރީލު 2025، 01:33

ފުޓުބޯޅައަކީ ދުނިޔޭގެ އެންމެ ގިނަ ބަޔަކު ޝައުގުވެރިވާ އަދި އެންމެ ގިނަ ބަޔަކު ބަލަމުންދާ ކުޅިވަރެވެ. މި ކުޅިވަރުގެ ސަޕޯޓަރުންގެ ގޮތުގައި ދުނިޔޭގެ އަށް ބިލިއަން މީހުންގެ ތެރެއިން ހަތަރު ބިލިއަން މީހުން ތިބޭކަމަށް ވެއެވެ. އެހެންކަމުން ކޮންމެ ދެ މީހަކުން އެކަކީ ފުޓުބޯޅައަށް ލޯބިކުރާ، އަދި މެޗުތައް ބެލުން ނޫނީ މި ކުޅިވަރު ކުޅޭ މީހެކެވެ.

ކަންމިހެންއޮތްއިރު، ދުނިޔޭގެ އެންމެ މަގުބޫލު އެތުލީޓުންގެ ތެރޭގައި ވެސް ހިމެނެނީ ފުޓުބޯޅަ ކުޅުންތެރިންނެވެ. މިއީ އަހަރެމެންގެ ތެރެއިން އެއްވެސް މީހަކު ދެބަސްވާނެކަމެއް ނޫނެވެ. އަދި ފުޓުބޯޅަ ކުޅުންތެރިންގެ އިތުރުން، ކާމިޔާބު ކްލަބުތަކާއި، މި ކުޅިވަރުގެ ރެކޯޑުތަކާއި، ކްލަބުތަކުގެ ޙާއްސަކަންކަމަކީ ވެސް ގިނަ ބައެއްގެ ތެރޭގައި އެނގި، އޮޅުންފިލާފައި އޮތް ކަންކަމެވެ. ދުނިޔޭގައި ފުޓުބޯޅަ އެހާވެސް މަޤުބޫލެވެ. 

މި ކުޅިވަރި އެންމެ ފުރަތަމަ އެފެދިގެން އައީ ގްރީސް އާއި ޗައިނާއިންނޭ ވެސް ބުނެވިދާނެއެވެ. ނަމަވެސް މިހާރު އަހަރެމެން މިކުޅޭ ގޮތަށް ފުޓުބޯޅަ ކުޅެން ފެށީ އިނގިރޭސިވިލާތުގައެވެ. މި ބަދަލުތައް ގެނައީ 1863 ވަނަ އަހަރު އިނގިރޭސިވިލާތުގައި އޮތް ބައްދަލުވުމެއްގައި އެ ގައުމުގެ ކަމާގުޅޭ ފަރާތްތަކުން ފާސްކުރި މި ކުޅިވަރުގެ އުސޫލުތަކަކަށް ފަހުއެވެ. އޭގެ ފަހުން އިނގިރޭސީންގެ އިސްތިއުމާރުގެ ތެރޭގައި ފުޓުބޯޅަ ގިނަ ޤައުމުތަކަށް ފެތުރިގެން ދިޔައީ އެ ގައުމުން މި ކުޅިވަރު ކުޅެމުން އައި ގޮތަށެވެ. ފަހުން މި ކުޅިވަރި ވެގެން ދިޔައީ ވާދަވެރި، އަދި މަޤުބޫލު ކުޅިވަރަކަށެވެ.

މިއަދު އިނގިރޭސި ލީގު ދުނިޔޭގައި އެންމެ މަޤުބޫލު ލީގުގެ ގޮތުގައި އޮތީ އެ ސަބަބަށްޓަކާ ކަމަށް ވެދާނެއެވެ. ސްޕެއިންގެ ބާސެލޯނާ އާއި ރެއާލް މެޑްރިޑުގެ ސަޕޯޓަރުން ދުނިޔޭގެ އެކިކަންކޮޅުތަކުގައި ތިބި ނަމަވެސް، އެންމެ ގިނަ ބަޔަކު ބަލަނީ އިންގްލިޝް ޕްރިމިއަރ ލީގެވެ. މިއީ ދިވެހީން ވެސް އެންމެ ޝައުގުވެރިކަމާއެކު ބަލާ ލީގެވެ. 

