އިލެކްޝަންސް ކޮމިޝަންގެ ރައީސްކަމަށް ހަސީބު އައްޔަންކުރުމަށް މަޖިލީހަށް ހުށަހަޅުއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިލެކްޝަންސް ކޮމިޝަނުގެ ރައީސްކަމުގެ މަޤާމަށް އަލްފާޟިލް އަބްދުލް ހަސީބު އިސްމާއިލްގެ ނަން ރައްޔިތުންގެ މަޖިލީހަށް ހުށަހަޅުއްވާފައެވެ. މި ހުށަހެޅުއްވުމަކީ މިހާރުގެ ރައީސް އަލްފާޟިލް ފުއާދު ތައުފީގުގެ ދައުރު ހަމަވުމާ ގުޅިގެން ކުރެވުނު ހުށަހެޅުއްވުމެކެވެ.

މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި މި ކަމާ ގުޅޭ ރައީސުލްޖުމްހޫރިއްޔާގެ ސިޓީފުޅު އިއްވައިދެވުނެވެ. އެ ސިޓީފުޅުގައި ބަޔާންކުރައްވާފައިވާ ގޮތުގައި، އަލްފާޟިލް ފުއާދު ތައުފީގުގެ މެންބަރުކަމުގެ މުއްދަތު އަންނަ މަހުގެ 24 ވަނަ ދުވަހު ހަމަވާތީ، އެ މަޤާމަށް އައު މެންބަރަކު ޢައްޔަންކުރުމަށް ޢާންމުކޮށް އިޢުލާޢުލާންކުރެވުނެވެ. މި އިޢުލާނާ ގުޅިގެން ކުރިމަތިލެއްވި ފަރާތްތަކުގެ ތެރެއިން އަލްފާޟިލް އަބްދުލް ހަސީބު އިސްމާއިލްގެ ނަންފުޅު ހުށަހަޅުއްވާފައިވެއެވެ.

އަލްފާޟިލް އަބްދުލް ހަސީބު އިސްމާއިލަކީ އިސްލާމިކް މިނިސްޓްރީގެ ޕަރމަނަންޓް ސެކްރެޓަރީގެ މަޤާމު ފުރުއްވާފައިވާ ބޭފުޅެކެވެ. 

އަލްފާޟިލް ފުއާދު ތައުފީގަކީ އިލެކްޝަންސް ކޮމިޝަނުގައި ދިގު މުއްދަތަކަށް ޚިދުމަތް ކުރައްވާފައިވާ ބޭފުޅެކެވެ. އެ މަނިކުފާނު ވަނީ 2008 އިން 2009 އަށް އިލެކްޝަންސް ކޮމިޝަނުގެ މެންބަރުކަމާއި، 2009 އިން 2014 އަށް އިލެކްޝަންސް ކޮމިޝަނުގެ ރައީސްކަން ކުރައްވާފައެވެ. އަދި 2019 ގައި އަލުން އިލެކްޝަންސް ކޮމިޝަނަށް ވަޑައިގެން، 2021 ގައި އަނެއްކާވެސް ރައީސްކަމާ ހަވާލުވެވަޑައިގަތެވެ.

އިލެކްޝަންސް ކޮމިޝަނުގެ ޤާނޫނުގައި ބަޔާންކޮށްފައިވާ ގޮތުން، މެންބަރުކަމުގެ ދައުރަކީ 5 އަހަރު ދުވަހެވެ. އަދި އިތުރު 5 އަހަރަށް ވުރެ ދިގުނުވާ ގޮތަށް މުއްދަތު އިތުރުކުރުމުގެ ފުރުޞަތު ލިބިގެންވެއެވެ.