ކަންކަމާމެދު ވިސްނާގޮތް ބަދަލުކޮށްގެން ނަފްސާނީ ބުރަ ލުއިކުރެވިދާނެ

ދިރިއުޅުމުގައި އަޅުގަނޑުމެން ކުރިމަތިލާންޖެހޭ އެންމެ ބޮޑު ގޮންޖެހުންތަކުގެ ތެރޭގައި ނަފްސާނީ  ބުރައާއި ކަންބޮޑުވުން ހިމެނެއެވެ. ނަމަވެސް، މި ކަންކަން އަންނަނީ އަޅުގަނޑުމެންގެ ދިރިއުޅުމަށްވުރެން ބޮޑަށް،  އަޅުގަނޑުމެންގެ ސިކުނޑިންނެވެ. މިކަން ރަނގަޅަށް ދެނެގަތުމަކީ އަޅުގަނޑުމެންގެ ނަފްސާނީ ދުޅަހެޔޮކަން އިތުރުކުރުމަށް ވަރަށް މުހިންމު ކަމެކެވެ.

އަޅުގަނޑުމެންނަށް ކޮންޓްރޯލް ކުރެވޭ ކަންކަން ކޮންޓްރޯލް ކުރުމަށް މަސައްކަތް ކުރަންވާނެއެވެ. އަދި އަޅުގަނޑުމެންގެ ބާރު ނުފޯރާ ކަންކަމާމެދު ކަންބޮޑުވުން ހުއްޓާލަން ޖެހެއެވެ. މީގެ ބަދަލުގައި، އަޅުގަނޑުމެންގެ ޢަމަލުތަކަށް އަހައްމިއްޔަތުކަން ދޭންވާނެއެވެ. ނަތީޖާއަށް ބަލައި ކަންބޮޑުވުމުގެ ބަދަލުގައި، އަޅުގަނޑުމެންނަށް ކުރެވޭ ކަންކަމަށް ފޯކަސް ކުރުމުން، ނަފްސާނީ ގޮތުން ބާރުވެރިކަން ލިބިގެންދާނެއެވެ.

ދިރިއުޅުމުގައި ދަތިތަކާ ކުރިމަތިލާން ޖެހޭނެކަން ގަބޫލުކުރުމަކީ ވެސް މުހިންމު ކަމެކެވެ. ދިރިއުޅުމަކީ އަބަދުވެސް ފަސޭހަ އެއްޗެއް ނޫނެވެ. ގޮންޖެހުންތައް އައުމުގެ ކުރިން އެކަން ގަބޫލުކޮށް، އެކަމަށް ތައްޔާރުވެ ތިބުމުން، ކަންކަމާ ކުރިމަތިލާއިރު އަޅުގަނޑުމެން ކަންބޮޑެއްނުވާނެއެވެ.

އަޅުގަނޑުމެން ކަންކަމުގެ މައްޗަށްދޭ  ރައްދުތައް ކޮންޓްރޯލް ކުރަން ދަސްކުރުމަކީ ވެސް ވަރަށް މުހިންމު ކަމެކެވެ. އޭރުން އެފަދަ ކަންކަމުން އަޅުގަނޑުމެންނަށް ނަފްސާނީ ބުރަ ނާންނާނެއެވެ. އެކަން އަންނާނީ އަޅުގަނޑުމެންގެ ރައްދުންނެވެ. އެހެންކަމުން، ހަމަޖެހިގެން ތިބެ، ކޮންޓްރޯލް ގެއްލުނަ ނުދީ، ކެތްތެރިކަމާއި ބާރުވެރިކަމާއެކު ތިބުމަކީ މުހިންމު ކަމެކެވެ.

ހަމަހިމޭންކަމުގެ މުހިންމުކަން ވެސް ގަބޫލުކުރަން ޖެހެއެވެ. ކޮންމެ ދުވަހަކު އަޑުގަދަ މާޙައުލުން ދުރަށް ޖެހިލައި، އެކަހެރިވެ ހަމަހިމޭންކަމުގައި ވަގުތުކޮޅެއް ހޭދަކުރުމުން، އަޅުގަނޑުމެންގެ ސިކުނޑި ސާފުވެ، ސަމާލުކަން އިތުރުވާނެއެވެ. މިއީ ނަފްސާނީ ދުޅަހެޔޮކަމަށް ވަރަށް މުހިންމު ކަމެކެވެ.

