އިރާން އަށްވެސް ޣައްޒާ އާއި ބެއިރޫތް އަށް ހެދިގޮތް ހަދާލާނެ ކަމުގެ އިޝާރާތެއް އިޒްރާއިލުން ދީފި!

އިރާން އަށްވެސް ޣައްޒާ އާއި ބެއިރޫތް އަށް ހެދިގޮތް ހަދާލާނެ ކަމުގެ އިންޒާރެއް އިޒްރާއިލްގެ ޑިފެންސް މިނިސްޓަރ ދީފިއެވެ.

އިޒްރާއިލްގެ ޑިފެންސް މިނިސްޓަރ ޔޯއަވް ގަލަންޓް ބުނެފައިވަނީ އީރާނުން އިޒްރާއީލަށް ގެއްލުންދޭން މަސައްކަތް ކުރާނަމަ ނިމުމުގައި ޣައްޒާ ނުވަތަ ބެއިރޫތު ފަދަ ގޮތަކަށް އިރާންވެސް ފެނިދާނެ ކަމަށެވެ. މިދިޔަ ހަފްތާގައި އިރާނުން ވަނީ އިޒްރާއިލު މީހުން ފަލަސްޠީނުގެ ބިމުން ނިގުޅައިގަނެ އެބައިމީހުން ވެރިވެގަނެ އާބާދު ކޮށްފައިވާ ސަރަަހައްދަށް ހަމަލާތަކެއް ދީފައެވެ.

މިހަމަލާތަކާއި ގުޅިގެން އިޒްރާއިލްގެ ޑިފެންސް މިނިސްޓަރ ބުނެފައިވަނީ އީރާނުގެ ހަމަލާތަކުގެ ސަބަބުން އެބައިމީހުންގެ ވައިގެ ހަތިޔާރުތަކަށް އެއްވެސް ގެއްލުމެއް ލިބިފައި ނުވާ ކަމަށެވެ.  އެއްވެސް މަތިންދާބޯޓެއް ހަލާކުވެފަ ނުވާ ކަމަށްވެސް ވަނީ ބުނެފައެވެ. 

އިޒްރާއިލުގެ ޑިފެންސް މިނިސްޓަރ ބުނެފައިވަނީ އިޒްރާއިލަށް  ގެއްލުމެއް ދޭން ކުރާ މަސައްކަތެއްގެ ސަބަބުން އެބަޔަކާ ދެކޮޅަށް ފިޔަވަޅު އެޅުމަށް ފަސްޖެހޭނެ ކަމަށް ހީކުރާ ޤައުމަކުން ޣައްޒާ އާއި ބެއިރޫތަށް ބަލާލަން ޖެހޭ ކަމަށެވެ. 

އަދި އިޒްރާއިލަކީ ދިފާޢު ވުމުގައިވެސް ހަމަލާދިނުމުގައިވެސް ބާރުގަދަ ބައެއް ކަމަށެވެ. 

އިޒްރާއިލުން މިއަދުވެސް ދަނީ ލުބްނާންގެ ބެއިރޫތް އަށް ނުރައްކާތެރި ހަމަލާތަކެއް ދެމުންނެވެ. މިހަމަލާ ތަކުގެ ސަބަބުން މުޅި ލުބްނާންގައި ވަނީ ބިރުވެރިކަން ފެތުރިގެން ގޮސްފައެވެ. ހަމަމިއާއި އެކު ޣައްޒާ އަށް ދެމުންދާ ހައްދުފަހަނަ އެޅި ހަމަލާތައް ވެސް ގެންދަނީ ކުރިއަށެވެ.