މި ލީގުގައި ލިވަޕޫލްއަކީ އަބަދުވެސް މަޤުބޫލު ޓީމެކެވެ. މިކަމުގެ އެއް ސަބަބަކީ އެ ޓީމުން ޔޫރަޕްގައި އަބަދުވެސް ހޯދަމުންދާ ކާމިޔާބީތަކެވެ. އޭގެ މާނައަކީ ކޮންމެ ސީޒަނެއްގައި ތަށިތަކެއް ކާމިޔާބު ކުރަމުން އަންނަ ވާހަކައެއް ނޫނެވެ. ނަމަވެސް، ފަނޑުވުމެއްނެތި ކޮންމެ ޖީލެއްގައި ވެސް ފާހަގަކޮށްލެވޭ ކާމިޔާބީތައް އެ ކްލަބުން ހޯދަމުން ދިއުމެވެ. މިކަމުގެ ދެވަނަ ސަބަބަކީ އެ ކްލަބުން ސަޕޯޓަރުންނާ ބާއްވާ ގާތް ގުޅުމާއި، އިޖުތިމާއީ ކަންކަމުގައި ދޭ އެއްބާރުލުމެވެ. އެހެންކަމުން ލިވަޕޫލްއަކީ ފުޓުބޯޅަ ކްލަބަކަށް ވުރެން ބޮޑު ޝަހުސެއްކަމަށް ވެސް ގިނަ ބަޔަކު ޤަބޫލުކުރެއެވެ. 

އަދި އެ ކްލަބު މިހާރު ހޯދަމުންދާ ކާމިޔާބީތަކުގެ ސަބަބުން، ކްލަބުގެ މަޤުބޫލުކަން އަންނަނީ އިތުރުވަމުންނެވެ. މިނިވަންކަމާއެކު ޑޭޓާ ބަލަހައްޓާ ނީލްސެންއިން ހާމަކޮށްފައިވާ ތަފާސް ހިސާބުތަކުން ދައްކާ ގޮތުގައި، މި ސީޒަންގެ ފުރަތަމަ 9 މެޗުގައި ޕްރިމިއަރ ލީގުގެ މެޗުތަކުގެ ތެރެއިން އެންމެ ގިނަ ބަޔަކު ޓީވީން ބަލާފައިވަނީ ލިވަޕޫލްގެ މެޗުތަކެވެ. އެގޮތުން މިދިޔަ އަހަރުގެ އޯގަސްޓު މަހުން އޮކްޓޯބަރު މަހުގެ ނިޔަލަށް 133.8 މިލިއަން މީހުން ވަނީ އެ ކްލަބުގެ މެޗުތައް ޓީވީއިން ބަލާފައެވެ. މީގެ ތެރޭގައި އެންމެ ގިނައިން ހިމެނެނީ އެމެރިކާގެ މެދުތެރޭގެ ގައުމުތަކާއި، ދެކުނު އެމެރިކާގެ ގައުމުތަކާއި، ޔޫރަޕުގެ ގައުމުތަކާއި، މެދުއިރުމަތީގެ ގައުމުތަކާއި އަދި އުތުރު އެފްރިކާގެ ގައުމުތަކެވެ.

ހަމަ އެގޮތަށް، މިދިޔަ ސީޒަންގައި ވެސް އެންމެ ގިނަ ބަޔަކު ޓީވީން ބަލާފައިވަނީ ލިވަޕޫލްގެ މެޗުތަކެވެ. މިދިޔަ ސީޒަންގައި ޖުމްލަ އޯޑިއެންސް 471 މިލިއަނަށް އަރާކަމަށް ލިވަޕޫލުން ވަނީ ހާމަކޮށްފައެވެ.



ޑޭޓާ އެނެލިޓިކްސް ކުންފުންޏެއް ކަމުގައިވާ ބްލިންކްފަޔާރގެ ތަފާސް ހިސާބުތަކުން ދައްކާ ގޮތުގައި، ލިވަޕޫލްގެ ސޯޝަލް މީޑިއާ ޗެނަލްތައް އަންނަނީ މުޅި ދުނިޔޭގެ 200 މިލިއަން މީހުނަށް ވުރެ ގިނަ ބަޔަކު މިހާރު ބަލަމުންނެވެ. އެގޮތުން އެކި ގައުމުތަކުގައި ލިވަޕޫލްގެ ކޮންޓެންޓު ބަލަމުން ދަނީ އެ ގައުމެއްގައި އެންމެ މަގުބޫލު ޕްލެޓްފޯމްތަކުގައެވެ. ލިވަޕޫލްގެ ކޮންޓެންޓު ބަލާ އެންމެ މަގުބޫލު ޕްލެޓްފޯމުތަކުގެ ތެރޭގައި ހިމެނެނީ އެކްސް، ފޭސްބުކް، އިންސްޓަގްރާމް، ޓިކްޓޮކް، ޔޫޓިއުބް، ވަޓްސްއަޕް، ސްނެޕްޗެޓް، ތުރެޑްސް، ލިންކްޑްއިން، ސިނާ ވޭބޯ، ބިލިބިލި، ޑޫޔިން އަދި ލައިންއެވެ. 

