ދަރުމަވަންތަ ސްކޫލުގައި ނުރައްކާތެރި ހާދިސާއެއް: ކުދިން ކިޔަވަން ތިއްބާ ފަންކާއެއް ވެއްޓިއްޖެ

އަލަށް އިމާރާތްކޮށް މިދިޔަ އަހަރު އޮގަސްޓް މަހު ބޭނުންކުރަން ފެށި ދަރުމަވަންތަ ސްކޫލުގެ އާ އިމާރާތުގެ ކްލާސްރޫމެއްގައި ދަރިވަރުން ކިޔަވަން ތިއްބާ އިއްޔެ ފަންކާއެއް ވެއްޓިއްޖެ އެވެ.

ސްކޫލުގެ ބެލެނިވެރިއަކު މަޢުލޫމާތު ދެއްވި ގޮތުގައި، މި ހާދިސާ ހިނގާފައިވަނީ ގްރޭޑް 4 ގެ ކްލާހެއްގައެވެ. ދަރިވަރުން ކިޔަވަން ތިއްބާ ފަންކާ ވެއްޓުނީ ދަރިވަރެއްގެ ޑެސްކު މައްޗަށް ކަމަށް އެ ބެލެނިވެރިޔާ ވިދާޅުވިއެވެ.  ނަމަވެސް، މި ހާދިސާގައި އެއްވެސް ދަރިވަރަކަށް އަނިޔާއެއް ވެފައި ނުވާ ކަމަށް އެ ބެލެނިވެރިޔާ ފާހަގަކުރެއްވިއެވެ.

މި ހާދިސާއާ ގުޅިގެން އެޑިޔުކޭޝަން މިނިސްޓްރީން ވަނީ އިއްޔެ އެ ސްކޫލަށް ޒިޔާރަތްކޮށް، ހުރިހާ ކްލާސްރޫމެއްގެ ފަންކާތައް ރަނގަޅުތޯ ބަލާފައެވެ. މިނިސްޓްރީގެ ފަރާތުން ލިބުނު މަޢުލޫމާތުގައިވާ ގޮތުން، އެހެން ކްލާސްރޫމްތަކުގެ ފަންކާތަކުގައި އެއްވެސް މައްސަލައެއް ފާހަގަކުރެވިފައި ނުވެއެވެ.

މީގެ އިތުރުން، މިދިޔަ ޑިސެމްބަރު މަހު މި ސްކޫލުގެ ކުޑަދޮރުތަކުގައި ޖަހާފައިހުރި ބިއްލޫރިތައް ތަޅައިގެންދާ މައްސަލައެއް ވެސް ފާހަގަކުރެވުނެވެ. އޭރު އެޑިޔުކޭޝަން މިނިސްޓަރު ވިރު ވިދާޅުވެފައިވަނީ ފިޔަވަހިތަކަށް ބަހާލައިގެން އެ ހުރިހާ ދޮރެއް ބަދަލުކުރާނެ ކަމަށެވެ.

ދަރުމަވަންތަ ސްކޫލުގެ އާ އިމާރާތް އެޅުމުގެ މަސައްކަތް ފެށުނީ 2020 ވަނަ އަހަރުގެ ފެބްރުއަރީ މަހުގެ 4 ވަނަ ދުވަހުއެވެ. ވިލާ ކޮލެޖު ކުރިމަތީގައި އޮންނަ ބިމުގައި މި އިމާރާތް އެޅުމުގެ މަސައްކަތް އެޑިޔުކޭޝަން މިނިސްޓްރީން ހަވާލުކޮށްފައިވަނީ އެސްޖޭ ކޮންސްޓްރަކްޝަން ކުންފުންޏާއެވެ.