ބާބާ ސިއްދީޤުގެ ދަރިފުޅު، އެމްއެލްއޭ ޒީޝާން ސިއްދީޤުގެ ފުރާނައަށް ވެސް ނުރައްކާ

މުންބާއީގައި ފާއިތުވި ހަފުތާގައި ސިޔާސީ ލީޑަރެއް ކަމުގައިވާ ބާބާ ސިއްދީޤު މަރާލުމަށްފަހު، އޭނާގެ ދަރިފުޅު ޒީޝާން ސިއްދީޤު ވެސް ބިޝްނޯއީ ގޭންގުގެ އަމާޒުގައި ހިމެނޭކަމަށް އިތުބާރުހުރި ފަރާތްތަކުން މަޢުލޫމާތު ދީފައިވެއެވެ. ފުލުހުންގެ މަޢުލޫމާތު ދޭ ފަރާތްތަކުން ހާމަކުރާ ގޮތުގައި، މި ޢަމަލު ހިންގި ފަރާތްތަކުން އިޢުތިރާފުވެފައިވަނީ ބާބާ ސިއްދީޤު އަދި ޒީޝާން ސިއްދީޤު ދެބޭފުޅުން މަރާލުމަށް ރޭވިފައިވާ ކަމަށެވެ.

 މަޢުލޫމާތު ދޭ ފަރާތްތަކުން އިތުރަށް ހާމަކޮށްފައިވަނީ، މި ޢަމަލު ހިންގި ފަރާތްތަކަށް އަންގާފައިވަނީ ހޮނިހިރު ދުވަހުގެ ހަވީރު ބައްޕަ އާއި ދަރިފުޅު ވެސް އެއް ތަނެއްގައި ހުންނަވާނެ ކަމަށެވެ. ނަމަވެސް ދެބޭފުޅުންނަށް އެކުގައި ހަމަލާދިނުމުގެ ފުރުޞަތު ނުލިބިއްޖެނަމަ، ފުރަތަމަ ފެންނަ ބޭފުޅަކަށް ހަމަލާދިނުމަށް އަމުރުކޮށްފައިވާ ކަމަށް މަޢުލޫމާތު ލިބެއެވެ.

ވަންދްރޭ އީސްޓުން ކޮންގްރެސްގެ އެމް.އެލް.އޭ އެއް ކަމުގައިވާ ޒީޝާން ސިއްދީޤު، މަޖިލީހުގެ އިންތިޚާބުގައި އިދިކޮޅަށް ވޯޓުލުމުގެ މައްސަލަތަކަކާ ގުޅިގެން މަސްތަކެއް ކުރިން ޕާޓީން ވަކިކުރެވިފައިވެއެވެ.

ހޮނިހިރު ދުވަހުގެ ރޭ ބާބާ ސިއްދީޤުގެ ދަރިފުޅުގެ އޮފީސް ކުރިމަތީގައި އޭނާ މަރާލުމުގެ ޢަމަލު ހިންގީ ތިން މީހުންނެވެ. މި މީހުން މިކަން ކުރީ ޑިއުޓީގައި ހުރި ފުލުސް ކޮންސްޓަބަލްގެ ގަޔަށް މިރުސް ކުނޑި ޖެހުމަށްފަހުގައެވެ.

މީގެ ތެރެއިން ދެ މީހުން - ހަރިޔާނާގެ ގުރުމެއިލް ބަލްޖިތް ސިންގް އަދި އުއްތަރު ޕްރަދޭޝްގެ ދަރުމަރާޖް ކަޝްޔަޕް - ވަނީ ހައްޔަރުކުރެވިފައެވެ. އެހެންނަމަވެސް ތިންވަނަ މީހާ - ޝިވްކުމާރު ގައުތަމް - ވަނީ އެތަނުން ފިލައިގެން ގޮސްފައެވެ. އޭނާ އެންމެ ފަހުން ފެނިފައިވަނީ މިއަދު ހެނދުނު ޕަންވެލް ސަރަޙައްދުންނެވެ.

ޝިވް ހައްޔަރުކުރުމަށްޓަކައި ހަރިޔާނާ، އުއްތަރު ޕްރަދޭޝް އަދި ދިއްލީގައި ގިނަ ފުލުހުންގެ ޓީމުތަކެއް ވަނީ ފޮނުވިފައެވެ. އަދި މުންބާއީ ފުލުހުންގެ އެންޓި-އެކްސްޓޯޝަން ސެލްއިން ދަނީ މި މައްސަލަ ތަޙުޤީޤުކުރަމުންނެވެ.