މާރިޗް މަހުގެ ނިޔަލަށް 3.38 ބިލިއަން ރުފިޔާގެ އާމްދަނީ، ރާއްޖޭގެ ކުރިމަގަށް އުއްމީދީ މަންޒަރެއް

ދިވެހިރާއްޖޭގެ އިޤްތިޞާދީ ކުރިއެރުމަކީ ޤައުމުގެ ކުރިމަގާއި ރައްޔިތުންގެ ދިރިއުޅުމާ ސީދާ ގުޅިފައިވާ ކަމެކެވެ. މިގޮތުން، 2025 ވަނަ އަހަރުގެ މާރިޗު މަހުގެ ނިޔަލަށް ފެނިގެންދިޔަ އިޤްތިޞާދީ ކުރިއެރުމަކީ ރާއްޖޭގެ މާލީ ދާއިރާގައި ފާހަގަކޮށްލެވޭ ކާމިޔާބީއެކެވެ. 

މީރާގެ ތަފާސްހިސާބުތަކުން ދައްކާ ގޮތުގައި، 2025 ވަނަ އަހަރުގެ މާރިޗު މަހުގެ ނިޔަލަށް ދިވެހިރާއްޖެއަށް ޖުމްލަ 3.38 ބިލިއަން ރުފިޔާގެ އާމްދަނީ ލިބިފައިވެއެވެ. މިއީ 2024 ވަނަ އަހަރުގެ މާރިޗު މަހާ އަޅާބަލާއިރު 15.1 އިންސައްތައިގެ އިތުރުވުމެކެވެ. އަދި ލަފާކުރެވުނު އަދަދަށްވުރެ 26.2 އިންސައްތަ އިތުރު އަދަދެކެވެ. މި ކުރިއެރުމަކީ ސަރުކާރުން ރައްޔިތުންނަށް އަމާޒުކޮށްގެން ނިންމާފައިވާ ވިސްނުންތެރި ނިންމުންތަކުގެ ސީދާ ނަތީޖާއެކެވެ.

ފާހަގަކޮށްލެވޭ ކަމަކީ، މި އާމްދަނީ ލިބިފައިވަނީ ފަތުރުވެރިންގެ އަދަދު 1.5 އިންސައްތަ ދަށްވެފައިވާ ދަނޑިވަޅެއްގައި ކަމެވެ. ނަމަވެސް، ޤައުމުން ވަނީ އުންމީދުކުރެވުނު ވަރަށްވުރެ މޮޅު ނަތީޖާއެއް ހާސިލުކޮށްފައެވެ. މިއީ ވަގުތާއި ހާލަތަށް އެކަށޭނަ ގޮތަށް އެކުލަވާލެވިފައިވާ ސިޔާސަތުތަކުގެ ކާމިޔާބީއެކެވެ.

މި ކުރިއެރުމުގައި މުހިންމު ދައުރެއް އަދާކޮށްފައިވަނީ ސަރުކާރުން ބޭރުފައިސާ މާރުކުރުމަށް ނިންމި ނިންމުމެވެ. ޚާއްޞަކޮށް، މުދަލާއި ޚިދުމަތުގެ އަގުން ނެގޭ ޓެކްސް (ޖީ.އެސް.ޓީ) އާއި ފަތުރުވެރިކަމުގެ މުދަލާއި ޚިދުމަތުގެ އަގުން ނެގޭ ޓެކްސް (ޓީ.ޖީ.އެސް.ޓީ) އިން ލިބުނު އާމްދަނީ އިތުރުވެފައިވެއެވެ. މި ދެ ބާވަތުގެ ޓެކްސްއިން އެކަނި ޖުމްލަ އާމްދަނީގެ 57 އިންސައްތައަށްވުރެ ގިނަ އަދަދެއް ހިއްސާކޮށްފައިވެއެވެ.

