ޖީލެއް ހަލާކު ވެދަނީ ، އިހުމާލުވެވުނީ ކޮންބައަކަށް ؟

މި ރީތި ޖަޒީރާ ޤައުމުގެ ފަރުދާގެ އަނެއްފަރާތުގައި ހިމޭންކަމާއެކު އުފެދެމުންދާ ބޮޑު ވަބާއެއް އެބައޮތެވެ. އެއީ މުޅި ޤައުމުގެ ހިތަށް އަަސަރުކުރުވާ އަދި  ނުރައްކާވެފައިވާ ކަމެކެވެ. އެއެއީ އަޅުގަނޑުމެންގެ ޒުވާނުންގެ ދުޅަހެޔޮކަމަށް ކުރިމަތިވެފައިވާ ނުރައްކަލެވެ.

މިއަދު މިފެންނަ ބިރުވެރި ނުރައްކާތެރި ހާލަތަކީ ޔޫރަޕާއި ހުޅަނގުގެ ލާދީނިއްޔަތާއެކު ދިވެހިރާއްޖޭގައި އެތައް ދުވަހެއް ވަންދެން ބަޔަކު މަޑުމަޑުން އާންމު ކުރަމުން ގެންދިޔަ ފާޙިޝް ކަންތައްތަކުގެ ނަތީޖާއެވެ. މިއަދު ޕޮލިހުން އާންމު ކުރި ސީސީޓީވީ ފުޓޭޖުން ފާހަގަވެގެން މިދިޔައީ ޖެންޒީ ކުދިންގެ ކުޅަދާނެ ކަމެއް މޮޅުކަމެއް ނޫނެވެ. މިއީ  މިއަދު ޤައުމުގެ ޒުވާނުންގެ ޙާލަތު ގޮސްފައިވާ ބިރުވެރި ހިސާބެވެ. އިސްލާމްދީނުގެ ރިވެތި އަޚްލާޤުން ބޭރުވެ ކުދިންގެ އަޚްލާޤު ގޮސްފައިވާ ނުބައި މިސްރާބެވެ.

ފަހަކަށް އައިސް ހިނގާދިޔަ ހާދިސާތަކުން މިކަމުގެ ނުރައްކާތެރިކަން ވަނީ ހާމަވެފައެވެ. 21 އަހަރުގެ ޒުވާން އަންހެނަކު މަސްތުވާތަކެތީގެ ވަބާގައި ޖެހި، އިމާރާތަކުން ވެއްޓި މަރުގެތުންފަތް މައްޗަށް ދިޔަ ހިތާމަވެރި ހާދިސާއަކީ މީގެ އެއް މިސާލެވެ. މިފަދަ ހާދިސާތަކަކީ ވަކިން އެކަހެރިކޮށް ހިނގާ ކަންކަމެއް ނޫނެވެ. މިއީ އަޅުގަނޑުމެންގެ ޒުވާން ޖީލަށް ކުރިމަތިވެފައިވާ ފުން މައްސަލައެއްގެ އަލާމާތެވެ.

މިއަދު މިކަންކަމާމެދު ފިޔަވަޅު ނާޅައިފިނަމަ ދެން އެ ޖީލުތަކަށް ވާނީ ކިހިނެއްތޯ ސުވާލު އުފެދެއެވެ. ފްރައިޑޭ ނައިޓް ޕާޓީ، ގޭމް ނައިޓް، ކަރޯކޭ ނައިޓް، ޕާޓީ އައުޓް ، ބަރތްޑޭ ޕާޓީ ، ގްރޫޕް ސްޓަޑީ މިހެން ކިޔާފައި ދަރިން ދަނީ ކޮން ތަނަކަށްތޯ ބަލަން ޖެހެއެވެ. މިކަންކަން ކަމަކީ ނެތް ކަންކަން ކަމުގައި ބަލައި އެކަމާއިމެދު އިހުމާލު ވެވޭކަށް ނެތެވެ. އިސްލާމްދީނުގެ ރިވެތި އަޚްލާޤު ކުދިންގައި އަށަގެންނެވުމަށް ފާޙިޝް ޢަމަލުތަކުން ކުދިން ސަލާމަތްކުރަން ބެލެނިވެރިން މަސައްކަތް ކުރަން ޖެހެއެވެ. މާދަމާ މިފަދަ ޙާލަތަކަށް ދާނީ ކާކުގެ ކޮން ދަރިއެއްކަމެއް ނޭނގެއެވެ. މި ކަމާމެދު ވިސްނާ ފިކުރުކުރަން ޖެހެއެވެ.

ސަރުކާރުން މިކަމުގެ ނުރައްކާތެރިކަން ވަނީ ފާހަގަކޮށްފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކ. ކާށިދޫ، ނ. ވެލިދޫ އަދި ލ. އަތޮޅުގައި ރީހެބިލިޓޭޝަން ސެންޓަރުތައް ޤާއިމުކުރުމުގެ ޕްލޭނެއް އިޢުލާނުކުރައްވާފައެވެ. އަދި މަސްތުވާތަކެއްޗާބެހޭ ޤާނޫނާ އެއްގޮތްވާ ގޮތުގެމަތިން މުޖުތަމަޢުގެ ތެރޭގައި ރީހެބިލިޓޭޝަން ޚިދުމަތްތައް ދިނުމަށް ހުއްދަ ދެއްވާފައިވެއެވެ. މި މަސައްކަތްތަކުގެ މަޤްޞަދަކީ ފަރުވާ ހޯދުމަށް ފަސޭހަ މަގުތަކެއް ތަނަވަސްކޮށްދީ، އެޑިކްޝަނާ ކުރިމަތިލާ މީހުންނަށް އެހީތެރިކަން ފޯރުކޮށްދިނުމެވެ.

