ދެދުވަސްތެރޭ ހުޅަނގު އައްސޭރިން ފަލަސްޠީނުގެ 30 މީހަކު ހައްޔަރުކޮށްފި!

އިޒްރާއިލުގެ ޔަހޫދީން ގަދަކަމުން އަރައިގަނެ ހިފައިފައިވާ ފަލަސްޠީނުގެ ހުޅަނގު އައްސޭރިން ދެދުވަސްތެރޭ ފަލަސްޠީނުގެ 30 މީހަކު ހައްޔަރުކޮށްފިއެވެ. 

 ފަލަސްޠީނުގެ ޕްރިޒަނަރސް ސޮސައިޓީ އާއި ކޮމިޝަން އޮފް ޑިޓެއިންސް އެންޑް އެކްސް ޑިޓެއިންސް އެފެއާޒްގެ ބަޔާނަކަށް ހަވާލާދީ އަލްޖަޒީރާގައި ބުނެފައިވަނީ ފާއިތުވި ދެދުވަސް ތެރޭގައި ހައްޔަރުކުރި މީހުންގެ ތެރޭގައި ކުރިން އިޒްރާއިލް ސިފައިން ހައްޔަރުކޮށް ދޫކޮށްލައިފައިވާ މީހުންވެސް ހިމެނޭކަމަށެވެ. 

މީގެއިތުރުން އެބަޔާނުގައި ބުނެފައިވަނީ އިޒްރާއިލުން ފާއިތުވި ދެދުވަސްތެރޭގައި ހައްޔަރުކުރި މީހުން ހައްޔަރުކޮށްފައިވަނީ އިޒްރާއީލުން ހިފާފައިވާ ޖެނިން، ބައިތުލްމަޤްދިސް، ނަބްލޫސް، ޤަލްކިލިޔާ އަދި ރަމައްﷲ ގެ އަވަށްތަކުގައި ހިންގި ޢަސްކަރީ ރެއިޑް ޙަރަކާތްތަކުގެ ތެރެއިން ކަމަށެވެ.

2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ހިފާފައިވާ ހުޅަނގު އައްސޭރިއާއި އިރުމަތީ ޤުދުސްއިން ފަލަސްޠީނުގެ 11،200 އަށް ވުރެ ގިނަ މީހުން ވަނީ ހައްޔަރުކޮށްފަ އެވެ.

ވޭތުވެދިޔަ އަހަރެއްހާ ދުވަހުގެ ތެރޭގައި މިފަދަ ބޮޑު އަދަދެއްގެ މީހުން ހައްޔަރުކުރެވިފައިވާއިރު، 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް އިޒްރާއީލުގެ ހަމަލާތަކުގައި ޝަހީދުވެފައިވާ މީހުންގެ އަދަދު 42,000 އަށްވުރެ އިތުރުވެފައިވެއެވެ. މީގެ އިތުރުން، އެކި ދަރަޖައިގެ އަނިޔާ ލިބިފައިވާ މީހުންގެ އަދަދު 98,000 އަށްވުރެ މަތިވެފައިވާކަން ފާހަގަކުރެވެއެވެ.