މި ޕްލެޓްފޯމްތައް މެދުވެރިކޮށް ލިވަޕޫލުން މިދިޔަ ސީޒަނުގައި ޙިއްސާކުރި އެކި ކޮންޓެންޓުތަކަށް ވަނީ ޖުމްލަ 1.5 ބިލިއަން ފޭން އެންގޭޖުމެންޓް ލިބިފައެވެ. މި އަދަދަށް ޕްރިމިއަރ ލީގުގެ އެހެން ކްލަބުތަކުން ޙިއްސާކޮށްފައިވާ ކޮންޓެންޓުތަކަށް ފޭން އެންގޭޖުމެންޓް ލިބިފައެއް ނުވެއެވެ. މީގެ އިތުރުން، އެންމެ ގިނަ ބަޔަކު ސޯޝަލް މީޑިއާގައި ބަލާފައިވަނީވެސް ލިވަޕޫލްގެ ކޮންޓެންޓުތަކެވެ. އެގޮތުން 11.9 ބިލިއަން ފަހަރު މި ކޮންޓެންޓުތައް ވަނީ ބަލާފައެވެ. 

އަދި ހަމަމިއާއެކު، އެ ކްލަބުގެ ޔޫޓިއުބް ޗެނަލްގައި ހިއްސާކުރާ ވީޑިއޯތަކުގެ ނޮޓިފިކޭޝަން މިހާރު ވަގުތުން 11 މިލިއަނަށް ވުރެ ގިނަ މީހުނަށް ދެއެވެ. މާނައަކީ މި އަދަދަށް މިހާރު އެ ކްލަބުގެ ޔޫޓިއުބް ޗެނަލް ސަބްސްކްރައިބްކޮށްފައިވާ މީހުން އެރުމެވެ. އެހެންކަމުން ލިވަޕޫލްގެ ޔޫޓިއުބް ޗެނަލް ހިމެނެނީ ޔޫޓިއުބްގައި އެންމެ މަޤުބޫލު އެއް ޗެނަލްގެ ގޮތގައެވެ. އަދި އެއީ ބާސެލޯނާ އާއި ރެއާލް މެޑްރިޑަށްފަހު، ދުނިޔޭގައި ތިންވަނައަށް އެންމެ ގިނަ ބަޔަކު ސަބްސްކްރައިބްކޮށްފައިވާ ކްލަބެވެ. 

އެހެންކަމުން، މިދިޔަ މާރިޗު މަހުގެ 13 ވަނަ ދުވަހު އިޢުލާންކުރި، ވިޒިޓް މޯލްޑިވްސް އާއި ލިވަޕޫލްއާއި ދެމެދު ހަދާފައިވާ ޕާޓްނާޝިޕުގެ ދަށުން ފަށާފައިވާ ބައިނަލްއަޤްވާމީ ކެމްޕެއިނަކީ، ދިވެހިރާއްޖޭގެ ފަތުރުވެރިކަން އެތައް މިލިއަން ބަޔަކަށް އިޝްތިހާރުވެގެންދާނެ ކަމެއްކަން ހަމަޔަގީނެވެ. އެހެންގޮތަކަށް ބުނާނަމަ، ލިވަޕޫލް ވެގެން މިދަނީ، އެތައް މިލިއަން ބައެއްގެ ލޯ ކުރިމައްޗަށް ދިވެހިރާއްޖެ ހުޅުވާދޭނެ ދޮރޯއްޓަކަށެވެ. މީގެ ތެރޭގައި ފަތުރުވެރި މަންޒިލެއްގެ ގޮތުގައި ރާއްޖޭގެ ވާހަކަތައް ކުރިން ނޭންގޭ ގިނަ ހިސާބުތަކާއި ގައުމުތަކަށް، ރާއްޖޭގެ މި ރީތި ގޮނޑުދޮށްތަކުގައި ރާޅު ބީއްސާލާ އަޑު އިވިގެން ދާނެއެވެ. 

