ޣައްޒާ ފަދައިން ލުބްނާންވެސް ފަނާކޮށްލަފާނެ ކަމަށް ނަތަންޔާހޫ އިންޒާރުދީފި!

ފަލަސްޠީނުގެ ޣައްޒާ ފަދައިން ލުބްނާންވެސް ފަނާކޮށްލަފާނެ ކަމަށް ބުނެ އިޒްރާއިލުގެ ބޮޑުވަޒީރު ބެންޖަމިން ނަތަންޔާހޫ އިންޒާރުދީފިއެވެ. 

ނަތަންޔާހޫ މިހެން ބުނެފައިވަނީ އޭނާ އިރާނުގެ ރައްޔިތުންނަށް އަންގާރަދުވަހު ފޮނުވި ވީޑިއޯ މެސެޖެއްގައެވެ.

މިމެސެޖުގައި އޭނަ ބުނެފައިވަނީ ހިޒްބުﷲގެ ލީޑަރ ޙަސަން ނަޞްރުﷲ ޝަހީދުކޮށްލީ އިޒްރާއިލުން ކަމަށް ބުނެފައެވެ. އަދި އެނާގެ ބަދަލުގައި ނެގި ލީޑަރުވެސް ޝަހީދުކޮށްލައިފައި ވަނީ ހަމަ އިޒްރާއިލުން ކަމަށް ވަނީ ބުނެފައެވެ. 

ނަތަންޔާހޫ އިރާންގެ ރައްޔިތުންނަށް ފޮނުވި މެސެޖުގައި އިތުރަށް ބުނެފައިވަނީ ހިޒްބުﷲ އަކީ މިހާރު ކުރީގެ ހިޒްބުﷲ ނޫން ކަމަށާއި ހިޒްބުﷲ މިހާރު ކުރިއަށްވުރެ ބަލިކަށިވެފައިވާ ކަމަށެވެ. 

މިދިޔަ ހަފްތާގައި ލުބްނާންގެ ބެއިރޫތައް ދިން ހަމަލާއަކަށްފަހު އިޒްރާއިލްގެ ސިފައިން ބުނެފައިވަނީ އެމީހުންގެ ހަމަލާގައި ނަސްރުއްﷲ ގެ ވަލީއަހުދު ކަމަށް ލަފާކުރެވޭ ހިޒްބުއްﷲ ގެ އިސް ކޮމާންޑަރު ހާޝިމް ސަފީއްދީނަށް އަމާޒުކޮށްފައިވާ ކަމަށެވެ. ނަމަވެސް އޭނާއަށް ވީގޮތެއް އަދި އޮޅުން ފިލައިފައިނުވާ ކަމަށްވެސް ވަނީ ބުނެފައެވެ.

ނަތަންޔާހޫގެ މި މެސެޖަށް ހިޒްބުއްﷲ ގެ ޖަވާބެއް އަދި އެއް އިއްވައިފައެއް ނުވެއެވެ.

“ޣައްޒާއިން ފެންނަމުންދާ ފަނާކުރުވަނިވި ޙާލަތައް ލުބްނާން ވެއްޓުމުގެ ކުރިން ސަލާމަތްވުމުގެ ފުރުސަތު އަދި ލުބްނާނަށް އެބައޮތް” ނަތަންޔާހޫ ލުބްނާންގެ ރައްޔިތުންނަށް ފޮނުވި މެސެޖުގައި ބުނެފައިވެއެވެ. 

ނަތަންޔާހޫގެ ވަރުގަދަ މި އިންޒާރު ލުބްނާންގެ ރައްޔިތުންނަށް ދީފައިމިވަނީ، އިޒްރާއިލްގެ އަސްކަރިއްޔާއިން ލުބުނާނަށް އިތުރު ސިފައިން ފޮނުވައި، ލުބްނާންގެ ދެކުނުގެ އައްސޭރިފަށުގެ ސަރަހައްދުތަކާއި، ވެރިރަށް ބެއިރޫތުގެ ދެކުނުގައި މީހުން ދިރިއުޅޭ  ސަރަހައްދުތަކުގައި ތިބި މީހުން އެސަރަހައްދުތައް  ދޫކޮށް ނުކުތުމަށް އިޒްރާއިލުން ނެރެފައިވާ އަމުރާއިވެސް އެކުއެވެ.

 ހިޒްބުއްﷲ އިން ކުރިން ބުނެފައި ވަނީ އިޒްރާއީލުގެ ހައިފާއަށް ރޮކެޓް ހަމަލާއެއް ދީފައިވާ ކަމަށާއި އެއީ އެ ސަރަހައްދުގައި މިހާތަނަށް ދިން އެންމެ ބޮޑު ރޮކެޓް ހަމަލާ ކަމަށެވެ. 

އިޒްރާއީލުގެ އަސްކަރިއްޔާއިން ބުނެފައިވަނީ ލުބުނާނުން ފޮނުވާލި 85 ހަމަލާއެއް އިސްރާއީލުގެ މަތިން ހުރަސްކޮށްފައިވާ ކަމަށެވެ.

އިޒްރާއިލުން ލުބްނާނަށް ދެމުންދާ ހަމަލާތަކާއި، އެމީހުން ލުބްނާނަށް އަތްގަދަކުރުން ގަދަކޮށްފައިމިވަނީ ހިޒްބުއްﷲ އާއި އިޒްރާއިލުން ހަމަލާ ބަދަލުކުރަން ފެށިތާ ގާތްގަނޑަކަށް އަހަރެއްހާ ދުވަސް ފަހުންނެވެ.

ހިޒްބުއްﷲ އިން މިހަމަލާތައް ފަށައިފައިވަނީ އިޒްރާއިލުން ޣައްޒާގެ ނިކަމެތި ރައްޔިތުންނަށް ދޭން ފެށި ހަމަލާތަކާއި އެކުއެވެ. އަދި  އެ ޖަމާއަތުން ބުނެފައިވަނީ އެހަމަލާތައް ދެމުންދަނީ ޣައްޒާގައި ތިބި ފަލަސްތީނުގެ ރައްޔިތުންނަށް ވާގިވެރިވުމުގެ ގޮތުން ކަމަށެވެ.