މި ހިސާބުތަކަކީ ކުއްލިއަކަށް އިތުރުވެފައިވާ އަދަދުތަކެއް ނޫނެވެ. މިއީ ލުއިފަސޭހަ، އިންސާފުވެރި އަދި ކުރިމަގަށް ވިސްނައިގެން ފަރުމާކުރެވިފައިވާ ނިޒާމެއްގެ ހެއްކެވެ. މިގޮތުން، ޔޫ.އެސް ޑޮލަރުން ލިބުނު އާމްދަނީ 174.23 މިލިއަން ޑޮލަރަށް އަރާފައިވެއެވެ. މީގެ ތެރެއިން 54 އިންސައްތައަކީ ފަތުރުވެރިކަމުގެ ދާއިރާއިން ލިބުނު ޖީ.އެސް.ޓީ އެވެ. މިއީ ރާއްޖެއިން އަދި ބޭރުން ލިބޭ އާމްދަނީ އެންމެ ފައިދާހުރި ގޮތުގައި ހޯދުމަށް ސަރުކާރުން ގެންގުޅޭ ހަމަހަމަ އުސޫލު ދައްކުވައިދޭ ކަމެކެވެ.

މާރިޗު މަހު ލިބުނު އާމްދަނީގެ ގާތްގަނޑަކަށް 7 އިންސައްތައަކީ ކުރިން ނުދައްކާ ހުރި ޓެކްސްއިން ލިބުނު އާމްދަނީއެވެ. މިއީ ސަރުކާރުން ދެމެހެއްޓެނިވި ގޮތެއްގައި އަދި ރައްޔިތުންނަށް ފަސޭހަވާނެހެން ޓެކްސް ހޯދުމަށް ގެންގުޅޭ ސްޓްރެޓެޖީތަކުގެ ކާމިޔާބީ ދައްކުވައިދޭ ކަމެކެވެ.

ފަތުރުވެރިކަމުގެ ދާއިރާގެ، ސިޔާސަތުތަކުގެ ލުއިފަސޭހަކަމުގެ ސަބަބުން ކުރިއެރުމާއި ދެމެހެއްޓެނިވިކަން ޔަގީންކުރެވުނެވެ. 

ސަރުކާރުގެ އާމްދަނީއާ ގުޅޭ ސްޓްރެޓެޖީން އަލިއަޅުވާލަނީ އިތުރު މުހިންމު ލަނޑުދަނޑިއެއްގެ މައްޗަށެވެ. އެއީ އިޤްތިޞާދީ ދެމެހެއްޓެނިވިކަމެވެ. އާމްދަނީ ލިބޭ ވަސީލަތްތައް ތަފާތުކުރުމުގެ ގޮތުން - އާމްދަނީން ނެގޭ ޓެކްސް އަދި ކުލީގެ ފީތަކުން ފެށިގެން އެއަރޕޯޓް ތަރައްޤީކުރުމުގެ ފީ އަދި ތިމާވެށީގެ ޓެކްސްއާ ހަމައަށް - ދިވެހިރާއްޖެއިން ވަނީ އެއް ދާއިރާއަކަށް ބަރޯސާވުން މަދުކޮށްފައެވެ.

މި ފުޅާ ދާއިރާއެއްގައި ބިނާވެފައިވާ އުސޫލަކީ ދުރު ރާސްތާގައި ދެމިހުރުމަށް ކޮންމެހެން ބޭނުންވާނެ ކަމެކެވެ. އަދި މިއީ ހަމަހަމަ ތަރައްޤީއާއި، މާލީ ޒިންމާދާރުކަމާއި، އެންމެންނަށް ފައިދާވާނެ ކުރިއެރުމަށް ސަރުކާރުން ވެފައިވާ ވަޢުދުތަކާ އެއްގޮތްވާ ކަމެކެވެ.

2025 ވަނަ އަހަރުގެ މާރިޗު މަހު ފެނިގެންދިޔަ އިޤްތިޞާދީ ކުރިއެރުމަކީ ރާއްޖޭގެ އިޤްތިޞާދީ ސިޔާސަތުތަކުގެ ކާމިޔާބީގެ ހެއްކެކެވެ. މި ކުރިއެރުމަކީ ހަމައެކަނި އަދަދުތަކެއްގެ އިތުރުވުމެއް ނޫނެވެ. މިއީ ދެމެހެއްޓެނިވި، ހަރުދަނާ އަދި ހަމަހަމަ އިޤްތިޞާދީ ކުރިއެރުމަކަށް އަމާޒުކޮށްގެން އެޅޭ ފިޔަވަޅުތަކުގެ ނަތީޖާއެކެވެ. މި ކުރިއެރުމަކީ ރާއްޖޭގެ ކުރިމަގަށް އުއްމީދީ މަންޒަރެއް ކުރަހައިދޭ ކަމެކެވެ. އަދި ރޭވުންތެރި ވެރިކަމެއްގެ ބާރު ދައްކުވައިދޭ ހެއްކެކެވެ.