ބްރިކްސްގެ މެމްބަރުކަމަށް ސްރީލަންކާއިން އެދެނީ

 ސްރީލަންކާގެ ފޮރިން މިނިސްޓަރު ވިޖިތަ ހެރަތު ވިދާޅުވެފައިވާ ގޮތުގައި، ރަޝިޔާގެ ކަޒާން ސިޓީގައި ބޭއްވުމަށް ހަމަޖެހިފައިވާ ބްރިކްސް ސަމިޓުގައި އެ ޖަމްޢިއްޔާގެ މެމްބަރުކަމަށް އެދި ސްރީލަންކާއިން ރަސްމީކޮށް ހުށަހަޅަންވަނީ ނިންމާފައެވެ.

ބްރިކްސް އަކީ ދުނިޔޭގެ އެންމެ ބާރުގަދަ އަދި ކުރިއަރަމުން އަންނަ އިޤްތިޞާދުތަކުގެ ގްރޫޕެއްގެ ކުރުގޮތެވެ. މި ގްރޫޕުގައި ހިމެނެނީ ބްރެޒިލް، ރަޝިޔާ، އިންޑިޔާ، ޗައިނާ އަދި ސައުތު އެފްރިކާއެވެ. ބްރިކްސްގެ މަޤްޞަދަކީ ސުލްޙަ، ސަލާމަތްތެރިކަން، ތަރައްޤީ އަދި އެއްބާރުލުން ކުރިއެރުވުމެވެ.

މިނިސްޓަރު ވިދާޅުވި ގޮތުގައި، ސްރީލަންކާއިން ވަނީ މިހާރުވެސް ބްރިކްސްގެ މެމްބަރު ޤައުމުތަކުގެ އެހީތެރިކަމަށް އެދިފައެވެ. އޭނާ ވިދާޅުވީ، "ސްރީލަންކާއިން ވަނީ ބްރިކްސްއާއި ބްރިކްސްގެ ނިއު ޑިވެލޮޕްމަންޓް ބޭންކުގައި ބައިވެރިވުމަށް އެދި ހުށަހެޅުމަށް ނިންމާފަ. އަޅުގަނޑު ވާނީ ބްރިކްސް މެމްބަރު ޤައުމުތަކުގެ އަޅުގަނޑުގެ އެމްބަސީތަކަށް ސިޓީ ފޮނުވައި، އެހީތެރިކަމަށް އެދިފައެވެ.

ނަމަވެސް، ކުރިއަށް އޮތް ޕާލިމެންޓަރީ އިންތިޚާބާ ގުޅިގެން، އޭނާއާއި ސްރީލަންކާގެ އައު ރައީސް އަނުރާ ކުމާރާ ދިސަނާޔަކަށް ކަޒާންގައި ބޭއްވޭ ސަމިޓުގައި ބައިވެރިއެއް ނުވެވޭނެ ކަމަށް ހެރަތު ވިދާޅުވިއެވެ. "ސްރީލަންކާ ތަމްސީލުކުރާނީ ޑެޕިއުޓީ ފޮރިން މިނިސްޓަރެކެވެ. އެ ބޭފުޅާ މެމްބަރުކަމަށް އެދި ރަސްމީކޮށް ހުށަހަޅުއްވާނެއެވެ،" ހެރަތު ވިދާޅުވިއެވެ. ނަމަވެސް ލަންކާގެ މީޑިއާތަކުން ބުނެފައިވަނީ، އެ ޤައުމު ތަމްސީަމްސީލުކުރާނީ ފަސްޓް ޑެޕިއުޓީ ފޮރިން މިނިސްޓަރު އަރުނީ ވިޖެވަރުދަނަ ކަމަށެވެ.

 އަޅުގަނޑުމެން ބްރިކްސް ދެކެނީ، އދ. ގެ ޗާޓަރުގެ ތެރެއިން ފުރިހަމަ ގިނަ ފަރާތްތަކެއްގެ ބައިވެރިވުން އޮންނަ ގޮތަށް، އެކުވެރިކަމާއި ތަރައްޤީއަށް މަސައްކަތްކުރާ، އަދި އެކަކު އަނެކަކަށް ފައިދާވާނެ ގޮތަށް އެއްބާރުލުން ދޭ ޖަމްޢިއްޔާއެއްގެ ގޮތުގައެވެ. - ހެރަތު ވިދާޅުވިއެވެ.

 އޮކްޓޯބަރު 1 ވަނަ ދުވަހު، ކޮލޮމްބޯގައި ހުންނަ ރަޝިޔާގެ އެމްބެސެޑަރު ލެވަން ޖަގަރިޔާން ވަނީ ސްރީލަންކާގެ އައު ރައީސް އަނުރާ ކުމާރާ ދިސަނާޔަކަށް ކަޒާންގައި ބޭއްވޭ ބްރިކްސް ސަމިޓަށް ދަޢުވަތު ދެއްވާފައެވެ.