ސަޢުދީގެ އެހީގެ ސާމާނު ހިފައިގެން ދިޔަ ފުރަތަމަ ބޯޓު ބެއިރޫތުގައި ޖައްސައިފި!

އިޒްރާއިލްގެ ހަމަލާތަކުގައި ހަލާކުވަމުންދާ ލުބްނާންގެ ބެއިރޫތައް ސަޢުދީޢަރަބިއްޔާއިން ވައިގެން މަގުން ފުރަތަމަ ފޮނުވި އެހީގެ ގާފިލާ ބެއިރޫތް އެއަރޕޯޓަށް ޖައްސައިފިއެވެ. 

ސައުދީގެ އެހީދޭ އެޖެންސީ ކޭއެސްރިލީފް އިން އާދީއްތަ ދުވަހު ވަނީ ބެއިރޫތައް އެހީ ފޮނުވުމަށް ޚާއްޞަ ކޮށް"އެއަރ ބްރިޖް"ގެ ނަމުގައި ހަރަކާތެއް ފަށައިފައެވެ.

މި ހަރަކާތުގެ ދަށުން އެންމެ ފުރަތަމަ ފޮނުވި ބޯޓުގައި މެޑިކަލް ސާމާނާއި ކާބޯތަކެތީގެ އެހީ ލުބުނާނަށް ވަނީ ގެންގޮސްފައެވެ. 

 މިއީ ލުބުނާނުގެ ހަނގުރާމައިގެ އަސަރު ކުރި މީހުންނަށް އެހީތެރިވުމަށް ސަޢުދީ ރަސްގެފާނު ސަލްމާނާއި ވަލީއަހުދު މުޙައްމަދު ބިން ސަލްމާންގެ އިރުޝާދުގެ ދަށުން ކުރިއަށް ގެންދާ ހަރަކާތެކެވެ. 

ރިޔާޟްގެ ކިންގް ޚާލިދު އިންޓަނޭޝަނަލް އެއާޕޯޓުން ފުރި ފުރަތަމަ ސައުދީ އެހީ މަތިންދާބޯޓު ބެއިރޫތަށް ޖައްސާފައި ވަނީ 40 ޓަނަށް ވުރެ ގިނަ ކާބޯތަކެއްޗާއި ޞިއްޙީ ފަރުވާއަށް ބޭނުންވާ ސާމާނާއި ރިލީފް މެޓީރިއަލްސް ހިފައިގެންނެވެ.

 އެއާއެކު ސަލާމަތީ އޮޕަރޭޝަންތަކަށް ރިލީފް ޓީމެއް ވެސް މި ބޯޓުގައި ވަނީ ބެއިރޫތައް ގޮސްފައެވެ. 

ސެޕްޓެމްބަރު 23 ވަނަ ދުވަހުން ފެށިގެން އިޒްރާއީލުން ދަނީ ގޮތެއްގައި ލުބުނާނުގައި ހިޒްބުاللهގެ ބާރުގަދަ ތަންތަން ކަމަށް ބުނެ ބެއިރޫތްގެ އެކި ތަންތަނަށް އަމާޒުކޮށްގެން ވަރުގަދަ ވައިގެ ހަމަލާތަކެއް ދެމުންނެވެ.

މިހަމަލާތަކުގައި މިހާތަނަށް 1،150 އަށް ވުރެ ގިނަ މީހުން ވަނީ ޝަހީދުވެފައެވެ. އަދި މިހަމަލާތަކުގެ ސަބަބުން އެއް މިލިއަނަށް ވުރެ ގިނަ މީހުން ގެދޮރު ގެއްލިފައިވާ ކަމަށް ލުބްނާންގެ ސަރުކާރުން ބުނެފައިވެއެވެ.

 ލުބުނާނަށް އެހީ ފޮނުވި ޤައުމުތަކުގެ ތެރޭގައި ޔޫއޭއީ، ތުރުކީވިލާތް، އިރާޤް، މިޞްރު، އުރުދުން، ރޯމިނިއާ އަދި ފްރާންސް ހިމެނެ އެވެ.