ގިނަ ކަންކަމަށް ވިސްނާ ފިކުރުބޮޑުވުމުގެ ބަދަލުގައި، މަދުން ނަމަވެސް ކަންކަން ރަނގަޅަށް ކުރުމަށް އިސްކަންދޭންވާނެއެވެ. ގިނަ ކަންކަމަށް ވިސްނުމުން އަޅުގަނޑުމެންގެ ހަކަތަ ދަށްވެ، ނަފްސާނީ ބުރަ އިތުރުވާނެއެވެ. އެހެންކަމުން، އިސްކަންދޭ ކަންކަން ކަނޑައަޅައި، ކަންކަން ލުއިކޮށް، މުހިންމު ކަންކަމަށް އަޅުގަނޑުމެންގެ ހަކަތަ ދިނުމަކީ މުހިންމު ކަމެކެވެ.

ނިޢުމަތްތަކަށް ޝުކުރުވެރިވުމުގެ އާދަ އަށަގެންނެވުމަކީ ވެސް ނަފްސާނީ ދުޅަހެޔޮކަމަށް ވަރަށް މުހިންމު ކަމެކެވެ. އަޅުގަނޑުމެން ހީކުރާވަރަށްވުރެ ގިނައިން އަޅުގަނޑުމެންގެ އަތުގައި ނިޢުމަތްތައް ހުންނާނެއެވެ. އަޅުގަނޑުމެންގެ ބޭކާރު ވިސްނުން ދިރިއުޅުމުގެ ނިޢުމަތްތަކުގެ މައްޗަށް  ޝުކުރުވެރިވުމަށް ބަދަލުކޮށް، ލުއިފަސޭހަކަން ލިބިގަތުމަށް މަސައްކަތް ކުރަންވާނެއެވެ. މިގޮތަށް ވިސްނުމުން، އަޅުގަނޑުމެންގެ ހިތްހަމަޖެހުން އިތުރުވެ، ނަފްސާނީ ބުރަ ކުޑަވެގެންދާނެއެވެ.

މަރު ގަބޫލުކުރުމަކީ ވެސް މުހިންމު ކަމެކެވެ. "މޮމެންޓޯ މޮރީ" ނުވަތަ މަރު ހަނދާންކުރުމުގެ ފަލްސަފާއިން އަޅުގަނޑުމެންނަށް ދަސްވާ ގޮތުގައި، ދިރިއުޅުމަކީ ކުރު އެއްޗެކެވެ. މިކަން ހަނދާން ބެހެއްޓުމުން، އަޅުގަނޑުމެން ނަފްސާނީ ބުރަ ނަގަން ހުއްޓާލައި، ދިރިއުޅެން ފަށާނެއެވެ. ކޮންމެ ދުވަހެއްގެ އަގު ވަޒަންކޮށް، ދިރިއުޅުމުގެ ރީތިކަން އިހުސާސްކުރަން ފަށާނެއެވެ.

އަޅުގަނޑުމެންގެ ވިސްނުމާއި ޢަމަލުތައް ބަދަލުކޮށްގެން، މި ކަންކަމުން ސަލާމަތްވެވިދާނެއެވެ. އަޅުގަނޑުމެންނަށް ކޮންޓްރޯލް ކުރެވޭ ކަންކަމަށް ފޯކަސްކޮށް، ހަމަހިމޭންކަން ހޯދައި، ޝުކުރުވެރިވުން އާދައަކަށް ހަދައި، އަދި ދިރިއުޅުމަކީ ކުރުއެއްޗެއްކަން ހަނދާންކޮށް، އަޅުގަނޑުމެންނަށް މާ އުފާވެރި، ހިތްހަމަޖެހޭ ދިރިއުޅުމެއް އުޅެވިދާނެއެވެ. ނަފްސާނީ ދުޅަހެޔޮކަމަކީ އަޅުގަނޑުމެންގެ އަތްމަތީގައިވާ އެއްޗެކެވެ. އެހެންކަމުން، މިއަދުން ފެށިގެން ނަމަވެސް، އަޅުގަނޑުމެންގެ ވިސްނުން ބަދަލުކޮށް، ދިރިއުޅުމުގެ ފުރިހަމަކަން ތަޖުރިބާކުރަން ފަށާށެވެ.