ދުނިޔެ
ލުބްނާނަށް ދެމުންދާ ހަމަލާތައް ހުއްޓާލުމަށް އެޤައުމުގެ ބޮޑުވަޒީރު ގޮވާލައްވައިފި!
ލުބްނާންގެ ބޮޑުވަޒީރު ނަޖީބް މިކާޓީ. ފޮޓޯ:ރޮއިޓާސް
އިޒްރާއިލުން ލުބްނާނަށް ދެމުންދާ ހަމަލާތައް ހުއްޓާލުމަށް ލުބްނާންގެ ބޮޑުވަޒީރު ނަޖީބް މިކާޓީ ގޮވައިލައްވައިފިއެވެ.
ލުބްނާންގެ ބޮޑުވަޒީރު ގޮވައިލައްވައިފައިވަނީ ވަގުތުން ވަގުތަށް ހަނގުރާމަ ހުއްޓާލުމަށެވެ.
ލުބްނާނަށް އަމާޒުކޮށް އިޒްރާއިލުން އިއްޔެ ދިން ހަމަލާތަކުގައިވެސް 139 މީހަކު ވަނީ ޝަހީދުވެފައެވެ. މިކަމާ ގުޅިގެން ބޮޑުވަޒީރު މިކާޓީ ވިދާޅުވެފައިވަނީ އިޒްރާއިލްގެ ހަމަލާތަކުގައި މުޅިންވެސް ޝަހީދުވެފައިވަނީ އާންމުން ކަމަށެވެ.
އަދި މިކަމަކީ އެއްގޮތަަކަށްވެސް ބަލައިގަނެވޭނެ ކަމެއް ނޫން ކަމަށެވެ.
މިކާޓީވަނީ ލުބްނާންގެ ދެކުނުގައި ހަރަކާތްތެރިވާ ޔޫއެންގެ “ޕީސްމޭކަރ”ގެ ޓީމަށް އިޒްރާއިލުގެ ހަމަލާތައް އަމާޒުކުރާ ކަން ފާހަގަކުރައްވައިފައެވެ.
މީގެއިތުރުން މިކާޓީ ވިދާޅުވެފައިވަނީ ލުބުނާނުގައި އިޒްރާއީލުން ކުރަމުންދާ ކަންކަމަކީ އެކަންކަމުގެ ސަބަބުން ބައިނަލްއަޤްވާމީ މުޖުތަމަޢަށް ހޭލަން ވެއްޖެ ކަންތައްތަކެއް ކަމަށެވެ. އޭނާ އިތުރަށް ވިދާޅުވީ އިޒްރާއިލުން ލުބްނާންގައި ހިންގަމުންގެންދަނީ އަނިޔާވެރިކަމުގައި ހައްދުފަހަނައަޅައިފައިވާ ޢަމަލުތަކެއް ކަމަށެވެ.
ހަނގުރާމަ ހުއްޓާލުމުގެ އެއްބަސްވުން އޮތީ ތައްޔާރަށް ކަމަށާއި ކުރިއަށް އޮތީ ހަމައެކަނި އެކަމަށް އެއްބަސްވުމާއި އެކަންކަން ތަންފީޒު ކުރުން ކަމަށެވެ.
ލުބްނާންގައި ތިބި އަލްޖަޒީރާގެ ރިޕޯޓަރުން އަލްޖަޒީރާގައި ރިޕޯޓް ކޮށްފައިވާ ގޮތުގައި އިޒްރާއިލުން ދިން ހަމަލާއެއް ލުބުނާނުގެ ދެކުނުގެ ޓައިރ ޑިސްޓްރިކްޓްގެ ބަޒޫރިޔާ އަވަށަށް އަރައިފައިވެއެވެ. އަދި މިހަމަލާގައި މީހަކު ޝަހީދުވިކަމެއް ނުވަތަ މީހަކަށް އަނިޔާވިކަމެއް އަދިއެއް އެނގިފައެއް ނުވެއެވެ.