ނަމަވެސް، މި މައްސަލައަކީ ހަމައެކަނި ސަރުކާރުގެ މަސްއޫލިއްޔަތެއް ނޫނެވެ. މުޅި މުޖުތަމަޢުގެ ޒިންމާއެކެވެ. ބެލެނިވެރިން، މުދައްރިސުން، ދީނީ ޢިލްމުވެރިން އަދި ސިޔާސަތު ކަނޑައަޅާ ފަރާތްތަކުން އެއްބައިވެގެން މަސައްކަތް ކުރަންޖެހެއެވެ. އަޅުގަނޑުމެންގެ ޒުވާނުންނަށް ރަނގަޅު މަގު ދައްކައި، އިސްލާމްދީނުގެ ރިވެތި އަޚްލާޤާއި އާދަކާދަތަކަށް އަހުލުވެރި ކުރުވަން ޖެހެއެވެ.

އިސްލާމްދީނުގައި ފަރުދީ ފުރާނައިގެ ޤަދަރާއި މުޖުތަމަޢުގެ ދުޅަހެޔޮކަމަކީ ވަރަށް މުހިންމު ކަންކަމެވެ. މި އުޞޫލުތަކަށް ތަބާވެ، އަޅުގަނޑުމެން ޖެހެނީ މި ކަމުގެ ޝިކާރައަކަށްވެފައިވާ މީހުންނަށް ރަޙުމަތްތެރިކަމާއި އެހީތެރިކަން ފޯރުކޮށްދޭށެވެ. އަދި ކޮންމެ މީހަކީވެސް މުޖުތަމަޢަށް ފައިދާހުރި ގޮތެއްގައި ޙިއްޞާވެވޭނެ ފަރާތެއްކަން ޤަބޫލުކުރަންޖެހެއެވެ.

ކުރިއަށް ދާނެ މަގަކީ އެއްބައިވަންތަކަމާއި، އޯގާތެރިކަމާއި، ދެމެހެއްޓެނިވި އަޒުމެވެ. އާއިލާތަކާއި، މުދައްރިސުންނާއި، ދީނީ އިލްމުވެރިންނާއި، ސިޔާސަތު އެކުލަވާލާ ފަރާތްތައް އެއްބައިވެގެން މަސައްކަތްކޮށްގެން، އަޅުގަނޑުމެންނަށް ޒުވާނުންނަށް ރަނގަޅު މަގު ދެއްކި، އަނދިރިން އަލިކަމަށް ނެރެ، ދިވެހިރާއްޖެއަށް އުޖާލާ މުސްތަޤުބަލެއް ކަށަވަރު ކުރެވޭނެއެވެ.

މިއަދު އަޅުގަނޑުމެން ވިސްނާލަން ޖެހެނީ، މާދަމާ މިފަދަ ޙާލަތަކަށް ދާނީ ކާކުގެ ކޮން ދަރިއެއްކަމެއް ނޭނގޭކަމެވެ. އެހެންކަމުން، މިއަދުން މިއަދަށް އަޅުގަނޑުމެން އެންމެން މިކަމާމެދު ފުންކޮށް ވިސްނައި ފިކުރުކޮށް، އަޅަންޖެހޭ ފިޔަވަޅުތައް އަޅަން ފަށަންޖެހެއެވެ. އަޅުގަނޑުމެންގެ ދަރިން ރައްކާތެރިކޮށް، އިސްލާމްދީނުގެ ރިވެތި އަޚްލާޤުގެ މަތީގައި ތަރުބިއްޔަތުކޮށް، ދިވެހި މުޖުތަމަޢުގެ  އަގުހުރި އާދަކާދަތައް ދަމަހައްޓައި، ޒުވާނުންނަކީ ޤައުމަށް ފައިދާހުރި، އުފެއްދުންތެރި ބަޔަކަށް ހެދުމަކީ އަޅުގަނޑުމެން އެންމެންގެ ޒިންމާއެކެވެ.

މިއަދު މިފެންނަ ނުރައްކާތެރި ޙާލަތަކީ އަޅުގަނޑުމެން އެންމެން ވިސްނައި ފިކުރުކުރަންޖެހޭ ކަމެކެވެ. މިއީ ވަކި ފަރުދެއްގެ ނުވަތަ ވަކި ފަރާތެއްގެ އެކަނި މައްސަލައެއް ނޫނެވެ. މިއީ މުޅި ޤައުމުގެ މައްސަލައެކެވެ. އަޅުގަނޑުމެންގެ ދަރިންނާއި ދަރިންގެ ދަރިންގެ މުސްތަޤުބަލާ ގުޅިފައިވާ ކަމެކެވެ. އެހެންކަމުން، މިއަދުން މިއަދަށް އަޅުގަނޑުމެން އެންމެން އެއްބައިވެ، އިސްލާމްދީނުގެ ރިވެތި އުޞޫލުތަކާއި ދިވެހިންގެ މާތް އާދަކާދަތަކުގެ މައްޗަށް ބިނާކޮށް، އަޅުގަނޑުމެންގެ ޒުވާން ޖީލު ސަލާމަތްކުރުމަށް މަސައްކަތްކުރަން ޖެހެއެވެ.