ދުނިޔެ
އިޒްރާއިލުން އުތުރު ޣައްޒާގައި ހިންގާ ޢަސްކަރީ ހަރަކާތްތަކަށް ނުވަދުވަސް: 300 މީހުން ޝަހީދުވެއްޖެ!
ޣައްޒާގެ އުތުރުން ރައްކާތެރި ހިސާބަކަށް ދެވޭތޯ ދަތުރު ފެށި ބައެއް. ފޮޓޯ:އިންޓަރނެޓް
ޣައްޒާގެ އުތުރު ސަރަހައްދުގައި އިޒްރާއިލުން ހިންގަމުންގެންދާ ވަރުގަދަ ޢަސްކަރީ ހަރަކާތްތަކަށް ނުވަދުވަސް ވެފައިވާއިރު އެ ހަރަކާތުގެ ތެރެއިން ފަލަސްޠީނުގެ 300 މީހަކު ޝަހީދު ކޮށްލައިފައިވާ ކަމަށް އަލްޖަޒީރާގައި ރިޕޯޓު ކޮށްފިއެވެ.
އިޒްރާއިލް ސިފައިން ޣައްޒާގެ އުތުރު ސަރަހައްދުގައި ހިންގަމުންދާ ޢަސްކަރީ ހަރަކާތްތަކުގެ ތެރެއިން ދެމުންދާ ވަރުގަދަ ހަމަލާތަކާއި އެކު އިޒްރާއިލް ސިފައިންވަނީ އެސަރަހައްދުން އެއްވެސް މީހަކަށް ބޭރަށް ނުނިކުމެވޭ ގޮތައް ބަންދުކޮށްފައެވެ. އަދި މިކަމުގެ ސަބަބުން އެތައް ހާސް ބަޔަކު ޙާލުގައި ޖެހެމުންދާއިރު، އެސަރަހައްދުން ކާބޯތަކެއްޗާއި ބޯފެނަށް ޖެހިދާނެ ކަމުގެ ބިރު މިހާރު ވަނީ ހީވެފައެވެ.
ޣައްޒާގެ އުތުރަށް ހުއްޓުމެއް ނެތި އިޒްރާއިލުން ދެމުންދާ ހަމަލާތަކުގެ ސަބަބުން އެތަނުގެ ގިނަ ޢިމާރާތްތަކެއް ވަނީ ވެއްޓިފައެވެ.
މިއީ ހަނގުރާމަ ފެށުނު ފަހުން އެސަރަހައްދަށް ވައިގެ ހަމަލާތައް ދިނުމާއިއެކު، އެސަރަހައްދުގެ ބިމަށް އިޒްރާއިލުން އަރައިގަތް ތިން ވަނަ ފަހަރެވެ.
އެކަމަކު މިފަހަރު އިޒްރާއިލުން ހިންގަމުންދާ ޢަސްކަރީ ހަރަކާތްތއް ވަރުގަދަ ކޮށްފައިވުމުގެ ސަބަބުން ޣައްޒާގެ ރައްޔިތުންގެ މެދުގައި ބިރުވެރިކަން ދަނީ އިތުރުވަމުންނެވެ. އަދި އެތަނުން ސަލާމަތް ވުމެއް ނިކުމެވޭނެ ގޮތެއް ނެތުމުން ހާސްކަން ދަނީ އިންތިހާއަށް އިތުރުވަމުންނެވެ.