މެލޭޝިޔާ ޤުރުއާން މުބާރާތުގައި ތިންވަނަ ދަރަޖަ ހާސިލުކުރި ޝާޔާއަށް ޚާއްޞަ މަރުޙަބާއެއް

ޝާޔާގެ ފަޚުރުވެރި ކާމިޔާބީއަށްފަހު އެނބުރި ރާއްޖެ އައުމުން ވެލާނާ އިންޓަނޭޝަނަލް އެއަރޕޯޓުގެ ވީއައިޕިޕީ ލައުންޖުގައި ޝާޔާއަށް ޚާއްސަ އިސްތިޤުބާލެއް ބާއްވާ މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސަޢީދު ޝާޔާއަށް މަރުޙަބާ ކިޔުއްވައި، ތަހުނިޔާ އަރިސްކުރައްވައިފިއެވެ.

 މެލޭޝިޔާގެ ވެރިރަށް ކުއަލަލަމްޕޫރުގައި މި މަހުގެ 5 އިން 12 އަށް ބޭއްވުނު 64 ވަނަ "މެލޭޝިއަން އިންޓަނޭޝަނަލް އަލްޤުރުއާން ރިސައިޓޭޝަން އެންޑް މެމޮރައިޒޭޝަން އެސެމްބްލީ" (އެމްޓީއެޗްކިއުއޭ) މުބާރާތުގައި ދިވެހިރާއްޖެ ތަމްސީލުކުރި ފާޠިމަތު ޝާޔާ ޒާހިރު ވަނީ މުޅި މުބާރާތުން ތިންވަނަ ދަރަޖަ ހާސިލުކޮށްފައެވެ. މި މުބާރާތުގައި 52 ޤައުމަކުން 76 ބައިވެރިން ވާދަކޮށްފައިވާކަން ފާހަގަކުރެވެއެވެ.

 ފާހަގަކޮށްލެވޭ ގޮތުގައި، ފާޠިމަތު ޝާޔާ ޒާހިރަކީ މިއަހަރު ރާއްޖޭގައި ބޭއްވުނު ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތުން ޙާފިޡުންގެ ބައިން އެއްވަނަ ދަރަޖަ ހާސިލުކުރި ދަރިވަރެކެވެ. މީގެ އިތުރުން، މިދިޔަ އަހަރުގެ އޭޕްރީލް މަހު މިސްރުގައި ބޭއްވުނު ޤުރުއާން މުބާރާތަކުން ދެވަނަ ދަރަޖަ ހާސިލުކޮށްފައިވާކަންވެސް ފާހަގަކުރެވެއެވެ.

މި ކާމިޔާބީތަކުން ހާމަވަނީ ޝާޔާގެ ހުނަރުވެރިކަމާއި، ކީރިތި ޤުރުއާނަށް އޭނާ ދެއްވާ އިސްކަމެވެ. އަދި މިފަދަ ބައިނަލްއަޤްވާމީ މުބާރާތްތަކުން ރާއްޖެއަށް ލިބޭ ކާމިޔާބީތަކަކީ މުޅި ޤައުމަށް ލިބޭ ފަޚުރެއްގެ ގޮތުގައި ބެލެވެއެވެ.

ކާމިޔާބީއަކީ ދިވެހިރާއްޖެއަށް ލިބުނު ފަޚުރެއް ކަމަށް ފާހަގަކޮށް، ޝާޔާއާއި އޭނާގެ އާއިލާއަށް ތަހުނިޔާއާއި ހެޔޮ ދުޢާ އަރިސްކުރަމެވެ.