އެތުލެޓިކޯ ބަލިކޮށް ކޮޕަ ޑެލް ރޭ ފައިނަލުން ބާސެލޯނާ ޖާގަ ހޯދައިފި

ސްޕެނިޝް ކޮޕަ ޑެލް ރޭގެ ދެވަނަ ސެމީފައިނަލުގެ ދެވަނަ ލެގުގައި ރޭ ބާސެލޯނާއިން އެތުލެޓިކޯ ހަނިގޮތަކަށް ބަލިކުރުމަށްފަހު، މުބާރާތުގެ ފައިނަލުން ޖާގަ ހޯދައިފިއެވެ. ފައިނަލުގައި ބާސެލޯނާއިން ނިކުންނަން ޖެހޭނީ ރެއާލް މެޑްރިޑާ ދެކޮޅަށެވެ.

މި މަހުގެ 26 ވަނަ ދުވަހު ސެވިއްޔާގައި ކުޅުމަށް ހަމަޖެހިފައިވާ މި ފައިނަލް ވެގެން ދާނީ ސްޕެނިޝް ކަޕްގެ ފައިނަލުގައި، އެ ގައުމަށް ނިސްބަތްވާ އެންމެ ބޮޑު ދެ ކުލަބުން ވާދަކުރާ އަށްވަނަ ފަހަރަށެވެ. 

އެތުލެޓިކޯގެ މެޓްރޮޕޮލިޓާނޯ ސްޓޭޑިއަމްގައި ކުޅުނު މި މެޗުގައި ގޯލު ކާމިޔާބުކޮށް، ސެމީ ފައިނަލުގައި ނަތިޖާ ނެރުނީ ބާސެލޯނާގެ ފެރަން ޓޮރޭޒް ފުރަތަމަ ހާފުގައި ކާމިޔާބުކުރި ގޯލުންނެވެ. ޓޮރޭޒްގެ މި ގޯލަކީ، އެ ޓީމުގެ އުއްމީދީ ތަރި، ލެމިން ޔަމާލު ފަހިކޮށްދިން ފުރުސަތަކުން، އެތުލެޓިކޯގެ އާޖެންޓީނާގެ ގޯލްކީޕަރު، ހުއާން މުސޯގެ ކަނާތްފަރާތުން ގޯލުގެ ތެރެއަށް ފޮނުވާލި ބޯޅައެކެވެ. 

މީގެ އިތުރުން ވެސް ބާސެލޯނާއިން ވަނީ ގޯލު ޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ޔަމާލް ވަނީ މެދުކެނޑުމެއްނެތި އެތުލެޓިކޯގެ ގޯލަށް ނުރައްކާ ކޮށްފައެވެ. މީގެ އިތުރުން ރަފީނިއާގެ ހަމަލާތަކުން ވެސް އެތުލެޓުކޯއަށް ސަލާމަތްވެވުނީ ކިރިޔާއެވެ. 

ސެމީފައިނަލުގެ ފުރަތަމަ ލެގުގައި މި ދެ ޓީމު ބައްދަލުކުރި މެޗެ 4-4 އިން އެއްވަރުވިއިރު، އެތުލެޓިކޯއިން ފަހުވަގުތު ދެ ގޯލު ކާމިޔާބުކޮށް ފައިނަލުގެ އުއްމީދު އައުކުރި ނަމަވެސް، ރޭގެ މެޗުގައި އެ ޓީމަށް ގޯލެއް ކާމިޔާބުކުރެވޭ ގޮތެއް ނުވިއެވެ. 

ޔޫރަޕްގެ ބޮޑު ފަސް ލީގަށް ބަލާނަމަ މިހާތަނަށް 2025 ގައި މެޗަކުން ބަލި ނުވަނީ ބާސެލޯނާ އެކަންޏެވެ. މިއާއެކު މި ސީޒަނުގައި 4 ތަށި ކާމިޔާބު ކުރުމުގެ ފުރުސަތު ވެސް އަދި އެ ޓީމަށް އެބައޮތެވެ. 

އެ ޓީމު ވަނީ މި ސީޒަންގައި ސްޕެނިޝް ސުޕަ ކަޕް ކާމިޔާބުކޮށްފައެވެ. އަދި ލަ ލީގާގައި އެ ޓީމު އެއްވަނައިގައި އޮތީ ދެވަނައިގައި އޮތް ރެއާލްއަށް ވުރެ 3 ޕޮއިންޓުގެ އެޑްވަންޓޭޖެއްގައެވެ.