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ) / ވިޒިޓް މޯލްޑިވްސް އާއި ލިވަޕޫލް ގުޅިގެން، ކޯ ބްރޭންޑަޑް އިނީޝިއަޓިވެއްގެ ގޮތުގައި ކުރިއަށްގެންދާ ރާއްޖޭގެ ފަތުރުވެރިކަމުގެ މި ކެމްޕެއިން، މިހާރު ވަނީ ރަސްމީކޮށް  ފަށާފައެވެ. މިކަމަށް ބޭއްވި ޙާއްސަ ރަސްމިއްޔާތު އޮތީ 2 އެޕްރީލްގައި އިނގިރޭސި ޕްރިމިއަރ ލީގުގައި އެވަރޓަން އާއި ލިވަރޕޫލް ފުޓްބޯލް ކްލަބް ބައްދަލުކުރި މެޗުގެ ކުރިންނެވެ. މި އިވެންޓުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެސް ވަނީ ބައިވެރިވެ ވަޑައިގަންނަވާފައެވެ.

ދުނިޔޭގެ އެންމެ ނުފޫޒުގަދަ އެއް ކްލަބާއެކު ރާއްޖެއިން ފެށި މި ކެމްޕެއިން ވާސިލްކޮށްދޭނީ ކޮން މަންޒިލަކަށް؟

ރާއްޖޭގެ ފަތުރުވެރިކަން ޕްރޮމޯޓުކުރުމުގެ ކެމްޕުއިން ރަސްމީކޮށް ފެއްޓެވުމަށްރާއްޖޭގެ ރައީސުލްޖުމްހޫރިއްޔާ އާއި ޓުއަރިޒަމް މިނިސްޓަރާއި ސްޕޯޓްސް މިނިސްޓަރު އަދި އެމްއެމްޕީއާރުސީގެ މެނޭޖިން ޑިރެކްޓަރ ލިވަޕޫލްގެ އެންފީލްޑުގައި، ފޮޓޯ: ރައީސް އޮފީސް

ދިވެހި ސަރުކާރުން ހާމަކޮށްފައިވާ ގޮތުގައި މި ކެމްޕެއިންގެ ދަށުން، ބްރޭންޑް ވާސިލުވާ މިންވަރު އިތުރުކުރުމާއި ރާއްޖެ އަންނަ ފަތުރުވެރިންގެ ޢަދަދު އިތުރުކުރުމުގެ އިތުރުން، ދިވެހިރާއްޖެއަށް މުހިންމު އިޤްތިޞާދީ މަންފާތައް ހޯދޭނޭއެވެ.

ލިވަޕޫލް އާއި ވިޒިޓް މޯލްޑިވްސްއާ ދެމެދު ހަދާފައިމިވާ ޕާޓްނާޝިޕްގެ މުއްދަތަކީ 3 އަހަރާއި 6 މަސްދުވަހެވެ. މި ޕާޓްނަރޝިޕްގެ ދަށުން، މާރިޗު މަހުގެ 27 ވަނަ ދުވަހު ވިޒިޓް މޯލްޑިވްސް އިން ވަނީ އިނގިރޭސިވިލާތުގައި ފުޅާ ދާއިރާއެއްގައި އައުޓްޑޯ ކެމްޕެއިނެއްވެސް ފަށާފައެވެ. ތިން މަސް ދުވަހުގެ މި ކެމްޕެއިންގެ ދަށުން އިނގިރޭސިވިލާތުގެ މުހިންމު ބައެއް ސަރަޙައްދުތަކުގައި އައުޓްޑޯ އަދި ޑިޖިޓަލް އެޑްވަރޓައިޒިންގެ މަސައްކަތްތައް ކުރިއަށްގެންދިއުމަށް ހަމަޖެހިފައިވާކަމަށް ރައީސުލްޖުމްހޫރިއްޔާގެ އޮފީހުން ވަނީ ހާމަކޮށްފައެވެ. އެގޮތުން ލަންޑަންގެ 100 ޓެކްސީއަކާއި، ބަސްތަކާއި ލަންޑަން އަންޑަރގްރައުންޑް، ވައިގެބަނދަރުތައް، އަދި ބިޒްނަސް ކްލާސް ލައުންޖުތަކުގައި ވިޒިޓް މޯލްޑިވްސް ބްރޭންޑް ގިނަ ޢަދަދެއްގެ ބަޔަކަށް އިޝްތިހާރުކުރެވިގެންދާނެއެވެ. 

