އެއަރޕޯޓުގައި ލަގެޖް އުފުލާ ވެހިކަލް ދުއްވަނިކޮށް ހިނގި އެކްސިޑެންޓެއްގައި 45 އަހަރުގެ ފިރިހެނަކު ނިޔާވެއްޖެ

ވެލާނާ އިންޓަރނޭޝަނަލް އެއަރޕޯޓުގައި މިއަދު ހެނދުނު ހިނގި ހިތާމަވެރި ހާދިސާއެއްގައި 45 އަހަރުގެ ދިވެހި ފިރިހެނަކު ނިޔާވެއްޖެއެވެ. ޕޮލިސް މީޑިއާއިން މަޢުލޫމާތު ދެއްވާފައިވާ ގޮތުގައި، މި ހާދިސާ ހިނގާފައިވަނީ އެއަރޕޯޓުގައި ލަގެޖް އުފުލާ ވެހިކަލެއް ދުއްވަމުން ދަނިކޮށެވެ.

މިއަދު ހެނދުނު 9:28 ގައި ފުލުހުންނަށް ލިބުނު މަޢުލޫމާތުގައިވާ ގޮތުން، މި ހާދިސާ ހިނގާފައިވަނީ އެއަރޕޯޓުގެ އޭޕްރަން ސަރަޙައްދުގައި ހުރި ލައިޓާއި ކެމެރާ ހަރުކޮށްފައި ހުރި ސްޓްރަކްޗަރގެ ބުޑުގަނޑުގައި ޖެހިގެންނެވެ.ސްޓްރަކްޗަރގައި އުޅަނދު ޖެހިފައިވާ ފަރާތަށް ޞިއްޙީ ގޮތުން ނުރައްކާތެރި ޙާލަތެއް މެދުވެރިވެފައިވާ ކަމަށް ޤަބޫލުކުރެވޭކަމަށް މަޢުލޫމާތުލިބެއެވެ.ހާދިސާ ހިނގުމާ ގުޅިގެން ވެހިކަލް ދުއްވި ފަރާތް ވަގުތުން އެއަރޕޯޓު ކްލިނިކަށް ގެންދެވުނެވެ. ނަމަވެސް، ކްލިނިކަށް ގެންދިޔައިރުވެސް އޭނާ ވަނީ ނިޔާވެފައެވެ.

އިތުރަށް ފަރުވާ ދިނުމަށްޓަކައި އައި.ޖީ.އެމް.އެޗަށް ގެންދެވުނު ނަމަވެސް، ބޭރުފުށުން އެއްވެސް އަނިޔާއެއް ފެންނަން ނެތްކަމަށް ހޮސްޕިޓަލުން ފުލުހުންނަށް މަޢުލޫމާތު ދީފައިވެއެވެ.

މި ހާދިސާއާ ގުޅިގެން ފުލުހުން ދަނީ އިތުރަށް ތަޙުޤީޤު ކުރަމުންނެވެ.