ބެއިރޫތްގައި ސަލާމަތުން ތިބެވޭނެ އެއްވެސް ތަނެއް ނެތުން ގާތް!

ބެއިރޫތްގައި ސަލާމަތާއި ރައްކާތެރިކަމާއި އެކު ތިބެވޭނެ އެއްވެސް ތަނެއް ނެތުން ގާތްވެއްޖެ ކަމަށް ލުބްނާންގެ ބެއިރޫތްގެ އާންމެއް ކަމަށްވާ އިމާދު އަލް ރަފީއީ ބުނެފިއެވެ.

އިމާދު އަކީ ބެއިރޫތަށް އިޒްރާއިލުން ދެމުންދާ ހަމަލާތަކުގެ ސަބަބުން ގެދޮރު ހަލާކުވެ އޭނާގެ ކާރުގައި ދިރިއުޅެން މަޖުބޫރުވެފައިވާ މީހެކެވެ. 

“މިހާރު ބެއިރޫތުން ފެންނަމުންދާ މަންޒަރުތަކުން ބެއިރޫތް ފަނާވަމުންދާ ވަރު އަންދާޒާކުރަން އެބައިނގޭ، އެމަންޒަރުތަކުން އަންދާޒާ ކޮށްލަން އިނގޭ ބެއިރޫތްގައި ރައްކާތެރި ކަން ގެއްލިދާން މާގިނަ ދުވަހެއް ނެތްކަން” އިމާދު އަލްޖަޒީރާ އަށް ބުނެފައިވެއެވެ. 

އިޒްރާއީލުން ބެއިރޫތަށް  ދިން ހަމަލާތަކުގެ ސަބަބުން މުޅި ލުބުނާނުގައި ބައި މިލިއަނަށް ވުރެ ގިނަ މީހުން ގެދޮރު ގެއްލިފައިވާ ކަމަށް އދ. އިން ބުނެފައިވެއެވެ. އިޒްރާއިލުގެ ބޮމުގެ ހަމަލާތައް ހުއްޓުމެއް ނެތި ކުރިއަށް ގެންދާއިރު، އެ އަދަދު އިތުރުވުން އެކަށީގެންެވާ ކަމަށް އަލްޖަޒީރާގައި ބުނެފައިވެއެވެ.

 "އަހަރެމެން ގެދޮރު ގެއްލިފައިވާތާ މިހާރު 10 ދުވަސް ވެއްޖެ، އަހަރެމެންގެ އަތުގައި ކާއެއްޗެއް ނެތް. ގެއިން އަދި ކީއްކުރަން އެހެން ތާކުންވެސް އައު ހެދުމެއް ގެނައުމަށްވެސް މިތިބީ ނުކުޅެދިފަ، އަހަރެމެން ގެއިން ނުކުމެގެން އައީ މިތަނަށް، ކޮންމެ ރެއަކު ހަމަލާތައް އެބަދޭ، ނިދި ނުލިބޭ. އަހަރެމެންގެ ހާލަތު ބިރުވެރި.” ގެދޮރު ގެެއްލިފައިވާ ބެއިރޫތްގެ އެހެން މީހެއް ކަމަށްވާ ޙަސަން އަލްޖަޒީރާއަށް ބުނެފައިވެއެވެ. 

އިޒްރާއިލުގެ ހަމަލާތަކުގެ ސަބަބުން ލުބްނާންގެ އާބާދީގެ ސާޅީސް ޕަސެންޓް މީހުން ގެދޮރު ގެއްލި ބޯހިޔަވަހިކަން ގެއްލިފައިވާ ކަމަށް އަލްޖަޒީރާގައި ބުނެފައިވެއެވެ.