ދިގުމުއްތަތެއްގައި އެއަރޕޯރޓް މެއިންޓެއިން ނުކުރެވުމާއިއެކު ކޫއްޑޫ އަށް މޯލްޑިވިއަންއިން ކުރަމުންދިޔަ ދަތުރު ހުއްޓުމަކަށް

 ކޫއްޑޫ އެއަރޕޯޓުގެ ރަންވޭގެ ޙާލަތު ދަށްވެ، ދިގު މުއްދަތަކަށް އެއަރޕޯޓުގެ މަރާމާތު މަސައްކަތްތައް ނުކުރެވި ލަސްވުމުގެ ސަބަބުން، މޯލްޑިވިއަން އެއަރލައިންސްއިން ކޫއްޑޫއަށް ކުރަމުން އައި ދަތުރުތައް ވަގުތީގޮތުން މެދުކަނޑާލުމަށް ނިންމާފައިވާ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން، މުޙައްމަދު އަމީން، އެމަނިކުފާނުގެ އެކްސް އެކައުންޓުގައި ހާމަކުރައްވާފައިވެއެވެ.

 މިނިސްޓަރ އަމީން ވިދާޅުވީ، ރަންވޭގެ ޙާލަތު ދަށްވުމުގެ ސަބަބުން މޯލްޑިވިއަންގެ ދެ މަތިންދާބޯޓަކަށް ގެއްލުން ލިބިފައިވާކަމަށެވެ. މި މައްސަލަ ޙައްލުކުރުމަށްޓަކައި މިނިސްޓްރީގެ އިސްނެގުމުގެ ދަށުން، ސިވިލް އޭވިއޭޝަން އޮތޯރިޓީ، އެއަރޕޯޓް އޮޕަރޭޓަރ އަދި ކަމާގުޅުންހުރި އެހެނިހެން ފަރާތްތަކާ ގުޅިގެން މަސައްކަތްތައް ފަށާފައިވާ ކަމަށްވެސް މިނިސްޓަރ އަމީން ހާމަކުރެއްވިއެވެ.

"އިރާދަކުރެއްވިއްޔާ ވަރަށް އަވަސް މުއްދަތެއްގެ ތެރޭގައި މި މައްސަލަ ޙައްލުކޮށް، އެއަރޕޯޓް އާންމު ޙާލަތަށް ގެނެވޭނެ"، މިނިސްޓަރ އަމީން ވިދާޅުވިއެވެ.

 މި ހާދިސާގެ ސަބަބުން ކޫއްޑޫއަށް ދަތުރުކުރާ ފަސިންޖަރުންނަށް ވަގުތީ ދަތިތަކަކާ ކުރިމަތިލާން ޖެހިދާނެ ކަމަށް ލަފާކުރެވެއެވެ. ނަމަވެސް، ސަރުކާރުން މި މައްސަލަ އަވަސް ފުރުޞަތެއްގެ ތެރޭގައި ޙައްލުކުރުމަށް މަސައްކަތްކުރަމުންދާކަން މިނިސްޓަރ އަމީންގެ ބަސްފުޅުން ދޭހަވެއެވެ. އެއަރޕޯޓް އާންމު ޙާލަތަށް އަނބުރާ ގެނައުމަށްފަހު މޯލްޑިވިއަންގެ ދަތުރުތައް އަލުން ފެށޭނެ ތާރީޚެއް މި ވަގުތު ހާމަކުރައްވާފައެއް ނުވެއެވެ.