ފާއިތުވި 24 ގަޑިއިރުތެރޭގައި ޣައްޒާގެ 45 މީހަކު ޝަހީދުކޮށްލައިފި!

ފާއިތުވި 24 ގަޑިއިރުތެރޭގައި ޣައްޒާގެ 45 މީހަކު އިޒްރާއިލުން ޝަހީދުކޮށްލައިފައިވާ ކަމަށް ފަލަސްޠީނުގެ ޞިއްޚީ ވުޒާރާއަށް ހަވާލާދީ އަލްޖަޒީރާގައި ބުނެފިއެވެ. 

އަލްޖަޒީރާގައި ބުނެފައިވަނީ ފާއިތުވި 24 ގަޑިއިރުތެރޭ 45 މީހަކު ޝަހީދުވެފައިވާއިރު، 130 މީހަކު ވަނީ ޒަޚަމްވެފައިކަމަށެވެ.

ޣައްޒާގެ އުތުރުގައި ހުންނަ ކަމަލް އަދްވާން ހޮސްޕިޓަލް ހުސްކުރުމަށް އިޒްރާއިލްގެ ސިފައިން ނެރުނު އަމުރާއި އެއްގޮތައް އެހޮސްޕިޓަލް ހުސްކުރުމުގެ މަސައްކަތް މިހާރު ކުރަމުންދާ ކަމަށް އަލްޖަޒީރާގައި ބުނެފައިވެއެވެ. އަދި ހޮސްޕިޓަލް ތެރޭގައި މިހާރު ބާކީ މަދު ބަލިމީހަކާއި ނަރުހުން ތަކެކެވެ. އަދި އެމީހުންނަކީ މިވަގުތު ދާނެ ތަނެއް ނެތް ބައެއް ކަމަށް ވެސް އަލްޖަޒީރާގައި ބުނެފައިވެއެވެ. 

އަލްޖަޒީރާގައި ބުނެފައިވަނީ ފާއިތުވި 24 ގަޑިއިރުތެރޭގައި އިޒްރާއީލުގެ ސިފައިން ހިފާފައިވާ ހުޅަނގު އައްސޭރީގައި ފަލަސްތީނުގެ 25 މީހަކު އިޒްރާއިލްގެ ސިފައިންގެ ބާރުގެ ދަށަށް ގެންގޮސްފައިވާ ކަމަށެެވެ. އޭގެ ތެރޭގައި ނޫސްވެރިއަކާއި ކުރީގެ ގައިދީން ހިމެނެއެވެ.

ޣައްޣިލިއާ ގެ ގެއަކަށް ވަދެ އިޒްރާއިލް ސިފައިން ގެއްލުންދީފައި. ފޮޓޯ:ޤުދުސް ނެޓްވޯކް

 ފަލަސްޠީނުގެ ގައިދީންގެ ޖަމިއްޔާ އާއި ކޮމިޝަން ފޯ ޑިޓެއިންސް އެންޑް އެކްސް ޑިޓެއިންސް އެފެއާޒް ގުޅިގެން ވަފާގެ ރަސްމީ ނޫސް އެޖެންސީއާ ހަވާލާދީ ނެރުނު ބަޔާނެއްގައި ބުނެފައި ވަނީ ފަލަސްޠީނު މީހުން ހައްޔަރުކޮށްފައިވަނީ ހިބްރޫން، ޤަލްކިލިޔާ، ޖެނިން، ރަމައްﷲ، ނާބުލްސް، ތުލްކަރަމް، ތުއްބާސް އަދި ބައިތުލަހްމު ހިންގި ރެއިޑްތަކުގައި ކަމަށެވެ .