ވެމްކޯއިން އިލެކްޓްރޯނިކް ކުނި ހިލޭ ނައްތާލުމުގެ ޚިދުމަތް

އީ-ވޭސްޓް ދުވަހުގެ މުނާސަބަތުގައި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން މިއަދު އިލެކްޓްރޯނިކް ކުނި ހިލޭހިލޭ އުކައިދިނުމުގެ ޚާއްޞަ ޚިދުމަތެއް ފަށައިފިއެވެ.

 ވެމްކޯއިން ބުނެފައިވަނީ، މިއަދު ހެނދުނުން ފެށިގެން މިރޭ 10:00 އާ ހަމައަށް އާންމުންނަށް ޓްރާންސްފާ ސްޓޭޝަންތަކުން އީ-ވޭސްޓް ހިލޭ ޑްރޮޕް އޮފް ކުރުމުގެ ފުރުސަތު ހުޅުވާލާފައިވާ ކަމަށެވެ.

މި ޚިދުމަތުގެ މަޤްޞަދަކީ އިލެކްޓްރޯނިކް ކުނި ރަނގަޅު ގޮތުގައި ނައްތާލުމުގެ މުހިންމުކަމާ މެދު އާންމުން ހޭލުންތެރިކުރުވުމެވެ. އަދި މިފަދަ ކުނި ތިމާވެށްޓާ ރައްޓެހި ގޮތުގައި ނައްތާލުމަށް މަގުފަހިކޮށްދިނުމެވެ.

 ކޮންމެ އަހަރެއްގެ އޮކްޓޯބަރު މަހުގެ 14 ވަނަ ދުވަހަކީ ބައިނަލްއަޤްވާމީ އީ-ވޭސްޓް ދުވަހެވެ. މި ދުވަސް ފާހަގަކުރަން ފެށީ 2018 ވަނަ އަހަރުއެވެ. ވޭސްޓް ފްރޮމް އިލެކްޓްރިކަލް އެންޑް އިލެކްޓްރޯނިކް އިކުއިޕްމަންޓް (ޑަބްލިޔުއީއީ) އިން މި ދުވަސް ފާހަގަކުރުމަށް ނިންމީ އީ-ވޭސްޓް ރިސައިކަލް ކުރުމާބެހޭގޮތުން އާންމުން ހޭލުންތެރިކުރުވުމަށެވެ.

 މީގެ އިތުރުން ބައިނަލްއަޤްވާމީ އީ-ވޭސްޓް ދުވަހާ ގުޅިގެން ކްލީން މޯލްޑިވްސްއިން އިންތިޒާމުކޮށްގެން ބޭއްވި ޕެނަލް ޑިސްކަޝަނެއްގައި ވެމްކޯގެ މެނޭޖިންގ ޑިރެކްޓަރ މުޖުތަބާ ޖަލީލް ބައިވެރިވެވަޑައިގެންނެވިއެވެ. މި ޑިސްކަޝަންގައި މައިގަނޑު ގޮތެއްގައި މަޝްވަރާކުރެވުނީ ދުވަހެއް ދުވަހަކަށް އިތުރުވަމުންދާ އިލެކްޓްރޯނިކް ކުނީގެ މައްސަލައަށް ހައްލެއް ހޯދުމާއި، ސާފު މުސްތަޤުބަލަކަށް މަގުފަހިކުރުމަށްޓަކައި ދެމެހެއްޓެނިވި ގޮތްތަކެއް ހޯދުމާ ބެހޭ ގޮތުންނެވެ.