ދުނިޔެ
ޖަބަލިއްޔާގެ ކާބޯތަކެތި ބަހާ ސެންޓަރަކަށް އިޒްރާއިލުން ދިން ހަމަލާއެއްގައި 10 މީހަކު ޝަހީދުވެއްޖެ!
ފަލަސްޠީނުގެ ޝަހީދެއްގެ ހަށިގަނޑާއި އެކު އާއިލާއެއް. ފޮޓޯ:އޭއެފްޕީ
ފަލަސްޠީނުގެ ޖަބަލިއްޔާގައި ހުންނަ ކާބޯތަކެތި ބަހާ ސެންޓަރަކަށް އިޒްރާއިލުގެ ޔަހޫދީ ސިފައިން ދިން ހަމަލާއެއްގައި ފަލަސްޠީނުގެ 10 މީހަކު ޝަހީދުވެ ގިނަ ބަޔަކަށް އަނިޔާވެއްޖެއެވެ.
ފަލަސްތީނުގެ އަވަސްފަރުވާދޭ ޓީމަކަށް ހަވާލާދީ އަލްޖަޒީރާގައި ރިޕޯޓްކޮށްފައިވާ ގޮތުގައި ޣައްޒާގެ އުތުރުގައި އޮންނަ ވަށާލެވިފައިވާ ޖަބަލިއްޔާ ރެފިއުޖީ ކޭމްޕްގައި ހުންނަ ކާބޯތަކެތި ބަހާ މަރުކަޒަކަށް އިޒްރާއިލުން ވައިގެ މަގުން ހަމަލާތަކެއް ދީފައިވާ ކަމަށެވެ.
އަދި މިހަމަލާތަކުގެ ސަބަބުން 10 މީހަކު ޝަހީދުވެފައިވާއިރު 30 މީހުން ވަނީ ޒަޚަމްވެފައެވެ.
ޒަޚަމްވި މީހުންގެ ތެރޭގައި ގިނައިން ހިމެނެނީ އަންހެނުންނާއި ކުޑަކުދިންނެވެ.
މިހަމަލާގެ މަންޒަރުތައް ދުށް މީހަކަށް ހަވާލާދީ އަލްޖަޒީރާގައި ބުނެފައިވަނީ ޖަބަލިއްޔާ ރެފިއުޖީ ކޭމްޕްގައި ހުންނަ ކާބޯތަކެތި ބަހާ ސެންޓަރެއްގައި ހަނޑޫ ބަހާނެ ކަމުގެ އިންތިޒާރު ކުރަމުން ދިޔަ އާންމު ރައްޔިތުންނަށް އަމާޒުކޮށް އިޒްރާއީލުގެ ސިފައިން އާޓިލަރީ ބޮން އަޅާފައިވާ ކަމަށެވެ.
އެމްބިއުލާންސްތަކާއި މެޑިކަލް ޓީމްތަކަށް މިހަމަލާތަކުގައި ޒަޚަމްވި މީހުން ހޮސްޕިޓަލަށް ގެންދިއުމަށް އެ ސަރަހައްދަށް ނުވަދެވޭނެހެން އިޒްރާއީލު ސިފައިން ހުރަސްއަޅާފައިވާ ކަމަށާއި އެހުރަސްތަކުގެ ސަބަބުން އެމީހުން ފަރުވާއަށް ގެންދެވޭނެ ގޮތެއް ނެތިފައިވާ ކަމަށެވެ.
އިޒްރާއީލު ސިފައިން ވަނީ މީގެ 10 ދުވަސް ކުރިން ޣައްޒާގެ އުތުރުގެ ބިމަށް ހަތިޔާރުތަކާއި އެކު ވަދެގަނެފައެވެ.
އިޒްރާއިލް ސިފައިން ހަތިޔާރުތަކާއި އެކު އެސަރަހައްދަށް ވަދެގަނެ އެތަން ވަށާލައި ދެމުންދާ ހަމަލާތަކުގެ ސަބަބުން 300 އަށް ވުރެ ގިނަ މީހުން ޝަހީދުވެފައިވާ ކަމަށް ފަލަސްޠީނުގެ ޞިއްޚީ އޮފިޝަލުން ބުނެ އެވެ.