މީގެ އިތުރުން، ޕްރިމިއަރ ލީގް މެޗުތައް އެންފީލްޑްގައި ކުޅޭ ދުވަސްތަކުގައި، ސްޓޭޑިއަމްގައި ލެޑް ސައިނޭޖް ދައްކައި، ލިވަޕޫލްގެ ރަސްމީ ލުއިފޮތްތަކާއި ޔޫރަޕުގެ އެކި ސަރަޙައްދުތަކުގައި ހުންނަ ބިލްބޯޑުތަކުގައި ރާއްޖޭގެ ބްރޭންޑް އިޝްތިހާރުކޮށް، ބައިނަލްއަޤުވާމީ ފެންވަރެއްގައި ފަތުރުވެރިކަން ކުރިއަރުވަން މަސައްކަތްކުރާނެކަމަށް ވެސް ރައީސުލްޖުމްހޫރިއްޔާގެ އޮފީހުން ހާމަކޮށްފައިވެއެވެ. 

ރާއްޖޭގެ ފަތުރުވެރިކަން ޕްރޮމޯޓުކުރުމުގެ ގޮތުން 2019 ވަނަ އަހަރު ވެސް މިފަދަ އެއްބަސްވުމެއް ހަދާފައިވެއެވެ. ތިން އަހަރުގެ މުއްދަތަށް ހެދި އެ އެއްބަސްވުމުގެ ދަށުން، ސްޕެނިޝް ލީގުގެ ސެލްޓާ ވީގޯގެ ޖާޒީގެ އަތުކުރީގައި ވިޒިޓް މޯލްޑިވްސްގެ ލޯގޯ ބޭނުންކުރިއެވެ. ނަމަވެސް އެ ކްލަބަކީ ދުނިޔޭގައި މަޤުބޫލު ކްލަބެއް ނޫންކަމުން، އެކަމުގެ އެދެވޭ ފައިދާއެއް ރާއްޖޭގެ ފަތުރުވެރިކަމަށް ކުރިތަނެއް ނުފެނެއެވެ.

ދުނިޔޭގެ އެންމެ ނުފޫޒުގަދަ އެއް ކްލަބާއެކު ރާއްޖެއިން ފެށި މި ކެމްޕެއިން ވާސިލްކޮށްދޭނީ ކޮން މަންޒިލަކަށް؟

ވިޒިޓް މޯލްޑިވްސް އާއި ސްޕެއިންގެ ސެލްޓާ ވީގޯއާއެކު ހެދި އެއްބަސްވުމުގެ ދަށުން އެ ކްލަބުގެ ޖާޒީގެ އަތްކުރީގައި ވިޒިޓް މޯލްޑިވްސްގެ ލޯގޯ، ފޮޓޯ: ސެލްޓާ ވީގޯ

އެއާ ޚިލާފަށް ލިވަޕޫލްއަކީ ދުނިޔޭގެ އެންމެ މަގުބޫލު އެއް ކްލަބުކަމަށްވެފައި، އިނގިރޭސި ލީގަކީ ވެސް ދުނިޔޭގައި އެންމެ މަގުބޫލު ލީގުކަމުގައި ވުމުން، ލިވަޕޫލްއާ ގުޅިގެން ރާއްޖެއިން ފަށާފައިމިވާ ޕާޓްނަޝިޕަކީ އިގްތިޞާދީ ގޮތުން ބޮޑު އުއްމީދެއް ކުރެވޭ އެއްބަސްވުމެކެވެ. އެހެންކަމުން، މި ޕާޓްނަޝިޕާއެކު، ރާއްޖެ އަންނަ ފަތުރުވެރިން އިތުރުވެ، ރާއްޖެއަކީ ދުނިޔޭގެ ފަތުރުވެރިކަމުގެ އެންމެ މަގުބޫލު މަންޒިލުގެ ގޮތުގައި ދެމެހެއްޓޭނެކަމުގެ އުއްމީދު ވަނީ ބޮޑުވެފައެވެ. 

މި ލިޔުން ކިޔާލުމުން

Ads by MSS